Read Mousgoum Sdaɗi Apostelai 8 Bible Online

Sdaɗi Apostelai 8 - Mousgoum bible

Sdaɗi Apostelai 8

¹Sawlus a firiya pini mri na wiini Stefanus War mefeŋ ni ɗa, gir n’abai na a za siɗi Eklesiya n’e ɗa war Yeruzalem. Nagai paŋ e ɵiri edi war Yudeya gaiɗi Samariya. E hini ɗa e ɗi Apostelai tar.

²Amma ɗai zamai n’e hûni pini Alaw e pi Stefanus, e tûwiŋ gara lai.

³Sawlus a ziɗi gir wiiɗi zi yimi ɗa gara. A niya aha war dalam piɗi, a yimiɗisi maɵagai gaiɗi falakai gaini gdaŋ, e miliɗisi war daŋgai.

⁴Nagai n’e ɵiri edi ɗa, hlai n’e vigi woni paŋ ɗa e ɓiki seŋ ɗa maini labar na pɗem nɵa.

⁵Filip a hala azumai war fuŋ n’abai ktai na Samariya, a ɓaka labar midini Kristu woni.

⁶Firiɗi ɗai paŋ hiiniɗi a tapa ktai, e tiki hangalɗi sini seŋ na Filipa na ɓakaŋ ɗa. Won hlai n’e tili, n’e ɵini wazagai zi siŋki n’aŋa za ɗa lai ɗa.

⁷Buri seze na haharai viya a niyasi edi warɗi ɗai par, a ɗuula gaini gdaŋni, ɗai na höyökai, na daŋalaŋai viya e nivi zûûli.

⁸Firiyi n’abai a za war fuŋ n’abai hanɗa.

⁹Ɗif ktai yikini Simun, na a nafu haa ɗipar war fuŋ n’abai hanɗa, a mula hunai piɗi ɗai na Samariya gaini wazagai zi hila, a yika sini ɓa a ɗif n’abai.

¹⁰Ɗai paŋ n’agogoi gaiɗi n’abakai e firiyi seŋni gara e miɗi: Ɗif hanɗa a spak na wiini Alaw n’e yikiŋ ɓa n’abai.

¹¹E firiyiseŋni ɗa buri ɓa mefeŋ viya a na miliɗi hunai piɗi gaini wazagai zi hila n’aŋa zaŋ ɗa.

¹²Amma wan hlai n’e yimi pini Filip na a ɓikiɗi labar midiɗi pay na wiini Alaw gaini yikini Yesu kristu ɗa e nivi baptisme, na falakai gaiɗi na maɵagai paŋ.

¹³Smun gaini midini dama lai a yima a nava baptisme lai, a ɓurwa gaini Filip ɗa kai. Wazagai zi siŋki gaini zi hila na Filip a zaŋ ɗa, wan hlai na a talaŋ a bunda hiyak.

¹⁴Won hlai na Apostelai n’e ɗa a Yeruzalem e ɵini ɓa ɗai na Samariya e yimi seŋni Alaw ya ɗa, e ɵiniɗi Peter gaini Yohana.

¹⁵Won hlai na Apostelai na sulu hanɗa e cûwar Samariya ɗa, e siiwi buriɗi kapai e nivi Seze-sɗik,

¹⁶buri ɓa Seze-sɗik a cosi midini ktai arbaɗi kai hai, e nivi ɗa a baptisme na war yikini Epiɗ-ɗai Yesu bas.

¹⁷Nɵa Peter gaini Yohana e mili tiɗi midiɗi, nagai e nivi Seze-sɗik lai.

¹⁸Won hlai na Simun a tala ɓa, Apostelai e mili tiɗi li midiɗi ɗai ɗa e nivi Seze-sɗik ɗa, a kiɗisi sulai a muɗa:

¹⁹Siŋa spak hanɗa lai, kapai ni na mu tika ta li midini ɗa, a nava Seze-sɗik.

²⁰Amma Peter a miɗini: Tuku gaini faraiku paŋ aga ki bi edi, buri ku hiina ɓa e kiɗi e wûri like na wiini Alaw gaini farai.

²¹Buri na wiiku, gaini gal na wiiku warni wala hanɗa kai, buri agulku te na ɗikat wuzani Alaw kai.

²²Nɵa ku wayasi hiiniku, siiwa Epiɗ-ɗai kapai a sɗa aŋ za ɗa, a suku ni burini hiini n’aŋ warɗi agulku ɗa.

²³Buri mu tuluku na ɗa, gir na ɗewek, gaini jaɓ na wiini meefeŋ a na ruɓtuku.

²⁴Simun a waya seŋ a muɗa: Tiki dama ki siiwi Alaw buriya, kapai wazagai na ki miɗi midini na ɗa, a sɗa aŋ za sa kai.

²⁵Asakal n’e zi zaida ya, n’e miɗi seŋ na wiini Epiɗ-ɗai ya lai, Peter gaini Yohana e wiyi a Yeruzalem, e ɓiki labar na pɗem war fuŋ viya na Samariya.

²⁶Ɗif zi ɵeŋ na wiini Epiɗ-ɗai a miɗini wiini Filip ɓa: Hala war gal n’amai sek warɗi futi na te halasi amai a Yeruzalem par a Gaza sek edi war basga ɗa.

²⁷A faka amai a hala, kapai na ɗa, ɗif ktai na Etiyopiya par na kɓir, a ɗif zi sda n’abai na wiini Kandas na pai na muni na wiiɗi Etiyopiya, a abai na midini wazagai paŋ lai, a nasi fu a Yeruzalem aŋ siiwa Alaw.

²⁸A na waya aha sek midini Saretni dam, a na ŋa maktuɓ na wiini ɗif na mini Alaw Esaya gaini wulani amai.

²⁹Seze a miɗini wiini Filip: Hala wuzaku haa siɗi saret ɗa ta.

³⁰Filip a lawa siɗi, a zuɓura ɗa, ɗif na Etiyopiya par a na ŋa maktuɓ na wiini ɗif na mini Alaw Esaya, a zilbaŋ a muɗa: Ku na ɵina wala na ku na ŋaŋ na ɗa tiɓ ɗe?

³¹A waya seŋ a miɗini: Mu ɵina maɵa maɵa ɗa, na ɓa ɗif a ɵa wuza kai ɗa. A miɗini wiini Filip buri a niyasi amai gaini.

³²Ɗû na a nafu aŋ ŋaŋ ɗa a hanɗa: E kiŋ maiɗi adumi n’e kiti aŋ fiɗi nɵa, maini ahini adime na mini a mala amai kai, na a ɗiya wuzani ni n’a ɵini yirni edi ɗa nɵa, a mala mini amai duk kai.

³³War hûsini sini n’azumai ɗa, jreni a tika edi, pinzibani ɗa aga a muɗa gaiɗi ɗa a siya ɗa? E fiɗiŋ edi burini hanɗa.

³⁴Ɗif na kɓir ɗa a zilba Filip ɓa: Za barka, muɗaŋa haw, ɗif na mini Alaw ɗa a muɗa na ɗa midini a siya ɗa? A muɗaŋ midini ni dama zaw, midini ɗif zamai ɗi?

³⁵Nɵa Filip a tika seŋ, sini ɗû hanɗa par a tika pini aŋ ɓikini labar na pɗem midini Yesu.

³⁶Won hlai n’e ɗa hili wuzaɗi sek warɗi futi, e cûsini hlai zi yem ktai, ɗif na kɓir a muɗa: Yem ɗa aŋ na, wala na a ɗalaŋa zamai buri mu nava baptisme kai ɗa a maɗa?

³⁷A sa miɗi buri e ɗiyi Saret ɗa, nagai sulu paŋ e niyi agoɗom arni yem, Filip gaini na kɓir ɗa e sini baptisme lai.

³⁹Won hlai na e niyisi agoɗom arni yem par li ɗa, Seze na wiini Epiɗ-ɗai a tika Filip, ɗif na kɓir a talaŋ kir kai gamai, a tikiti futini gaini firiyi.

⁴⁰Amma Filip a navasi sini a Azot, a ɓaka labar na pɗem war fuŋ n’abakai paŋ na a vuga woni haa a cosi a Sezariya.