Read Mousgoum Sdaɗi Apostelai 9 Bible Online

Sdaɗi Apostelai 9 - Mousgoum bible

Sdaɗi Apostelai 9

¹Sawlus na a va gaini suwar gaini hiini na wiini fiɗi n’edi siɗi ɗai zi hitri na wiini Epiɗ-ɗai, a hala sini pai n’abai zi ɓaka.

²A zilbaŋ buri a sini letre tini kapai a kaŋ siɗi abakai na midini Sinagogne na war Damas ɗa, na ɓa e nivi li maɵagai zaw falakai n’e tikiti futi pini Alaw ɗa a yimiɗi, a rgiɗisi a kiɗisi war Yeruzalem.

³A nafu warɗi futi blaŋ aŋ hala war Damas sek, wan hlai ni tizaw, gaglai ktai a halasi amai war fuŋni Alaw par, a wulɗa, hlai na sini paŋ a bunda gaglai.

⁴A kɵa azumai, a ɵina wûle ktai a miɗinisi maini nɵa: Sawlus, Sawlus, ku sɗaŋa gir ara buri maɗa?

⁵A waya seŋ a miɗini: Tuku ku siya ɗa, Epiɗ-ɗai? Ta, mu Yesu, na ku siɗini gir arni na ɗa.

⁶Amma faka amai, ku hala aha war fuŋ n’abai ɗa, aga e sunkuku wala n’aga ku zaŋ ɗa.

⁷Ɗai n’e ɗa gaini war morkoi ɗa, e ɗiyi ca, hunai a kitiŋiɗi faɵ e ɵini wulani ɗif a muɗa, amma e tili ɗif kai.

⁸Sawlus a faka amai, arni edi ca, amma a tala wala kai, ɗai na gaini e yimiŋ tini, e kiini pini aha war Damas.

⁹A sumna haa mefeŋ hu, a tala kai, a suma kai, a ca yem kaalai.

¹⁰Ɗif zi hitri ktai yikini Ananiyas a nafu a Damas, Epiɗ-ɗai a yikaŋ war wala na a siŋka arni ɓa: Ananiyas. Ananiyas a waya seŋ: M'aŋ na Epiɗ-ɗai.

¹¹Epiɗ-ɗai a miɗini: Hala warɗi futi n’e yikiti ɓa: Futi na ɗikat, ahani Yudas, ku zilba ɗif ktai n’e yikiŋ ɓa: Sawlus na Tarsis par buri aŋ war siiwa.

¹²A tala ɗif ktai n’e yikiŋ ɓa Ananiyas, a niyasi aha sini, a mula tini midini kapai arni a mala edi.

¹³Ananiyas a wiyini seŋ a miɗini: Epiɗ-ɗai, mu ɵina miɗi ɗai viya, gir na ɗif hanɗa a ziŋɗi wiiɗi ɗaiku na sɗik war Yeruzalem ɗa,

¹⁴woni na maa, spak a sa tini siɗi paakai n’abakai zi ɓaka par buri a yimiɗi nagai paŋ n’e yiki yikuku war miɗi ɗa.

¹⁵Amma Epiɗ-ɗai a miɗini: Hala wiiku buri ɗif hanɗa a wala na mu varaŋ aŋ za sda gaini, buri a ka yikiŋa edi sini pini ziba na zaai, wuzaɗi paakai lai, siɗi ɗai na Izrayel ɗa lai.

¹⁶Ta dama aga mu siŋkini gir paŋ n’aga a sɗaŋ burini yikiŋa.

¹⁷Ananiyas a hala, wan hlai na a co aha warni dalam ɗa, a tika tini midini Sawlus a muɗa: Sawlus, tawala, Epiɗ-ɗai Yesu na a siŋkasi sini arku warɗi futi na ku halasi warɗi ɗa, a ɵinaŋasi kapai arku a mala edi, ku va gaini Seze-sɗik lai.

¹⁸Won hlai ni tizaw, wala a yakasi arni par maini fotorok ɵa, arni a mala edi, a faka amai, a nava baptisme.

¹⁹Asakal na a suma ta ɗa, a nava gdaŋ. A sumna burini hlai n’agwi gaiɗi ɗai zi hitri n’e ɗa a Damas ɗa.

²⁰Gaini yafai kai a tika pini aŋ ɓaka seŋ war Sinagogne ɓa: Yesu a Ahini Alaw.

²¹Nagai n’e ɵini mini ɗa e bindi hiyak e miɗi: Hanɗa a ni na aha warɗi Yeruzalem ɗa, a naka a ziɗi gir wiiɗi nagai n’e yiki yiki hanɗa war miɗi ɗa kai ɗi? A halasi woni na aŋ yimiɗi nagai n’e yiki yiki hanɗa war miɗi, aŋ kiɗi wuzaɗi paakai n’abakai lai kai ɗi?

²²Amma Sawlus ɗa, spakni a riya amai sek sek, a yimiŋɗi midiɗi Yudeyakai n’e ɗa a Damas ɗa ɓa, Yesu ɗa a Kristu, nagai e siɗi seŋ na e wiyiŋni ɗa kai.

²³Mefeŋ yaw askal par Yudeyakai e rgi warɗi buri e fiɗiŋ edi,

²⁴Sawlus a sɗa titimi na wiiɗi ba, mini magalani fuŋ n’abai n’aŋa su su ɗa, e tiki hangalɗi sini girvudi gaini duvuk paŋ kapai e fiɗiŋ edi.

²⁵Amma ɗaini zi hitri ɗa e tikiŋ duvuk, e wiŋsi midini ɵaga ɗaw gaini dologo.

²⁶Won hlai na a cosi a Yeruzalem ɗa, Sawlus a paya aŋ tapa gaiɗi ɗai zi hitri ɗa, amma ɗai paŋ hunai piɗi wuzani ta, e yimi ɓa a bunda aŋ ɗif zi hitrai ya jre nɵa kai.

²⁷Nɵa, Barnabas a yimaŋ gaini, a kaŋ siɗi Apostelai, a miɗiɗi midini tel na Sawlus a tala Epiɗ-ɗai warɗi futi, midini miɗi n’EPIƊ-ƊAI a muɗa gaini, miɗi na a muɗa edi war Epiɗ-ɗai Yesu a Damas ɗa gaini hunai kaalai, gaini giriŋi kaalai.

²⁸Sini mefeŋ ni par a tapa gaiɗi Apostelai e hili e wiyisi, e hili e wiyisi a Yeruzalem piɗi marɗi. A muɗa seŋ war yikini Epiɗ-ɗai ɗa gaini hunai kai, gaini giriŋi kaalai.

²⁹A muɗa, a sispa lai gaiɗi Yudeyakai n’e miɗi seŋ grek ɗa, amma nagai e piyi ɓa e fiɗiŋ edi.

³⁰Tawalakai zi yimi ɗa, e siɗi ɓa e kiŋ a Sezariya, woni par e ɵiniŋ a Tarsus.

³¹Nɵa tipi paŋ na Yudeya, na Galeliya gaini na Samariya lai e simni ɵeɗ. Tipi hanɗa e wili amai, e piyi warni hunai na pini Epiɗ-ɗai, e riyi amai wuzaɗi pini arai-zi-pi na e niviŋ war Seze-sɗik.

³²Peter a na vuga midini afti paŋ ɗa, a hala siɗi na sɗik n’e ɗa war Lida lai,

³³A navasi ɗif ktai n’e yikiŋ ɓa Enee woni, ezini gaini mri ca, a za buza mitwis midini walani zi feŋ ɗa waŋ.

³⁴Peter a miɗini: Enee, Yesu Kristu a zuuluku, faka amai, tuku dama zizina walaku zi feŋ ɗa. Tizaw tar a faka amai.

³⁵Ɗai na Lida gaiɗi na Saron lai e tiliŋ e yimi pini Epiɗ-ɗai.

³⁶War Yope, muni ktai te nafu, te muni zi hitri, e yikiti ɓa Tapita, a waya edi ɓa Dorkas, a siŋka ɓa: Wudrai. Te za sda na pɗamai viya gara, te zna piɗi na hurafai lai.

³⁷War mefeŋ ni ɗa, te kɵa veglek, te mra lai. E miti yok, e tikiti amai warɗi dilimi n’amai etas ta.

³⁸Won hlai na ɗai zi hitri e ɵini ɓa Peter a na a Lida na te na gobi gaiɗi Yope ɗa, e ɵini ɗai sulu sini aŋ siwiŋ, e miɗi: Safasi kai, halasi siyi witaw.

³⁹Peter a fakasi, a halasi gaiɗi. Won hlai na a cosi ɗa, e kiŋ pini amai warɗi dilimi n’amai zi etas ɗa, falakai na greŋ ɗa paŋ e hilisi gaini tuwi, e siŋkini rob gaini sapa na Dorkas te zaŋ wan hlai na te naka gaiɗi ɗa.

⁴⁰Peter a birgiɗi ɗai paŋ anene, asakal hanɗa a bunda arni sini kopoŋ a muɗa: Tapita, faka amai. Nɵa, te mala arɗi edi, wan hlai na te tala te sumna amai dam.

⁴¹A wiiɗi tini, a ɗiyiti amai, asakal par a yikiɗisi na sɗik gaiɗi falakai na war greŋ ɗa lai, a ɗiyiti wuzaɗi karɗi.

⁴²Labar hanɗa a wa edi war Yope paŋ, ɗai viya e tiki piɗi e yimi war Epiɗ-ɗai lai.

⁴³Peter a sumna mefeŋ yaw war Yope ahani Simun ktai, a ɗif zi ɵûɗi amur.