Read Mousgoum Romekai 10 Bible Online

Romekai 10 - Mousgoum bible

Romekai 10

¹Tawalakaya, tuwi n’aŋ warɗi agula gaini siiwiŋa na tin Alaw buriɗi ɗa, a na ɓa Yudeyakai paŋ e nivi kûri.

²Buri ɓa mu kiɗa mu za zaida hanɗa edi midiɗi ɓa dir n’aŋ warɗi burini Alaw ɗa, a diri zi sile, amma e ziŋ na ɗa war siɗi kai.

³Buri ɓa won hlai n’e siɗi jre-ɗikat na wiini Alaw kai, e piyi aŋ zi jre-ɗikat na wiiɗi dama ɗa, e zi pin jre-ɗikat na wiini Alaw kai.

⁴Buri ɓa Kristu a vi n’amai na wiini seŋ zi gadai, kapai jre-ɗikat a sa sini asiya asiya paŋ n’a yima.

⁵Buri ɓa Musus a ɗo midini jre-ɗikat na pin seŋ zi gadai ɗa maini nɵa: ɗif n’aga a za pin gadai hanɗa, aga a sumna karni gaini ni lai.

⁶Amma jre-ɗikat na pin yimi ɗa a muɗa maini nɵa: Aga ku hiina gaini warku dama kai ɓa: N'aga a niya haa amai war hlai n’amai ɗa asiya ɗa? -A dara muɗa aŋ yimasi Kristu azumai ɗa!

⁷Zaw, n’aga a niya ha azumai war hulumni hlai n’azumai, - a dara muɗa aŋ yimasi Kristu amai arbaɗi zi mri par ɗa asiya ɗa?

⁸Jre-ɗikat na pin yimi a muɗa ɗa maini nɵa: Seŋ ɗa a na gobi gaiku, aŋ war muku, aŋ warɗi agulku lai, hanɗa a seŋ na wiini yimi, na tiyi mi ɓikiŋ na ɗa.

⁹Buri ɓa na ɓa ku muɗa gaini muku ɓa: Yesu a Epiɗ-ɗai, na ɓa ku yima warɗi agulku ɓa Alaw a ɵiyaŋ amai arbaɗi zi mri par ya lai ɗa, aga ku kora.

¹⁰Buri ɓa won hlai na mu yumumu li gaiɗi agulmu paŋ, Alaw a zumu edi aŋ jre-ɗikat, na ɓa mu muɗumu edi gaini mumu midini yimimu wuzaɗi ɗai paŋ ɗa, aga mu kurumu lai.

¹¹Buri ɗû a muɗa: Asiya ɗi paŋ n’a yima li warni ɗa, aga a gaini siyer kai.

¹²Buri ɓa Yudeyakai gaiɗi Grekkai ɓraw arbaɗi kai, n’a suwa maini aŋ kaalai. Epiɗ-ɗai na wiiɗi a ktai, n’a za pɗem siɗi nagai paŋ n’e tuwi sini.

¹³Buri asiya ɗi paŋ n’a tuwa sini Epiɗ-ɗai ɗa, aga a kora.

¹⁴Nɵa ɗa, e siɗi aŋ tuwi sini ni na nagai e yimi warni kai ɗa maɵa maɵa ɗa? Nagai e siɗi aŋ yimi warni ni na nagai e ɵini labar midini duk kai ɗa maɵa maɵa ɗa? Nagai e siɗi aŋ ɵini maɵa maɵa ɗa, na ɓa ɗif n’a ɓaka seŋ siɗi aŋ kai ɗa?

¹⁵Kapai e ɓiki seŋ ɗa maɵa maɵa ɗa, na ɓa ɗai n’e ɵinuku edi edi kai ɗa? Maini n’aŋ gaini ɗû nɵa: Eziɗi nagai n’e ki labar na pɗem ɗa zuva gara.

¹⁶Amma paŋ e yimi labar na pɗem ɗa kai. Buri Esaya a muɗa maini nɵa: Epiɗ-ɗai Seŋ na mi miɗiŋ ɗa, n’a ɵinaŋ, n’a yima pin lai ɗa asiya ɗa?

¹⁷Nɵa ɗa, yimi a halasi ɗa pin ɵinini seŋ, seŋ n’e ɵiniŋ ɗa, a seŋ na wiini Kristu lai.

¹⁸Nɵa mu zilba ɗa ɓa: Yudeyakai ɗa e ɵini seŋ hanɗa kai ɗi? Zaw kai, e ɵini ya. Dû a muɗa: Wulaɗi ɗai zi ɓiki seŋ ɗa a wa edi midini afti paŋ, seŋɗi n’e miɗiŋ ɗa a hala haa edi war koŋɗi yai na puɗu paŋ lai.

¹⁹Nɵa mu zilba ɗa ɓa: Pinzibaɗi Izrayel e ɵini seŋ hanɗa kai ɗi? E ɵiniŋ avut ɗai e ɗi nagai. Musus a muɗa: Aga mu bindiki mesile, siɗi ɗai n’e ɗi ka e yiki aŋ pinziba kai ɗa, siɗi pinziba na yel midiɗi kai, mu dara mu buriki gaini hiy.

²⁰Esaya a arni haa a muɗa seŋ n’Alaw a miɗiŋni edi maini nɵa: Nagai n’e piyiŋa kai ɗa, nagai e niviŋa. Mu siŋka sa arɗi nagai n’e zilbi diriŋa kai.

²¹Amma buriɗi Izrayel ɗa a muɗa maini nɵa: Mu yiva na ɗa aŋ wa ta min pinziba n’a dara a ɵina kai, n’a faka gai fiki amai sa.