Read Mousgoum Romekai 11 Bible Online

Romekai 11 - Mousgoum bible

Romekai 11

¹Nɵa mu zilba sa ɓa: Alaw a hiniɗi ɗaini ɗa edi mak ɗi? Zaw kai zaŋ. Buri ɓa ta mal, mu ɗif na Izrayel, Mu pinzibani Abraham, war vokni Benyamin lai.

²Alaw a hiniɗi ɗaini edi kai, pinziba n’a viriɗisi haa avur par ɗa. War ɗû hlai zamai a na, na woni Eliyas a ɗuula midiɗi aliɗi Izrayel? Ki siɗiŋ ɵa kai ɗi? A muɗa maini nɵa:

³Epiɗ-ɗai, nagai e fiɗiɗi ɗaiku na min Alaw edi kafa, e hiɗi gûwiŋ zi ɓaka ɗa azumai, mu hina ɗa mu ta pal, e firyi e fiɗiŋa edi lai.

⁴Alaw a wiyini seŋ ɓa maɵa ɗa? A muɗa: M'aŋ gaiɗi maɵagai dubu muguzak n’e hûrgi kurnaiɗi azumai wuzani alaw Baal duk kai.

⁵Nɵa lai, war mefeŋ na girna ɗa, piɗi amai a na agwi, pin viri n’Alaw a viriɗi pin yumni ɗa.

⁶Na ɓa a za pin yum ɗa, a na burini sda kir kai, ɵa kai ɗa, yum ɗa a yum kir kai.

⁷Mu muɗumu maɵa ɗa? Wala na pinzibaɗi Izrayel e piyiŋ ɗa e niviŋ kai, e niviŋ e ɗi nagai n’Alaw a viriɗi edi ɗa, na zamai ɗa e bindi sirkiŋ.

⁸Maini n’aŋ gai ɗû nɵa: Alaw a hinasi seze zi kili weseŋ n’abai midiɗi, a siɗi arai n’a kiɗa a tala wala kai, gaini ɵime n’a ɵina wala kaalai, haa girna.

⁹David lai a muɗa: Hina simi n’azumai wuzaɗi a bunda aŋ azaw, aŋ agu, aŋ wala zi dibi azi, aŋ gir n’a za siɗi na gai futini lai.

¹⁰A zuva ɓa arɗi a, kapai e tili wala kai, Ku hiniɗi aŋ ɗiyi amai wuzaɗi gawɗi kir kai ɵa haa kureɗ.

¹¹Nɵa mu muɗa ɗa ɓa: Yudeyakai eziɗi a turma ɓa kapai e kɵi azumai ɵa gamai ɗi? Zaw kai! Amma pin kɵi n’azumai na wiiɗi, kûri a co siɗi pinziba na zamai ɗa lai. Kapai a riya sile na warɗi ɗa amai.

¹²Na ɓa meefeŋ na wiiɗi, a bunda aŋ wala zi der na wiiɗi ɗai na midiɗi yai, na wiiɗi ɗai na midiɗi yai ɗa, na ɓa kɵi na wiiɗi ɗa a der na wiiɗi pinziba na zamai ɗa lai ɗa, wiyi n’aga e wiyisi sin kûri gai hlaiɗi ɗa, aga a za aŋ wla n’abai a suwa hanɗa azi gama ɗa?

¹³Mu muɗa na ɗa siki tiki, na war pinziba na zamai ɗa, ta ɗa m’apostel na wiini piziba na zamai ɗa ɵa, mu kola sda n’aŋ ta ɗa lai.

¹⁴Kapai na ɓa a sɗa aŋ za ɗa, mu ɵiya sile na warɗi ɗai na war pinzibaɓa ɗa amai, kapai mu kora na zamai arbaɗi par agwi lai.

¹⁵Na ɓa hini n’Alaw a hiniɗi edi, a za aŋ tuyi na wiiɗi ɗai na yai gaini Alaw ɗa, yimi n’aga a yimiɗi sini pra ɗa, wala n’aga a za pini ɗa a ma lai ɗa? Zi mri mal maa aga e bindi karɗi kai ɗi?

¹⁶Nɵa na ɓa merfeŋni seyem ɗa a na sɗik, n’aga e hiɗiŋ asakal zaw ɗa aga a za sɗik lai, na ɓa sirdaini luwuŋ a na sɗik ɗa, tin luwuŋ ɗa a na ɵa lai.

¹⁷Aliɗi Izrayel e ɗa maini luwuŋ olive n’e pin gai pi, n’e ɗûkli tini zamai edi yaw nɵa, amma tuku ɗa, ku na maini tin luwuŋ olive n’edi buza, e duɓukuku sini tin luwuŋ gai diɓiki, na ɓa ku na za sda gaini sirdai, ku na nava siyem sini luwuŋ olive par lai ɗa,

¹⁸nɵa ku kola suku midini tin luwuŋ kai, na ɓa ku na kola suku ɗa, aga ku wula muduku kai ɓa sirdai n’aŋ puku ɗa a wiiku tuku kai, ku ɗiya na ɗa midini sirdai hanɗa.

¹⁹Nɵa aga ku muɗa kai ɓa: E ɗuli tin luwuŋ edi ɓa kapai e diɓikiŋa ta war balamni.

²⁰A futini, tini luwuŋ hanɗa, a ɗukla edi burini yimi kai na wiiɗi, tuku ɗe ku duɓuka woni ɗa burini yimi na wiiku lai. Ku kola suku buri hanɗa kai, amma ku huna.

²¹Buri ɓa, na ɓa Alaw a hina tin luwuŋ na daaba ɗa kai, a ɗuklaŋ edi ɗa, ku za hangal, ɵa kai ɗa, aga a hinuku kai, a ɗukluku edi ɵa lai.

²²Nɵa ɗa, ku tika hangalku sini pɗem gaini suwar na wiini Alaw, suwar siɗi nagai n’e kɵi azumai, pɗem na wiini Alaw suku tuku lai, na ɓa ku hina li war pɗem hanɗa, ɵa kai ɗa, tuku lai aga e ɗukluku edi.

²³Nagai nɵa lai, na ɓa e hini war yimi kai na wiiɗi ɵa ca kai ɗa, aga e diɓiki amai lai, buri Alaw spakni a na aŋ wiyiɗisi amai katawai par.

²⁴Buri ɓa, na ɓa tuku na kadai tiɓ e ɗuklukusi tin luwuŋ olive na buza par, e duɓukuku amai tin luwuŋ olive zi pi na ɗa gai diɓiki gdaŋ gdaŋ, kadai tiɓ a za ɵa kai, azi gama ɗa na ɓa a waya li aŋ ɗiɓikiɗi nagai mal, amai tin luwuŋ olive, n’a ɗukliɗisi edi tini par ɗa, a siɗa aŋ za kai ɗi?

²⁵Buri nɵa, tawalakaya, mu firya ɓa aga ki simni war siɗi kai ɗa kai burini wala zi ŋoyai, buri ki tili siki aŋ ɗai a yalakai gara kai, galɗi aliɗi Izrayel zamai e bindi sirkiŋ ɗa ɓa kapai abaiɗi pinziba na zamai ɗa a niyasi amlai.

²⁶Asakal hanɗa par, Izrayel gaini abaiɗi paŋ aga e kûri, maini n’aŋ gaini ɗû nɵa: n’a bla baŋa aga a halasi edi war Siyon par, aga a meefeŋ na wiiɗi pinzibani Yakob ɗa edi.

²⁷Hanɗa a bonu n’aga mu zaŋ gaiɗi, won hlai na mu haza tuwurɗi li edi ɗa.

²⁸War gal na wiini labar na pɗem ɗa, nagai e ɗi gaw na wiini Alaw buriki tiki, amma war gal na wiini viri na wiini Alaw ɗa, nagai e ɗi zi diri gara buriɗi tiyakaiɗi.

²⁹Buri ɓa like zi yum, gaini yiki na wiini Alaw ɗa a kiɗa aŋ bunda kai.

³⁰Buri ɓa tiki ki ɗi ka nɵa lai, aɗipar ɗa, ki diri ki yimi pin Alaw kai, amma tiyana ɗa, pin yimi kai na wiiɗi ɗa, tiki ki nivi yum.

³¹Tiyana ɗa, nagai lai e diri e yimi kai, burini yum na tiki ki ɗa warni, kapai nagai e kiɗi e nivi yum tiyana.

³²Buri Alaw a tipiɗi ɗai murɗakai paŋ amai war yimi kai na wiiɗi, kapai a za yum siɗi paŋ.

³³Alaw ɗa abai gara, yelni gaini siɗini ɗa hulum gara lai, sariyani ɗa, ɗif a kiɗa a sɗa futini kai, wala n’a firya a zaŋ ɗa, ɗif a sɗa ezini kai.

³⁴Maini na ɗû a muɗaŋ ɗa nɵa: N'a sɗa hiinini Epiɗ-ɗai ɗa asiya ɗa? Zaw, ɗif n’a siŋkini ka yel ɗa asiya ɗa?

³⁵Zaw ɗif n’a sini ka wala avut ta, kapai ni a virgiŋni asakal par ɗa asiya ɗa?

³⁶Wazagai paŋ a za sini ni par, gaini ni, a wiini ni lai. Kol a wiini haa hlai n’a vada kai. Amen.