Read Mousgoum Romekai 12 Bible Online

Romekai 12 - Mousgoum bible

Romekai 12

¹Tawalakaya, mu siiwiki, pin pɗem na wiini Alaw, aŋ si siki edi maini ɓaka na karni, na sɗik, n’Alaw a firyaŋ ɗa nɵa, hanɗa a sdaki na ki ziŋ, na kata pin ɗû ɗa.

²Aga ki zi siki maiɗi ɗai na warɗi yai hanɗa nɵa kai, amma aga ki bindi bindi na hehe, na wiini hiiniki, kapai ki siɗi dirini Alaw a na maɵa ɗa: Wala n’a na pɗem, n’a daraŋ, na gaini vi amai war pɗem lai.

³Pin yum n’a sasi sa, mu dara mu muɗa sini asiya asiya ɗi paŋ arbaki, buri aga a tala sini ɓa a suwa ɗai paŋ kai, amma a paya gaini hangal, asiya asiya ɗi paŋ pin kiɗini yimi n’Alaw a saŋ sini.

⁴Buri maini n’ali-tini-si na war si ktai a na viya nɵa, amma ali-tini-si paŋ ɗa sdani kal kal kai.

⁵Nɵa lai, tumu na mu ɗumu viya hanɗa, mu ɗumu si ktai war Kristu, tumu paŋ mu ɗumu ali-tini-siɗi marmu.

⁶Amma like zi yum a na kiini kiini, pin yum n’a sa sumu ɗa, na ɓa a like zi miɗi seŋ na wuze edi ɗa, a zuva ɓa a kata pin yimi ɗa;

⁷na ɓa a zi ɵeŋ ɗa, a za ɵeŋ ni ɗa, ni n’a hitra ɗa, a ɗiya min hitraini ɗa;

⁸n’a sa arai zi pi ɗa, a sa arai zi pi na wiini ɗa, ni n’a sa tini edi ɗa, a zaŋ gaiɗi agul zi melke, ni n’a ɵa wuze ɗa, a zaŋ kokolai tar tar, ni n’a za yum ɗa, a zaŋ gaini firyi lai.

⁹A zuva ɓa diri ɗa a za gaini rhai kai, yimi meefeŋ ɗa aŋ wala na hi-hir, ki rgi siki amai sini wazagai na pɗamai.

¹⁰Burini diri zi tawala ɗa, diri marki arbaɗi marki, ɗif paŋ a baiya kai aŋ kola midini maini amai.

¹¹Ki zi faalai war sdani Epiɗ-ɗai kai, amma ki ziŋ kokolai, kokolai, ki siiki war seze, ki zi ɵeŋni Epiɗ-ɗai maiɗi bagakai nɵa.

¹²War biyi na pin-ɵeɗ ɗa, ki simni gaini firiyi, war gir ɗa, yimiŋ siki, war siiwa ɗa, ki hini hlai a ɓa edi kai.

¹³Ki zini piɗi ɗaini Kristu, na suwai te sûwiɗi ɗa, ɗai n’e hiliɗi li ahaki paŋ ki yimiɗi siki pɗem.

¹⁴Ki ɓikiɗi nagai n’e ziki gir, ki ɓiki, ki tûûsi kai.

¹⁵Firyi gaiɗi nagai n’e firyi ɗa, ki tuwi gaiɗi nagai n’e tuwi ɗa lai.

¹⁶Ki hini hiiniki a tapa ktai, ki hini kûlûni-si a niya warki kai, ki tiɓi pin wazagai zi zi n’abakai ɗa kai, ki zi siki aŋ ɗai na yalakai gara kai.

¹⁷Ki wiyi meefeŋ midini meefeŋ sin ɗif kai, ki zi wazagai na pɗamai arɗi ɗai paŋ.

¹⁸Na ɓa hanɗa a sɗa aŋ za, sini kiɗiki tiki par lai, aga ki simni ɵeɗ gaiɗi ɗai paŋ.

¹⁹Tiki zi diri gara, ki wiyi meefeŋ na ɗif a zaŋ siki gaini miɗiki dama kai, amma ki hini hiy na wiini Alaw a za hanɗa, buri aŋ gaini ɗû main nɵa: Vrakni meefeŋ, mu vurgaŋ mu ta, aga mu sa sini asiya ɗi paŋ vrak na pin sdani. A muɗaŋ a Epiɗ-ɗai.

²⁰Amma won hlai na gawku aŋ gaiɗi wiyamai ɗa, sini simi, na ɓa aŋ gaiɗi sai ɗa sini wala zi ci, buri ɓa, won hlai na ku na za sini mai hanɗa ɵa ɗa, ku tipini amai midini na ɗa a morjoni afu.

²¹Ku hina meefeŋ a rɗa amai muduku kai, amma gaini pɗem, rɗa amai midini na meefeŋ.