Read Mousgoum Romekai 14 Bible Online

Romekai 14 - Mousgoum bible

Romekai 14

¹Na hurafai war yimi ɗa ki yimiɗi siki, ki tiki pini hiiniɗi ɗa kai.

²Ɗif zamai ɗa, pin yimini a kiɗa a suma wazagai paŋ, amma na zamai na huruf ɗa a suma ɗa sai a mama.

³Ni n’a na suma ɗa, aga a miisa ni n’a suma kai ɗa kai, ni n’a na suma kai ɗa a ɗûkliti sariya midini ni n’a na suma ɗa kaalai, buri Alaw a yimaŋ sini mai hanɗa ɵa.

⁴Tuku ku siya ɗa, na kapai ku ɗûkliti sariya midini begeni maiku ɗa? Na ɓa a kiɗa a ɗiya pɗem war sdani, a kiɗa kai ɗi ɗa, a seŋni gaini epin-gezani. Aga a ɗiya pɗem ya lai, buri Epiɗ-ɗai spakni a na buri a ɗiyaŋ gdaŋ.

⁵Ɗif zamai ɗa, a tala meefeŋ na zamai ɗa a suwa marni, ɗif zamai ɗa a talaŋ ɓa a na kal kal. Asiya ɗi paŋ aga a sɗa edi gaglai ɓa wala n’a na hiinaŋ ɗa a pɗem.

⁶Ni n’a na za ɓraw arbani mefeŋ ɗa, a zaŋ burini Epiɗ-ɗai. Ni n’a na suma ɗa, a suma burini Epiɗ-ɗai, buri ɓ'a na sa tese sin Alaw. Ni n’a suma wala kai ɗa ɗi, a suma wala kai na ɗa burini Epiɗ-ɗai, a sa tese sin Alaw buri hanɗa lai

⁷Buri ɓa, ktai n’a sumna karni gaini midini dama aŋ kai, ktai n’a mra gaini midini dama aŋ kaalai.

⁸Na ɓa mu ɗumu karmu, mu ɗumu karmu burini Epiɗ-ɗai, na ɓa mu mrumu, mu mrumu burini Epiɗ-ɗai lai. Nɵa ɗa, koo ɓa mu ɗumu karmu, koo ɓa mu mrumu ɗi ɗa, mu ɗumu wiini Epiɗ-ɗai.

⁹Na ɓa Kristu a mra, waya a ɵiya amai lai ɗa, a za hanɗa ɓa kapai a bunda aŋ Epiɗ-ɗai na wiiɗi zi mri gaiɗi na karɗi lai.

¹⁰Na ɓa ɵa ɗa, tuku ɗa, ku ɗûkliti sariya midini tawalku buri ma ɗa? Buri ɓa tumu paŋ aga mu ɗiyumu wuzaɗi Paramai zi pai na wiini Alaw.

¹¹Buri aŋ gaini ɗû maini nɵa: Epiɗ-ɗai a ha wala mini a muɗa: Gaya ta jaŋ, kurnai paŋ aga a hurga azumai wuza, Meme paŋ aga a sɗa Alaw lai.

¹²Buri nɵa asiya asiya ɗi paŋ aga a muɗa edi midini sdani n’a zaŋ ɗa wuzani Alaw gaini mini.

¹³Mu ɗuklumu sariya midiɗi marmu kai, marya ki hiini pɗem, kapai ki tiki wala zi dibi azi wuzani tawal kai, ki tiki wala n’a ka tawal war meefeŋ wuzani kaalai.

¹⁴Ta mu sɗa edi gaglai, mu yima ɓa a na ɵa lai, war Epiɗ-ɗai Yesu ɗa, wala ktai na hi-hir aŋ kai, amma na ɓa ɗif yima wala li arni aŋ hi-hir ɗa, wala ni ɗa a hi-hir burini lai.

¹⁵Na ɓa burini simi, tawalku a kwima ɗa, ku za na ɗa war diri kir kai, aga ku ɓa ni na Kristu a mra burini ɗa edi, pin walaku zi simi ɗa kai.

¹⁶Nɵa ɗa, hina ɗif a miisa wala n’a na pɗem buriki ɗa kai.

¹⁷Buri ɓa pai n’Alaw ɗa a simi gaini ci ɗa kai, amma jre-ɗikat gaini ɵeɗ, gaini firyi lai. Hanɗa a na sini seze sɗik par.

¹⁸Buri ni na war wazagai hanɗa paŋ a za ɵeŋni Kristu maini bege nɵa ɗa, Alaw a daraŋ gara lai, ɗai e firyiŋ lai.

¹⁹Nɵa, piyumu ɗa a sda n’a kasi ɵeɗ, n’a zina piɗi na zamai war wili n’amai lai.

²⁰Ku tuura sdani Alaw edi gaini wala zi simi ɗa kai, wazagai paŋ a hilu, a futini, amma na ɓa ku bunda walaku zi simi aŋ wala zi dibi azi ɗa a wala na pɗem kir kai.

²¹A pɗem ɓa ku luma neŋ kai, ku ca vin kai, ku ɗala suku burini wala paŋ n’a na burini tawalku aŋ wala zi dibi azi ɗa.

²²Yimiku n’a na ɗa, giɗimaŋ aŋ wiiku wuzani Alaw. Sleɗ aŋ midini ni n’a fufuka sini kiini ɗa, a tala wala na meefeŋ war sini kai ɗa.

²³Amma ni n’a ɗa, won hlai n’a suma li ɗa, sariya aga te yimaŋ, buri ɓa wala n’a zaŋ ɗa, a na gaini yimi kai. Wala paŋ n’a za gaini yimi kai ɗa a tuwur.