Read Mousgoum Romekai 15 Bible Online

Romekai 15 - Mousgoum bible

Romekai 15

¹Na ɓa mu ɗumu gdaŋai ɗa, mu lubumu huruf na wiiɗi nagai na horafai ɗa, aga mu zumu a wala n’a sumu firiyi wiimu tumu dama kai.

²Asiya asiya paŋ aga a za wala n’a sini firyi wiini maini burini pɗem gaini rgi n’amai na wiini vok.

³Buri ɓa Kristu a paya ɗa a wala n’a sini firyi wiini Ni dama kai, maini n’aŋ gaini ɗû nɵa: Tirki na wiiɗi nagai n’e tirkuku ɗa a kɵa mada.

⁴Buri wazagai paŋ n’a ɗosi avut par ɗa, a ɗosi buri a hitrumu, kapai mu sumnumu war biyi-na-pin-ɵeɗ, war siiki gaini arai zi pi lai.

⁵A zuva ɓa Alaw n’a sa biyi-na -pin-ɵeɗ gaini arai zi pi ɗa, a hina hiiniki a tapa ktai war Yesu Kristu.

⁶Kapai ki kûli Alaw gaini Epini Epiɗ-ɗaimu Yesu Kristu, war hiini ktai, war wule ktai.

⁷Nɵa lai, ki yimi marki siki arbaɗi marki, maini na Kristu gaini midini dama a yimiki sini nɵa, buriɗi abai na pɗem na wiini Alaw.

⁸Buri mu miɗiki, Kristu a bunda aŋ ɵeŋ na wiiɗi Yudeyakai burini jre-ɗikat na wiini Alaw, kapai a va ɵinini-ha n’a ziŋɗi wiiɗi tamaiɗi ɗa amai.

⁹Amma pinziba na zamai ɗa a sa kol sini Alaw burini yum na wiini, maini n’aŋ gaini ɗû nɵa: Buri hanɗa aga mu suku kol arbaɗi pinzibaɗi ɗi, aga mu kola yikuku gaini yama lai.

¹⁰A muɗa pra: Tiki pinziba na zamai, ki firyi gaini pinziba na wiini lai,

¹¹Zamai pra ɓa: Kûli Epiɗ-ɗai, tiki pinziba na zamai ɗa paŋ A zuva ɓa ɗai paŋ e kûliŋ!

¹²Esaya a muɗa pra: Sirdaini Yese ktai aga a halasi, aga a fakasi amai aŋ ɓa midini pinziba na zamai ɗa, pinziba na zamai ɗa aga e biyi pin ɵeɗ pin Ni.

¹³Alaw n’a sa biyi na pin ɵeɗ, a viki gaini firiyi gaini ɵeɗ lai war yimi, kapai biyi na pin ɵeɗ na wiiki a riya amai war spak na wiini seze sɗik.

¹⁴Tawalakaya tiki ɗa, ta mal mu sɗa ɓa, ki ɗa gaini vi gaini pɗem, gaini siɗi, ki kiɗi aŋ gidi marki arbaɗi marki lai.

¹⁵Amma gaini hanɗa paŋ war gal zamai ɗa, mu ɗoɗi siki gaini miɗi na gdaŋ aŋ ɵiya hiiniki amai, pin yum n’Alaw a saŋ sa.

¹⁶Kapai mu za aŋ ɵeŋ na wiini Yesu Kristu, sini pinziba na zamai, kapai mu za sda na sɗik na wiini labar na pɗem na wiini Alaw, n gaini zi edi sɗik gaini Seze sɗik.

¹⁷Mu kiɗa mu kola sa war Yesu Kristu, buri sda a wiini Alaw.

¹⁸Aga mu yika wala ktai, na Epiɗ-ɗai a vaŋ amai, kapai Yudeyakai e wiyisi sini ɵinini Gat gaya kai war ma kai: War seŋ, war sda lai.

¹⁹War wazagai zi siŋki zi spak, gaini hiila, war spakni seze na wiini Alaw lai. Buri nɵa, war Yeruzalem par haa war Iliriya, mu ɓka labar na pɗem na wiini Kristu war hlai paŋ.

²⁰Hlai na yikiɗi Kristu a ga warni kai hai ɗa, mu ɓaka labar abai paŋ warni, kapai mu rga amai midini ezini dalam zi tûri na wiini ɗif zamai kai.

²¹Amma maini n’aŋ gai ɗû nɵa: nagai na seŋ a ɓaka siɗi kai ɗa aga e tili, nagai n’e ɵini ka seŋ hanɗa kai ɗa aga e ɵiniŋ lai.

²²Azi viya, mu firya mu halaɗi aŋ tiliki, amma mu nava futi kai.

²³Amma tiyana ɗa, hlai zamai na mu za sda warni, war hlai hanɗa aŋ kir kai. Buza viya, agula te ɵima buri mu halaɗi mu tiliki.

²⁴Won hlai na mu halaɗi li war Espaniya sek ɗa, aga mu tiliki ta ɓa, mu nava zinai tiki par agwi buriɗi morkoiŋa lai, amma wuzani hanɗa, firyiŋa n’abai paŋ ɗa, a simniŋa na gaiki buri mefeŋ yaw ɗa.

²⁵Tiyana ɗa, mu na hala amai a Yeruzalem, aŋ ka zinai na wiiɗi ɗai na wiini Alaw ɗa.

²⁶Buri ɗai na Makedoniya gaiɗi ɗai na Akaiya e tipisi likeɗi buri e zini piɗi na horafai n’arbaɗi ɗai na wiini Alaw, na war Yeruzalem.

²⁷E hiiniŋ ɵa, e firyi e ziŋ mai hanɗa ɵa lai. Buri ɓa, na ɓa pinziba na zamai ɗa e nivi bri na wiiɗi war der na war seze na wiiɗi Yudeyakai par ɗa, nɵa aga e zini piɗi gaini wazagai n’e giɗimi siɗi gaini lai.

²⁸Won hlai na mu vadaɗi li, mu kiɗi wazagai na ɗai e tipiŋɗi li paŋ ɗa, aga mu halaɗi war Espaniya, mu vugaɗi siki ɗaw.

²⁹Mu sɗa ɓa won hlai na mu halaɗi li aŋ tiliki ɗa, mu halaɗi na ɗa gaini ɓiki n’abai na wiini Kristu.

³⁰Nɵa ɗa tawalakaya, mu siiwiki war yikini Epiɗ-ɗai Yesu Kristu, war diri na war seze lai, aŋ tipi gaya war hatam, ki siiwi Alaw buriya.

³¹Kapai mu nava pli n’edi tiɗi ɗai na Yudeya n’e diri e yimi kai ɗa par, kapai ɗai na wiini Alaw na war Yeruzalem ɗa e yimi zinai hanɗa gaini firyi.

³²Asakal hanɗa par ɗa, aga mu halaɗi mu tiliki gaini firiyi, na ɓa Alaw a dara ɗa, aga mu sumna gaiki, sa amla agwi lai.

³³Alaw na wiini ɵeɗ a sumna gaiki paŋ. Amen.