Read Mousgoum Romekai 16 Bible Online

Romekai 16 - Mousgoum bible

Romekai 16

¹Mu ɵinitikiɗi Fobe, tawalmu na muni, na t'aŋ war sda zi ɵeŋ na war tipi na war Kenkreya.

²Ki yimiti siki gaini futini war Epiɗ-ɗai, maini n’a zuva siɗi ɗai na wiini Alaw nɵa. Wala paŋ n’a sûwiti li, na te firya zinai tiki par warni ɗa, ki zini piɗi warni, buri ɓa na te zina piɗi ɗai viya, ta lai paŋ.

³Ki ɵiɓi wuti wiiɗi Priskila gaini Akilas, mara zi sda na war Yesu Kristu,

⁴nagai e firyi ɓa suŋfaɗi a ba wiini, kapai na wiya a kora. Mu ziɗi tese na ɗa mu ta ktai kai, tipi n’arbaɗi pinziba na zamai ɗa e ɗa ziɗi tese lai.

⁵Ki ɵiɓiɗi wuti wiiɗi tipi n’e ɗa aha war dalamɗi lai. Ki ɵiɓini wuti wiini Epainetus, marmaya zi diri gara, ni n’a merfeŋni seyem n’avut na wiini Kristu war Aziya.

⁶Ki ɵiɓiɗi wuti wiiɗi Mariya, na te za sda buriki viya gara.

⁷Ki ɵiɓini wuti wiini Andronikus, gaini Yuniyas, na zagalakaiya, mara na war daŋgai lai. Apostelai e diriɗi gara, e yimi war Kristu ɗa maa wuza ta par.

⁸Mu ɵiɓini wuti wiini Ampliyatus, marmaya zi diri gara war Epiɗ-ɗai.

⁹Ki ɵiɓini wuti wiini Urbanus gaini Stakus, marmaya zi diri gara lai.

¹⁰Ki ɵiɓini wuti wiini Apeles, n’a siŋka edi arɗi ɗai ɓa ni a ɗifni Kristu fakat fakat. Ki ɵiɓiɗi wuti wiiɗi naai n’e ɗa war dalamni Aristabulus.

¹¹Ki ɵiɓini wuti wiini Herodiyon, na zigela, ki ɵiɓiɗi wuti wiiɗi nagai n’ahani Narsis, n’e ɗa war Epiɗ-ɗai ɗa.

¹²Ki ɵiɓini wuti wiini Trifene gaini Trifoze, e zi sda viya gara war Epiɗ-ɗai, ki ɵiɓiɗi wuti wiiɗi Perside, marmaya na muni zi diri gara, te za sda viya gara war Epiɗ-ɗai.

¹³ki ɵiɓini wuti wiini Rufus, ni n’a zi viri na wiini Epiɗ-ɗai, gaiɗi emini na t'ama lai.

¹⁴Ki ɵiɓini wuti wiini Asinkritus, Flegon, Hermes gaini Patrobas, gaini Hermas gaiɗi tawalakaiɗi n’e ɗa gaiɗi lai.

¹⁵Ki ɵiɓini wuti wiini Filologus gaiɗi Juliya, Nere gaiɗi tawalni, Olimpas gaiɗi ɗai na wiini Alaw n’e ɗa gaiɗi lai.

¹⁶Ki ɵiɓi wuti wiiɗi marki, ki gubi marki war hiini na sɗik, tipi na wiini Kristu ɗa paŋ e ɗa ɵiɓiki wuti.

¹⁷Tawalakai, mu siiwiki, ki zi hangal gaiɗi nagai n’e kisi ɓraw, gaini kɵi n’azumai arbaɗi ɗai, n’a kata gaini hitri na ki niviŋ ɗa kai, ki yimi siki edi siɗi par.

¹⁸Buri ɓa ɗai na mai hanɗa ɵa, e ɗi ɗaini Kristu, Epiɗ-ɗai na wiimu kai, amma e zi na ɗa a ɵeŋ na wiini warɗi, gaini seŋɗi na pɗamai, gaini miɗiɗi na jibet gara lai ɗa, e wûliɗi ɗai na gaini niyi kai ɗa edi.

¹⁹Amma tiki ɗa, ɗai paŋ e siɗi ɓa ki ɗi ɗai na ki ɵini Gat gara, nɵa mu firya buriki gara, amma mu firya ɓa ki zi aŋ ɗai na yalakai, war sda na pɗamai, hilu sini wazagai na maafanai nɵa.

²⁰Alaw na wiini ɵeɗ, a ŋa gobi aŋ kirpa satan azumai pin eziki. Yum na wiini Epiɗ-ɗaimu Yesu Kristu a sumna gaiki.

²¹Timotewus, maya na war sda a na ɵiɓiki wuti, gaini Lusiyus, Yason, gaini Sosipater, na zagalakaiya lai e ɵiɓiki wuti.

²²Ta, Tertiyus, na mu ɗuti letre hanɗa, mu na ɵiɓiki wuti war Epiɗ-ɗai.

²³Gayus, na mu sumna aha gaini, n’a yimiŋ tipi paŋ aha gaini lai ɗa, a na ɵiɓiki wuti. Eraste, ɗif n’a giɗima farai na war fuŋ n’abai hanɗa paŋ a na ɵiɓiki wuti gaini Kartus na tawalni lai. [

²⁵Sin ni na spak aŋ war tini, buri a bindiki gdaŋai pin labar na pɗem gaini ɓikini seŋ na wiya, na midini Yesu Kristu, aŋ kata gaini wala zi ŋoyai, n’a naka gaini ŋûyi cok, haa war pi zi tiki par, n’a na siŋkasi sini edi na ɗa nɵa,

²⁶amma a siŋkasi edi gaglai tiyana war ɗû na wiiɗi ɗai na min Alaw, pin miɗi na wiini Alaw n’a vada kai, n’a siŋkasi edi arɗi ɗai paŋ, kapai ɗai paŋ e yimi, e gidi lai.

²⁷Kol sin Alaw na ktai, zi yel hanɗa, war Yesu Kristu haa hlai n’a vada kai. Amen