Read Mousgoum Romekai 2 Bible Online

Romekai 2 - Mousgoum bible

Romekai 2

¹Nɵa ɗa, ku kiɗa ku mula edi mini seŋ par kai, tuku na ku ɗûkliti sariya ɗa, koo ɓa k’asiya ɗi. Buri won hlai na ku ɗûkliti sariya midini maiku ɗa, ku rga na ɗa a suku dama, buri tuku na ku ɗûkliti sariya na ɗa, ku na za wazagai ni ɗa lai.

²Mu suɗumu ɓa sariya n’Alaw a ziti wiiɗi nagai n’e zi wazagai mai hanɗa ɵa ɗa, te za na ɗa war jre.

³Nɵa ɗa, tuku na ku ɗûkliti sariya midiɗi nagai n’e zi wazagai mai hanɗa ɵa ɗa, zaw na tuku dama ku na zaŋ lai ɗa, ku hiina ɓa aga ku mula edi miɗi sariya na wiini Alaw par ɗi?

⁴Zaw abaini pɗemni Alaw, gaini hangalni gaini ziyini seŋni lai, ku yimaŋ aŋ wala kadai, ku sɗa pɗem na wiini Alaw a kuku sini bindi na gamai kai ɗi?

⁵Amma pin hriŋ na wiiku, pin agulku n’a dara a bunda kai ɗa, ku tapasi muduku na ɗa a hiy n’abai war mefeŋ zi hiy gaiɗi sariya na jre na wiini Alaw

⁶Ni n’aga a sa sin asiya asiya paŋ pin sdani sdani:

⁷suŋfa n’a vada kai, wiiɗi nagai n’e piyiti abai, gaini kol gaini wala n’a sɗa aŋ vada edi kai, war siiki na wiiɗi war sda na pɗem;

⁸Amma nagai na pin diri n wiiɗi e bili edi sin jre, e zi pin jre-ɗikat kai ɗa, a siɗi ɗa a hiy gaini suwar.

⁹Gir gaini hunai wiini ɗif paŋ n’a za meefeŋ, na Yudeya avut, asakal par na Grek ɗa lai.

¹⁰Abai gaini kol gaini ɵeɗ wiini asiya ɗi paŋ n’a za pɗem, wiini ɗif na Yudeya avut, asakal par wiini na Grek ɗa lai.

¹¹Alaw a ɓuruwa arɗi ɗai kai.

¹²Nagai paŋ n’e zi tuwur, won hlai n’e siɗi seŋ zi gadai kai ɗa, nagai aga e bi edi gaini seŋ zi gadai kaalai; nagai paŋ n’e zi tuwur, won hlai n’e siɗi seŋ zi gadai ya ɗa, sariya aga te ɗukla midiɗi pin seŋ zi gadai ɗa lai.

¹³Buri aga e pɵi aŋ jrekai wuzani arni Alaw, e ɗi nagai n’e ɗa ɵini seŋ zi gadai kadai ɗa kai, amma e ɗi ngai n’e zi pin seŋ zi gadai ɗa.

¹⁴Won hlai na pinziba na zamai na gadai na wiiɗi aŋ kai e zi wala na gadai a muɗa midini ɗa kiiɗi, nagai ɗa gadai na wiiɗi aŋ kai sme, amma e bindi aŋ seŋ zi gadai burini siɗi dama.

¹⁵E siŋki edi ɓa sdani seŋ zi gadai ɗa aŋ gai ɗû war agulɗi, hiiniɗi a za zaida nɵa lai, yelɗi nɵa lai. Hiiniɗi gaini yelɗi ɗa, hlai zamai a pa seŋ midiɗi, hlai zamai a siŋkiɗi ɓa meefeŋɗi aŋ kaalai.

¹⁶--Hanɗa aga a za war mefeŋ n’Alaw aga a ɗûkliti sariya gaini Yesu Kristu midini wazagai zi ŋoyai n’aŋ warɗi ɗai, pin labar na pɗem na mu ɓakaŋ ɗa.

¹⁷Tuku na ku yika suku ɓa na Yudeya, na ku piɵa midini seŋ zi gadai, na ku kola suku gaini Alaw lai,

¹⁸tuku na ku sda dirini Alaw ya, na pin gdai a ku hitraŋ ɗa, ku sɗa aŋ za ɓraw arbani wazagai pɗamai gaini na maafanai,

¹⁹tuku na ku sɗa suku ɓa ku ɗif na ku ɵa wuzaɗi na malvanai, ku gaglai na wiiɗi nagai n’e ɗa war gegeŋ ɗa,

²⁰ku ɗif zi hitri n’a kiɗa aŋ hitriɗi n’agogoi, buri ɓa wala n’e yikiŋ ɓa siɗi gaini jre n’aŋ war gadai ɗa, aŋ muduku.

²¹-Tuku na ku hitiriɗi marku na zamai na ɗa, ku hitira suku dama lai kai ɗi? Tuku na ku ɓaka seŋ ɓa ɗif hala wala kai, tuku ku hiila wala ɗi?

²²Tuku na ku muɗa ɓa, ɗif a za maɵara kai, tuku ku za maɵara ɗi? Tuku na alawai zi rgi a tala arku hi-hir, ku hilasi wazagai na warni tempel na wiini par lai ɗi?

²³Tuku na ku kola suku gaini seŋ zi gadai, tuku ku kasi miisi sin yikini Alaw gaini hiku n’amai midini gadai ɗa lai ɗi?

²⁴Buri ɓa ɗai e miɗi meefeŋ sin yikini Alaw arbaɗi pinziba ɗai na ɗa buriki tiki, maini n’a ɗosi ɗa nɵa.

²⁵A jre, ɵini-gurgle a wala na pɗem, na ɓa ku za pin seŋ zi gadai ɗa, amma na ɓa ku ɗif n’a ha amai midini gadai ɗa, ɵini-gurgle na wiiku a bunda aŋ ɵini-gurgle kai.

²⁶Na ɓa ɗif n’a ɵa gurgle kai ɗa, a za pin wazaai na gadai a muɗa midini ɗa, ɵini-gurgle kai na wiini ɗa aga a pɵa aŋ ɵini-gurgle. Nɵa kai ɗi?

²⁷Ɗif na war wiini su a ɵa gurgle-kai, n’a na za pini gadai ɗa, aga a ɗûkliti sariya muduku tuku na gadai zi ɗû aŋ war tuku, na ku ɵa gurgle ya lai, amma ku na ha amai midini gadai ɗa kai ɗi?

²⁸Wala n’a zuku aŋ ɗif na Yudeya jre, jre ɗa a suku n’e tiliŋ anene par ɗa kai, ɵini-gurgle na jre ɗa a pi zi ɗûkli edi ɗa kai.

²⁹Ɗif na Yudeya na jre ɗa, a ni n’a na amlai warɗi agul, ɵini-gurgle hanɗa a na pin gadai ɗa kai, amma pin seze. Ɗif hanɗa kol na wiini a na siɗi ɗai par kai, amma sini Alaw par.