Read Mousgoum Romekai 3 Bible Online

Romekai 3 - Mousgoum bible

Romekai 3

¹Nɵa ɗif na Yudeya ɗa a sûwiɗi ɗai na zamai ɗa gaini a ma ɗa? Zaw ɵini-gurgle ɗa pɗemni tiɓ ɗa a ma ɗa?

²Burini suwai ɗa, e suwi ɵa: Seŋ na wiini Alaw a sasi avut ɗa siɗi nagai.

³Na ɓa ɵa maɵa kiɗi? Nɵa a ɓa zamai e yimi kai ɗa, yimi-kai na wiiɗi nagai ɗa, a kiɗa a bunda yimi na war Alaw aŋ wala kadai ɗi?

⁴Duk kai zaŋ, amma hanɗa a siŋka edi ɓa: Alaw a jre, ɗif murɗek paŋ ɗa a z'eles, maini n’aŋ gaini ɗû nɵa: kapai ku siŋka edi aŋ ɗif na jre war seŋku zi miɗi ku nava rɗi n’amai lai, won hlai n’e kuku wuzaɗi sariya.

⁵Na ɓa jre-ɗikat-kai na wiimu a siŋka jre-ɗikat na wiini Alaw edi ɗa, mu muɗumu zamai ɗa a ma ɗa? Alaw a jre-ɗikat-kai, won hlai n’a hinasi hiyni mudumu ɗi? Mu muɗaŋ maini na ɗai e miɗiŋ ɵa ɗa.

⁶Duk kai zaŋ, na ɓa ɵa ɗa, Alaw a siɗa aŋ ɗûkliti sariya midiɗi ɗai na warɗi yai maɵa maɵa ɗa?

⁷Na ɓa pin eles na wiya ɗa, jre na wiini Alaw a riya wuzani sek buriɗi abaini lai ɗa, ta ɗa e ɗûkliti sariya mada ɓa mu na tuwur katawai ɗa buri ma ɗa?

⁸Zamai e miisiyi, ɗai nagai ɗa a zuva ɓa sariya te ko midiɗi. E piyi seŋ midiyi ɓa mi miɗi ɓa: Zumo meefeŋ, kapai pɗem a halasi pin par. Na ɓa ɵa ɗa tiyi mi zi meefeŋ hanɗa kai buri ma maɗa?

⁹Nɵa tumu mu suuɗumu na zamai ɗa ɗi? War wazagai paŋ kaalai. Buri ɓa seŋ hanɗa a na burimu paŋ, ɓa: Ɗai gai hlaiɗi, Yudeyakai gaiɗi Grekka paŋ, e ɗa azumai pin tuwur.

¹⁰Maini n’aŋ gai ɗû nɵa: Ɗif na jre aŋ kai, ktai maa aŋ kai;

¹¹ɗif zi yel aŋ kai, ɗif n’a paiya Alaw aŋ kaalai.

¹²Nagai paŋ e wili edi warɗi futi par, e tirɗi edi piɗi marɗi paŋ. Ɗif n’a za pɗem aŋ kai, ktai maa aŋ kai.

¹³Gurɗokɗi a waŋ na gaini mili mal, gaiɗi alesiɗi e zi rhai, masnaw na wiiɗi maakai aŋ war miɗi.

¹⁴Miɗi a va gaini tusa gaini seŋ na ɗewek lai.

¹⁵Eziɗi kolek aŋ ma fel edi.

¹⁶Hlai n’e vigi li woni ɗaw ɗa a na ɗa a ɓilki-n’edi gaini gir.

¹⁷Futi zi ɵeɗ ɗa e siɗiŋ kai.

¹⁸Hunai na pin Alaw a na arɗi kaalai.

¹⁹Tumu mu suɗumo ya ɓa, wala paŋ na seŋ zi gadai a muɗa midini ɗa, a muɗaŋ na ɗa buriɗi nagai n’e ɗa pini gdai ɗa, kapai miɗi ɗai paŋ a, ɗi na warɗi yai gaini abaiɗi paŋ, kapai e siɗi siɗi aŋ ɗai na maafanai wuzani arni Alaw.

²⁰Buri ɓa wuzani arni ɗa, ktai n’aga a za sini edi aŋ jre pini sdani gadai ɗa aŋ kai, buri ɓa gaini seŋ zi gadai ɗa, ɗif a kiɗa aŋ sɗa tuwurni.

²¹Amma tiyana gaini gadai kai ɗa, jre-ɗikat na wiini Alaw, na seŋ zi gadai gaiɗi ɗai na min Alaw e miɗi midini ɗa, a siŋkasi edi ya.

²²Hanɗa a jre-ɗikat na wiini Alaw pin yimi na war Yesu Kristu, n’a na buriɗi nagai paŋ n’e yimi, buri ɓraw a na arbaɗi ɗai kai.

²³Buri ɓa ɗai paŋ e zi tuwur, e kiɗi e gi siɗi abai na wiini Alaw kai.

²⁴Amma e zi edi aŋ jre ɗa kadai, pin yum na wiini kadai, buri pili-n’edi na war Yesu Kristu,

²⁵Ni n’Alaw a varaŋ aŋ wala zi hizi tuwur edi, gaini felni gaini yimi, aŋ siŋka jreni edi, buri ɓa n’a vugasi aɗipar ɗa, a za gir wiiɗi ɗai pini kai.

²⁶Pin ziyini-seŋ na wiini na gaini hangal, Alaw a firya a siŋka jreni edi war mefeŋ na tiyana, kapai a siŋkiɗi edi ɓa a na jre, a bunda ni n’a yima war Yesu ɗa aŋ jre- lai.

²⁷Nɵa kûlûni-si na wiimu ɗa aŋ wata ɗa? Aŋ kir kai zaŋ. Pin gadai na wata ɗa? Pin na wiini sda ɗi? Zaw kai, amma pin gadai na wiini yimi.

²⁸Buri tumu mu yimumu ɓa, ɗif a za edi aŋ jre-ɗikat ɗa pin yimi, pin sdani gadai kai.

²⁹Zaw Alaw ɗa a Alaw na wiiɗi Yudeyakai kiiɗi ɗi? Ni a Alaw na wiiɗi pinzibaɗi ɗai na zamai ɗa lai kai ɗi? Nkam, a Alaw na wiiɗi pinziba na zamai ɗa lai.

³⁰Na ɓa a jre ɓa Alaw a na ktai ɗa, aga a bindiɗi nagai n’e ɵi gurgle ɗa aŋ jre ɗa pin yimi, a bindiɗi nai n’e ɵi gurgle kai ɗa pin yimi ɗa lai.

³¹Nɵa gaini yimi ɗa, mu bundumu gadai ɗa na ɗa aŋ wala kadai ɗi? Duk kai zaŋ! Amma gaini yimi mu suŋkumu edi na ɗa a pɗemni gadai ɗa mal.