Read Mousgoum Romekai 4 Bible Online

Romekai 4 - Mousgoum bible

Romekai 4

¹Nɵa aga mu muɗumu burini Abraham na tiymu na war neŋ-si ɗa a ma ɗa? A nava ɗa a ma ɗa?

²A nafa ɓa Abraham a za edi aŋ jre-ɗikat pin sda ɗa, a wala n’a kiɗa a kola sini burini, amma wuzani arni Alaw ɗa a na maini hanɗa ɵa kai.

³Kadai tiɓ ɗa, ɗû a muɗa maɵa ɗa? Abraham a yima pini Alaw, hanɗa a pɵa burini aŋ jre-ɗikat.

⁴Ɗif n’a za sda ɗa, vrakni a pɵa aŋ zinai kai, amma a wala zi dewele n’a siɗa aŋ sa sini.

⁵Amma ni n’a za wala ktai kai, amma a yima pin ni n’a bunda ɗif na tuwur edi aŋ jre-ɗikat ɗa, yimi na wiini ɗa a pɵa aŋ jre-ɗikat.

⁶Nɵa lai, David a na muɗa midini pɗem na wiini ɗif murɗek n’Alaw a pɵaŋ aŋ jre-ɗikat burini sdani kai ɗa maini nɵa:

⁷Sleɗ midiɗi nagai n’e nivi ni burini meefeŋɗi ya, na tuwurɗi a haza edi haz ɗa!

⁸Sleɗ midini ni n’EPIƊ-ƊAI a mula arni pini tuwurni kai ɗa!

⁹Pɗem hanɗa, a na buriɗi nagai n’e ɵi gurgle kiiɗi ɗi? Zaw a na buriɗi nagai n’e ɵi gurgle kai ɗa lai ɗi? Buri ɓa tumu mu muɗumu ɓa yimi na wiini Abraham ɗa a pɵa burini aŋ jre-ɗikat.

¹⁰Won hlai n’a pɵa burini aŋ jre-ɗikat na ɗa a nafu maɵa maɵa ɗa? A nafu ɗa a ɵa gurgle ya zaw a ɵa gurgle kai hai ɗi? A nafu ɗa a ɵa gurgle ya kai, amma a ɵa gurgle kai hai.

¹¹A nava ɵini-gurgle aŋ wala zi siŋki, maini tampoŋ na wiini jre-ɗikat n’a navaŋ pin yimi, won hlai na ɵa gurgle kai hai, gaini hanɗa, a bunda aŋ epiɗi nagai n’e yimi n’e nivi ɵini gurgle kai hai, kapai jre-ɗikat a pɵa aŋ wiiɗi lai.

¹²Ni ɗa a epiɗi nagai n’e ɵi gurgle ɗa lai, wiiɗi nagai n’e ɵi gurgle kadai kai, amma nagai n’e hili pin yimi na wiini Abraham n’apumu, won hlai n’a naka a ɵa gurgle kai hai ɗa.

¹³Buri ɓa, ɵinini ha na ɓa Abraham gaini pinzibani aga e nivi afti aŋ bulum ɗa, a za ɗa pi gadai kai, amma pin jre-ɗikat na wiini yimi.

¹⁴Buri ɓa, na ɓa nagai n’e mili bulum ɗa, e ɗi nagai n’e ɗa pin gadai ɗa, yimi ɗa a nafa wala kir kai, ɵinini ha ɗa ɗe, a bunda aŋ wala kadai lai.

¹⁵Buri ɓa seŋ zi gadai ɗa a kasi hiy, hlai na seŋ zi gadai aŋ woni kai ɗa, hi-n’amai midini gadai ɗe aŋ kaalai.

¹⁶Nɵa ɗa, a za na ɗa pin yimi, kapai a siŋka edi ɓa a yum; kapai zinini ha ɗa a za aŋ wiini pinzibani paŋ, wiiɗi nagai n’e ɗa pin gadai ɗa kiiɗi kai, amma wiiɗi nagai n’e ɗa pin yimi na wiini Abraham ɗa lai. Ni ɗa a apumu paŋ maini n’a na gai ɗû nɵa:

¹⁷Aga mu zuku aŋ epini pinzibaɗi ɗai viya, ni a na maini nɵa wuzani Alaw n’a yima pini, n’a bindiɗi zi mri karɗi, n’a za wazagi n’a nafu kai ɗa lai.

¹⁸Abraham a baiya pin ɵeɗ haa mini gai tiki ta, amma a hinaŋ kai, a yima, nɵa a bunda aŋ epini pinziba na viya, maini miɗi n’a muɗa ka ɓa: Pinzibaku aga a za maini hanɗa ɵa ɵa.

¹⁹Yimini Abraham ɗa a ɗiya gdaŋ ɵa, a tala sini maini gaini mri su ɵa, Sara ɗe te kiɗa te wa kir kaalai, buzani a za gobi miya ɗaw.

²⁰Amma wuzani ɵinini ha na wiini Alaw ɗa, a ɓa yimi na wiini edi kai, amma a nava gdaŋ war yimini, a sa kol sini Alaw lai.

²¹A yima fakat ɓa wala n’Alaw a za ha midini ɗa spakni a na buri a vaŋ amai lai.

²²Buri nɵa wala hanɗa a pɵa burini aŋ jre-ɗikat.

²³Amma wala n’aŋ gaini ɗû ɓa: "Hanɗa a pɵa burini ɗa", a na burini ni kiini ktai kai.

²⁴Amma a na burimu tumu lai, aga a pɵa burimu lai, buri tumu mu yimumu ɓa ni n’a ɵiya Yesu Epiɗ-ɗai na wiimu amai arbaɗi zi mri par,

²⁵Ni n’a sa edi burini tuwurmu, n’a ɵiya amai kapai mu zumu edi aŋ jre-ɗikat lai.