Read Mousgoum Romekai 7 Bible Online

Romekai 7 - Mousgoum bible

Romekai 7

¹Tawalakai, ki siɗi kai ɗi? Mu muɗa na ɗa wiiɗi ɗai n’e siɗi seŋ zi gadai ya ɗa, - gadai ɗa a ɓa spak midini ɗif haa sini mrini ta, ki siɗi ɵa kai ɗi?

²Nɵa lai, muni na gaini tiki ɗaw, t'aŋ gaini niggi sin mofoɗi pin gadai ɗa haa sin mrini ta. Amma na ɓa mofoɗi a mra li ɗa, t'aŋ gaini pli edi sin gadai n’a niggiti sin mofoɗi par.

³Nɵa ɗa, na ɓa karni mofoɗi par te tika wus zamai li, te bunda li aŋ munini ɗif zamai ɗa, e yikiti ɓa te muni zi zawar, amma na ɓa mofoɗi a mra su ɗa, t'aŋ gai pli edi war seŋ zi gadai ɗa par, nɵa ɗa te muni zi zawar kir kai, na ɓa te bunda li aŋ munini ɗif zamai ɗa.

⁴Nɵa, tawalakaya, tiki lai ki ɗika gaini mri sin seŋ zi gadai war sini Kristu, kapai ki zi aŋ wiini ɗif zamai, wiini ni n’a ɵiyasi amai arbaɗi zi mri par, kapai mu wumu ali wiini Alaw.

⁵Buri ɓa won hlai na mu ɗumusi ka azumai pin dirini neŋ-si ɗa, diri na meefeŋ na wiini a za sda war sumu paŋ pin seŋ zi gadai, a kumu aŋ wa ali wiini mri lai.

⁶Amma tiyana ɗa, tumu mu ɗumu pin seŋ zi gadai kir kai, buri mu ɗumu gaini niggi, pin wala na mu ɗumusi ka aŋ bagakaini, nɵa ɓa koo mu ɗumu aŋ bagakai tekeɗeɗi, mu ɗumu war zamaŋ na wel na wiini gadai ɗa kir kai, amma mu ɗumu war zamaŋ na hehe na wiini seze.

⁷Aga mu muɗumu a ma ɗa? Seŋ zi gadai a tuwur ɗi? Duk kai zaŋ. Amma mu sɗa ɓa tuwur a na ɗa burini seŋ zi gadai, ɵa kai ɗa mu sɗa fu wala n’e yikiŋ ɓa suuna ɗa kai, na ɓa seŋ zi gadai a muɗa fu ɓa, ku za suuna kai kai ɗa.

⁸Nɵa tuwur ɗa pin baŋa na gadai a ɵaŋ ɗa, a bla pinzibani suuna paŋ wara, buri ɓa hlai na seŋ zi gadai aŋ warni kai ɗa, tuwur ɗa aŋ gaini mri.

⁹Ta ɗa aɗipar won hlai na gadai aŋ kai ɗa, mu nafu kara, amma won hlai na seŋ zi gadai a halasi li ɗa, tuwur a waya a ɵiyasi ka amai ɵiy.

¹⁰Ta ɗa mu mra su, nɵa seŋ zi gadai n’a ka sin suŋfa ɗa, a bunda buriya a ka sin mri.

¹¹Buri ɓa tuwur, pin baŋa n’a ɵa ɗa, a wulaŋa edi gaini seŋ zi gadai ɗa, gaini ni a fuɗaŋa edi lai.

¹²A futini, seŋ zi gadai ɗa a sɗik, seŋ zi gadai n’abai ɗa a sɗik, a jre, a pɗem lai.

¹³Nɵa ɗa, a bunda buriya aŋ mri na ɗa a pɗem ɗa ɗi? Duk kai zaŋ! Hanɗa a tuwur, na kapai a siŋka sini edi maini hanɗa ɵa ɗa a wa mri wara pini pɗem ɗa, kapai pin seŋ zi gadai ɗa, tuwur a siɓkai edi war spakni zi tuwur ɗa.

¹⁴Buri mu suɗumu ɓa seŋ zi gadai ɗa a wala n’a na sin seze par, amma ta ɗa mu ɗif na war neŋ-si gai wuri edi tin tuwur kai.

¹⁵Buri ɓa wala na mu zaŋ ɗa, mu sɗaŋ kai, wala na mu firyaŋ ɗa a za gaya kai, amma mu za ɗa a na mu firyaŋ kai ɗa.

¹⁶Na ɓa wala na mu zaŋ ɗa a wala na mu firyaŋ kai ɗa, mu sɗa ɓa seŋ zi gadai ɗa a wala na pɗem.

¹⁷Tiyana ɗa, mu za wala hanɗa na ɗa mu ta kai, amma a tuwur n’aŋ wara ɗa.

¹⁸Mu sɗa ɵa ya lai, wala na pɗem aŋ wara kai, a dara a muɗa war sa, buri hiini na ɓa mu za wala na pɗem aŋ wuzani ara sme, amma a za gaya kai.

¹⁹Pɗem na mu daraŋ ɗa, mu zaŋ kai, amma meefeŋ na mu daraŋ kai ɗa, mu za ɗa a ni ɗa.

²⁰Na ɓa mu za ɗa a wala na ta mu firyaŋ kai ɗa, mu zaŋ na ɗa mu ta kir kai, amma a tuwur n’aŋ wara ɗa.

²¹Nɵa gadai na mu navaŋ ɓa: buriya ta na mu dara mu za pɗem ɗa, a cosi wuzani ara ɗa a meefeŋ.

²²Buri ɓa gaini wara n’amlai ɗa, mu firiya seŋ zi gadai na wiini Alaw ɗa.

²³Amma mu tala war sa paŋ ɗa, gadai zamai a na, n’a hitima gaini seŋ zi gadai n’aŋ war siɗiŋa, a bundaŋa aŋ bege, bege na wiini a gadai na wiini tuwur n’aŋ war sa paŋ ɗa.

²⁴Haw buriya, n’aga a plaŋa edi war si zi mri hanɗa par asiya ɗa?

²⁵Tese sin Alaw war Yesu Kristu, Epiɗ-ɗai na wiimu. Nɵa ɗa, ta war hiiniŋa, mu bege na wiini gadai na wiini Alaw, amma war neŋ-sa ɗa, mu bege na wiini gadai na wiini tuwur.