Read Mousgoum Romekai 8 Bible Online

Romekai 8 - Mousgoum bible

Romekai 8

¹Nɵa tiyana ɗa, kuɗi sariya ktai maa aŋ kai, buriɗi nagai n’e ɗa war Yesu Kristu ɗa.

²Buri ɓa gadai na wiini Seze na wiini suŋfa na war Yesu Kristu ɗa a puluku li edi war gadai na wiini tuwur gaini na wiini mri par.

³Buri ɓa- wala na gadai a kiɗa aŋ zaŋ kai, buri ɓa neŋ-si a bundaŋ huruf burini tuwur ɗa, -Alaw won hlai n’a ɵinasi Ahini mal war neŋ-si na kal kal maini si na wiini tuwur nɵa, a kûti sariya midini tuwur na war neŋ-si ɗa.

⁴Kapai jre-ɗikat na gadai a muɗa midini ɗa a va amai warmu tumu na mu ɗuma piyumu pin neŋ-si ɗa kai, amma na pin Seze ɗa.

⁵Buri ɓa nagai n’e ɗa azumai pin spak na wiini neŋ-si ɗa, e piyi maini na dirini neŋ-si ɗa a firyaŋ ɵa lai, amma nagai n’e ɗa azumai pin spakni Seze ɗa, e zi ɗa maini na seze a firya ɗa nɵa lai.

⁶Buri ɓa neŋ-si ɗa a ka sin mri, amma Seze ɗa a ka suŋfa gaini ɵeɗ lai.

⁷Buri ɓa neŋ-si a za sini ɗa aŋ gawni Alaw, buri a ɵina pin gadai na wiini Alaw kai, a kiɗa maa aŋ za hanɗa kaalai.

⁸Nagai n’e ɗa pin spakni neŋ-si ɗa, e kiɗi zûvi arni Alaw kai.

⁹Amma tiki, ki ɗa azumai pin spakni neŋ-si kai, amma pin na wiini Seze, na ɓa fakat Seze na wiini Alaw aŋ warki ɗa. Amma na ɓa ɗif a na, na Seze na wiini Kristu aŋ warni kai ɗa, ni a wiini kai.

¹⁰Na ɓa Kristu aŋ warki ɗa, a jre ɓa si ɗa aŋ gaini mri su burini tuwur, amma seze ɗa aŋ karni warki buri ki zi edi aŋ jre-ɗikat.

¹¹Amma na ɓa Seze na wiini ni n’a ɵiyasi Yesu amai arbaɗi zi mri par aŋ warki ɗa, ni n’a ɵiyasi Kristu amai arbaɗi zi mri par ɗa, aga a bunda siki zi mri karni gaini Seze na wiini n’aŋ warki ɗa.

¹²Nɵa ɗa tawalakaya, tumu ɗa tumuŋ aŋ mudumu, amma sin neŋ-si kai, kapai mu piyumu pin neŋ-si ɗa kai.

¹³Buri ɓa na ɓa ki ɗa karki war pin neŋ-si ɗa, aga ki mri, amma na ɓa pin seze, ki fiɗi sda na wiini neŋ-si li edi ɗa, aga ki simni karki.

¹⁴Nagai paŋ na Seze na wiini Alaw a na ɗupiɗi ɗa, nagai e ɗi alini Alaw.

¹⁵Buri ɓa ki nivi ɗa a seze zi bege kai, kapai ki wiyi ki hûni pra kir kai, amma ki nivi ɗa a Seze n’a ziki aŋ ali zi wii, gaini ni mu ɗuulumu ɓa: Abba, Apa.

¹⁶Seze gaini midini dama a za zaida wiini sezemu, ɓa mu ɗumu alini Alaw.

¹⁷Na ɓa mu ɗumu ali ɗa, mu ɗumu ɗai zi mili bulum ɗa lai. Mu ɗumu zi mili bulum na wiini Alaw, zi ɓûrwi bulum gaini Kristu lai, na ɓa mu ɗuma sɗumu gir gaini jre jre, ɓa kapai mu nuvutumu abai gaini lai ɗa.

¹⁸Buri mu yim ɓa gir na mu ɗumu warni tiyana gaiɗi abai n’aga te siŋkasi edi burimu ɗa, wala ktai maa a tapaŋ kai.

¹⁹Buri wazagai zi rgi paŋ ɗa mini gai tiki ta tin biyini mefeŋ n’EPIƊ-ƊAI aga a siŋkiɗi alini edi warɗi abai ɗa.

²⁰Buri ɓa wazagai zi rgi paŋ a na azumai pin spakni wazagai na nafani kai ɗa, pin diri na wiini dama kai, amma pin diri na wiini Alaw n’a mulaŋ azumai pini ɗa, -amma aŋ war biyi-na-pin-ɵeɗ.

²¹Wazagai zi rgi hanɗa lai aga a nava pli n’edi war bege na wiini payai n’aga a vada edi hanɗa par, aŋ nava bri na wiini war pli n’edi n’abai na wiiɗi alini Alaw.

²²Amma mu suɗumu ɓa haa girna wazagai zi rgi gaini abaini paŋ a na nuuma, a na sɗa gir, na wiini ŋiba na wiini.

²³A wazagai zi rgi hanɗa ktai kai, tumu lai, na mu nuvumu seze maini merfeŋni seyem n’a naiya avut ɵa ɗa, tumu lai mu ɗuma numumu war sumu dama, mu ɗuma piyumu zi n’edi aŋ ali zi wii gaini pli-n’edi na wiini sumu lai.

²⁴Buri ɓa, tumu mu nuvumu pli n’edi ɗa war biyi-na-pin-ɵeɗ; amma biyi-na-pin-ɵeɗ n’arni ɗif a sini ca ɗa, a biyi-na-pin-ɵeɗ kir kai. Wala na ɗif a na talaŋ gaini arni ɗa, a bayaŋ pin ɵeɗ pra ɗi?

²⁵Amma na ɓa mu biyumu pin ɵeɗ, a wala n’armu sini kai ɗa, mu biyuŋmu war siiki gaini hangal.

²⁶Nɵa lai Seze a zina pin huruf na wiimu, buri ɓa wala na kadai tiɓ mu zulbuŋmu war siiwa ɗa, mu suɗumu kai, amma Seze gaini midini dama a siiwa Alaw burimu gaini nuumi n’a mumu a kiɗa aŋ muɗaŋ edi kai.

²⁷Amma ni n’a sɗa hiini n’aŋ warɗi agul ɗa, a sɗa wala na seze a dara a zilbaŋ ɗa, a siiwa buriɗi na sɗik, war diri na wiini Alaw.

²⁸Mu suɗumu ya ɓa, wala n’a na za paŋ ɗa, a za ɗa burini pɗem na wiiɗi nagai n’e diri Alaw, buriɗi nagai n’e yikisi pin hiini n’a rgaŋ warni ɗa.

²⁹Buriɗi nagai n’a siɗiɗisi avut par, a viriɗisi edi avut par lai aŋ bindiɗi maini Ahini nɵa, kapai a za aŋ Ahini n’a wa avut arbaɗi tawalakai viya.

³⁰Nagai n’a viriɗi edi avut par ɗa, a yikiɗisi ya lai, nagai n’a yikiɗisi ɗa, a ziɗi edi aŋ jrekai lai, nagai n’a ziɗi edi aŋ jrekai ɗa, a sitiɗi abai ɗa lai.

³¹Nɵa mu muɗumu midini seŋ hanɗa katawai ɗa a ma ɗa? Na ɓa Alaw aŋ pumu par ɗa, n’aga a pasi armu par ɗa asiya ɗa?

³²Ni na, Ahini mal ɗa, a godoŋ burimu kai, amma a saŋ edi burimu paŋ ɗa, a kiɗa a sumu wazagai paŋ burini ni, pin yum kai ɗi?

³³Nagai n’Alaw a viriɗi edi yaw ɗa, n’aga a pa seŋ midiɗi asiya ɗa? Alaw a ni n’a za ɗif edi aŋ jre ɗa koo!

³⁴N'aga a kûti sariya midiɗi asiya ɗa? Yesu Kristu a ni n’a mra, a ni ktai kai, a ɵiyasi amai war mri par, a na tiyana war hlai zi hormo na wiini Alaw, a na siiwa burimu lai.

³⁵N'aga a ɓurwumu edi sin diri na wiini Kristu par ɗa asiya ɗa? A gir zaw, a hunai zaw, a siɗini gir zaw, a wiyamai zaw, a ganala zaw, a mri zaw, a kaɵkar ɗi?

³⁶Maini n’aŋ gai ɗû nɵa: Buriku tuku, e ɗa fiɗiyi edi mefeŋ paŋ, e tiliyi maini adumai n’e ɗa fiɗiŋ ɗa nɵa.

³⁷Amma war wazagai hanɗa paŋ ɗa, mu nuvumu rɗi-amai a suwa burini ni n’a durumu.

³⁸Buri mu sɗa edi gaglai ɓa, mri zaw, suŋfa zaw, ɗai zi ɵeŋ na war fuŋ-n’Alaw zaw, seze zaw, wazagai n’a na vuga tiyana zaw, wazagai n’aga a za dawai sek ɗa zaw, spakkai zaw,

³⁹hlai n’amai zaw, hlai na hulum zaw, wala zamai zi rgi ɗi, wala ktai n’a kiɗa aŋ ɓurwumu edi sini diri na wiini Alaw na war Yesu Kristu, Epiɗ-ɗaimu par aŋ kai.