Read Mousgoum Romekai 9 Bible Online

Romekai 9 - Mousgoum bible

Romekai 9

¹Mu muɗa na ɗa a jre war Kristu, mu rha ma kai, hiiniŋa kaw a zaŋa zaida ɓ'a na ɗa ɵa lai war Seze sɗik.

²M'aŋ warni kwimi n’abai gaini turli warɗi agula lai mefeŋ paŋ.

³Buri ɓa, na ɓa ta gaini mada dama, Alaw a bulaŋa fu wiini edi su, a ɓurwaŋa fu edi sini Kristu par lai, buriɗi tawalakaya, pinziba na wiya na war neŋ-si ɗa, mu firya gai firyi.

⁴Nagai n’e ɗi pinzibaɗi Izrayel, n’e ɗi ali zi wii mal mal, n’abai te sa aŋ wiiɗi gaini bonu gaini gadai, gaini siiwa na tin Alaw, gaini ɵinini ha,

⁵gaiɗi tamai n’abakai, na Kristu a halasi siɗi par pin neŋ-si ni n’a na amai midini wazagai paŋ, Alaw zi kol, haa hlai n’a vada kai, n’a vada kai. Amen.

⁶A na ɗa ɓa seŋ na wiini Alaw a bunda li aŋ wala na nafani aŋ kai ɗa, a na ɵa kai. Buri ɓa nagai paŋ n’e wi war pinzibani Izrayel, e ɗi Izrayel paŋ kai.

⁷N'e yiki siɗi ɓa e ɗi alini Abraham, a wiiɗi a ni mal mal paŋ kai, amma Alaw a miɗini wiini Abraham ɓa: N'aga ku yikiɗi aŋ pinzibaku ɗa, aga ku niviɗi sini Isaak par.

⁸A siŋka edi na ɗa ɓa, alini Alaw ɗa, e ɗi nagai n’e wi war neŋ-si ɗa kai, amma n’e pɵi aŋ alini ɗa e ɗi nagai n’e wii pin ɵinini ha.

⁹Buri ɓa miɗi na wiini ɵinini ha ɗa a na ɗa ɓa: War sarti na mai hanɗa ɵa ɗa, aga mu halasi, Sara aga te wa ahi lai.

¹⁰A ni ktai kai, a za siɗi Rebekka ɗa nɵa lai, na te tika fel, te wiiɗi ali na teyekai gaini Isaak na tiymu.

¹¹Ali hanɗa maa e wi kai hai, zi wala na pɗem gaini na meefeŋ kai hai lai, paŋ ktai, -kapai wala n’Alaw a rgaŋ warni pin diri na wiini n’a kiɗa a vara asiya ɗi paŋ ɗa, a haza edi kai ɗa,

¹²a vara ɗa pin sda ɗa kai, amma pin dirini ni n’a dara yika ɗa, -miɗi a muɗa siɗi Rebekka ɓa, n’abai aga a za aŋ bege na wiini n’agwi ɗa.

¹³Maini n’aŋ gaini ɗû nɵa: Yakob ɗa mu daraŋ, amma Ezaw ɗa mu daraŋ kai.

¹⁴Aga mu muɗumu maɵa? Mu muɗumu ɓa Alaw a na jre-ɗikat kai ɗi? Duk kai zaŋ.

¹⁵Buri a muɗini wiini Musus ɓa: Ɗif na mu firya mu hiinaŋ ɗa, aga mu hiinaŋ, ɗif na mu firya mu za pɗem sini ɗa, aga mu za pɗem sini lai.

¹⁶Nɵa, hanɗa a za ɗa pin diri na wiini ɗif kai, pin was n’a na fuɗaŋ ɗa kaalai, amma pin dirini Alaw na hiinini haw aŋ warni ɗa.

¹⁷Buri ɗû a muɗa sin Faraw maini nɵa: mu tukuku aŋ pai ɗa pin diriŋa, ɓa kapai mu siŋka spakŋa edi gaiku, ɓa kapai yikiŋa a wa edi midini afti paŋ lai.

¹⁸Nɵa, a hiina haw burini ɗif pin dirini, ɗif n’a dara a bindini midini a ɵina seŋ kai ɗa, a zaŋ pin dirini lai.

¹⁹Pin hanɗa, aga ki zilbiŋa kai ɓa: A za hiy siɗi ɗai katawai buri ma ɗa? Na ɓa ɵa ɗa ɗif n’a kiɗa aŋ bla edi sin dirini ɗa asiya ɗa ɗi ɗa?

²⁰Tuku ɗif murɗek tiɓ ɗa, ku siya ktai ɗa, na kapai ku sispa gaini Alaw ɗa? Wala na ɗif a rgaŋ ɗa, a kiɗa a muɗa sin ni n’a rgaŋ ɓa: Ku rgaŋa ɵa buri ma ɗa ɗi?

²¹Ɗif zi hi grak ɗa, gdaŋni a na midini afti n’a ha grak gaini ɗa kai ɗi? Gaini afti ni dama a kiɗa a ha grak na burini sda na pɗem, zaw grak na zi dawaŋ lai kai ɗi?

²²Na ɓa Alaw, won hlai n’a firya a siŋka hi na wiini edi, a siŋka spakni edi lai, a hinasi wazagai n’a zizina burini hiy gaini ɓilki n’edi aŋ halasi witaw tar kai ɗa,

²³a na buri a siŋka pɗemɗi abai na wiini edi sin wazagai n’a kiɗa aŋ za yum sini, n’a zizinaɓsi haa aɗipar, buriɗi abai hanɗa.

²⁴-A siŋka edi ɓa, wiimu tumu n’a yikumusi edi arbaɗi Yudeyakai par ktai kai, amma edi arbaɗi pinziba na zamai ɗa par lai.

²⁵Maini n’a muɗaŋ war Hoseya ɗa nɵa: Pinziba n’a naka a wiya kai ɗa, aga mu yikaŋ aŋ pinziba na wiya. Na na te naka mu diriti kai ɗa, aga mu yikiti ɓa zi diri gara.

²⁶Hlai n’e ɗika, e yiki ɗif woni ɓa a wiya kai ɗa, aga e yikiɗi ɗa ɓa alini Alaw na karni.

²⁷Esaya lai a ɗuula a muɗa edi midiɗi Izrayel maini nɵa: Koo ɓa vokɗi aliɗi Izrayel a za abai maini kai-kai n’agoɗom nɵa tekeɗeɗi aga a kurɗa piɗi ɗa a vok n’agwi kadai.

²⁸Buri Epiɗ-ɗai aga a va seŋni n’a muɗaŋ ɗa paŋ amai kafa, gaini yafai kaalai, azumai midini afti.

²⁹Maini na Esaya a muɗaŋsi wuzani hlai par nɵa: Na ɓa Epiɗ-ɗai zi Spak paŋ a hinumu fu pinziba agwi kai ɗa, mu bundumu fu na ɗa maiɗi Sodoma nɵa, mu kutumu fu kal kal gaiɗi Gomora ɵa lai.

³⁰Nɵa aga mu muɗumu maɵa ɗa? Pinziba na zamai n’e ɗika e piyi jre-ɗikat kai, e nivi jre-ɗikat, -amma a jre-ɗikat na pin yimi ɗa.

³¹Amma aliɗi Izrayel n’e ɗika e piyi gadai na wiini jre-ɗikat ɗa, e vigi ɵimani gadai hanɗa ɗaw.

³²A za nɵa buri ma ɗa? Buri ɓa e piyiŋ ɗa gaini yimi ɗa kai, amma mai na ɓa a na ɗa pin sda ɵa, nagai e dibi sini ahi-fuŋ zi dibi azi,

³³maini n’aŋ gaini ɗû nɵa: mu tika ahi-fuŋ zi dibi azi ktai aŋ war Siyon, a ahi-fuŋ zi bili ɗai azumai, ni n’a yima li warni ɗa, aga a tika siyer kai zaŋ.