Read Mousgoum 1 Korintekai 1 Bible Online

1 Korintekai 1 - Mousgoum bible

1 Korintekai 1

¹Ta Paulus, na mu vara li aŋ apostel na wiini Yesu Kristu, pin dirini Alaw, gaini tawal Sostenes,

²sin tipi na wiini Alaw n’a na war Korinte, siɗi nagai n’e si siɗi edi wiini Alaw, war Yesu Kristu, n’e ɗa sɗik pin yiki n’e yikisi gaini, gaiɗi nagai n’e ɗa yiki yikini Epiɗ-ɗaimu Yesu Kristu war hlai paŋ, Ni a Epiɗ-ɗai na wiimu, a na wiiɗi lai.

³Alaw Apumu gaini Epiɗ-ɗai Yesu Kristu e siki yum gaini ɵeɗ lai.

⁴Mu sa tese sin Alaw na wiya buriki kûreɗ-kûreɗ, buri yumni Alaw n’a saŋ siki war Kristu Yesu.

⁵Buri war ni, tiki ki bindi ki kiɗi war wazaagai paŋ: wr seŋ war siɗi lai.

⁶Buri ɓa zaida na wiini Kristu a nava balamni warki ga futini.

⁷Tiyana ɗa, like zi yum ktai n’a hina na ki niviŋ kai aŋ kai, won hlai na ki ɗa biyi Epiɗ-ɗaimu Yesu Kristu, n’aga a siŋkasi sini edi gaglai.

⁸A Ni n’aga a siki gdaŋ haa sin hlai zi dibi, kapai aga ki simni gaini seŋ miɗiki kai, war mefeŋ n wiini Epiɗ-ɗaimu Yesu Kristu.

⁹Alaw a jre, Ni n’a yikikisi war bonu na gaini Ahini, Yesu Kristu, Epiɗ-ɗai na wiimu.

¹⁰Mu siiwiki, tawalakai, war yikini Epiɗ-ɗaimu Yesu Kristu, a zuva ɓa miki a za ktai, ɓraw arbaki kai, gaini tipi ktai war hiini, war wala na ki diri ki ziŋ ɗa lai.

¹¹Tawalakaya, ɗai n’ahaɗi Kluwe e hilisi, e miɗiŋa, ɓa sispai a na arbaki.

¹²Mu ɵina na ɗa ɓa: Ktai a muɗa ɓa: Ta mu wiini Paulus, zamai ɓa: mu wiini Apolos, zamai ɓa: mu wiini Kefas, zamai pra ɓa: mu wiini Kristu lai.

¹³Lai ɗa, Kristu ɗa aŋ gaini ɓraw ɗi? N'a toko amai sin dagra buriki ɗa a Paulus ɗi? Zaw tiki ki nivi baptisme ɗa war yikini Paulus ɗi?

¹⁴Mu sa tese sin Alaw, buri mu sa baptisme wiini ktai arbaki kai, sai wiini Krispus gaini Gayus tar.

¹⁵Nɵa ɗif n’a kiɗa aŋ muɗa ɓa tiki ki nivi baptisme war yikiŋa aŋ kai.

¹⁶Na zamai ɗa mu sa baptisme wiiɗi ɗai n’ahani Stefanus lai, asakal hanɗa par ɗa, mu sɗa ɓa mu sini baptisme wiini ɗif zamai kai.

¹⁷Buri ɓa Kristu a ɵinaŋasi ɗa buri mu sa baptisme kai, amma buri mu ɓaka labar na pɗem, hanɗa war seŋ zi miɗi zi yel ɗa kai, kapai dagra na wiini Kristu a bunda edi aŋ wala kadai kai.

¹⁸Buri ɓa seŋ na wiini dagra ɗa, a wala zi duuli buriɗi nagai n’e ɗa bi edi ɗa, amma burimu tumu na mu ɗumu warɗi futi zi kûri ɗa, a spak na wiini Alaw.

¹⁹Buri aŋ gai ɗû maini nɵa: Aga mu ɓilka yel na wiiɗi na yalakai ɗa edi, mu vada siɗi na wiiɗi zi siɗi ɗa edi lai.

²⁰Ɗif zi yel aŋ wata ɗa? Ɗif zi siɗi gara ɗa aŋ wata ɗa? Ɗif n’a fufuka ezini seŋ na warɗi yai hanɗa gara ɗa aŋ wata lai ɗa? Alaw a bunda yelɗi ɗai na warɗi yai edi aŋ duuli kai ɗi?

²¹Buri ɓa ɗai na yai ɗa, war yel na wiiɗi ɗa, e siɗi Alaw war yel na wiini kai, nɵa a tala arni Alaw pɗem buri a kûriɗi nagai n’e yimi pin ɓikini seŋ n’a tala main wala zi duuli ɵa ɗa.

²²Buri ɓa Yudeyakai e piyi ɗa a wala zi siŋki, pinziba na zaai ɗa e piyi ɗa a yel lai.

²³Amma tiyi, mi ɓiki seŋ na ɗa midini Kristu na gaini tuki sin dagra, a wala zi dibi azi, buriɗi Yudeyakai, a wala zi duuli buriɗi pinziba na zamai ɗa lai.

²⁴Amma buriɗi Yudeyakai gaiɗi pinziba na zamai ɗa, tiyi mi ɓiki seŋ na ɗa midini Kristu, a spak na wiini Alaw, a yel na wiini Alaw lai.

²⁵Buri ɓa duuli na wiini Alaw ɗa a suwa yel na wiini ɗif murɗek, huruf na wiini Alaw ɗa a suwa gdaŋ na wiini ɗif murɗek lai.

²⁶Tawalakai, tili yiki n ki yikisi gaini ɗa, arbaki ɗa, n’e wi yalakai e ɗa viya kai, zi spak ɗa e ɗa viya kai, n’e ɗa war muluk ɗa, e ɗa viya kaalai.

²⁷Alaw a vara ɗa a wala n’a tala arɗi ɗai na warɗi yai ɗa maini wala zi duuli ɵa, kapai tikiɗi siyer wiiɗi ɗai a yalakai ɗa gaini. Alaw a vara wala na huruf arɗi ɗai na warɗi yai, kapai a tikiɗi siyer wiiɗi ɗai na gdaŋai ɗa gaini.

²⁸Alaw a vara ɗa a wala n’a nafa kai na warɗ yai ɗa, na ɗai e miisiŋ, n’a sɗa aŋ wala ktai kai, kapai a bunda wala n’a na ɗa edi aŋ wala kadai lai,

²⁹kapai ɗif a siɗa aŋ kola sini wuzani Alaw kai.

³⁰Amma, barkani Ni, tiki ki ɗa war Kristu Yesu, ni n’a bunda aŋ yel n’a halasi sin Alaw par burimu, pra, a jre-ɗikat na wiimu, a zi-n’edi aŋ sɗik na wiimu, a pili-n’edi na wiimu lai.

³¹Kapai ɗa maini n’aŋ gai ɗû nɵa: Ni n’a dara a kola sini ɗa, a kola sini war Epiɗ-ɗai.