Read Mousgoum 1 Korintekai 10 Bible Online

1 Korintekai 10 - Mousgoum bible

1 Korintekai 10

¹Tawalakaya, mu dara ɓa, aga ki simni war siɗi-kai ɗa kai: tamaimu e ɗika e hili ɗa ɗugul gai yimi amai midiɗi kaai, e vigi ɗa war yem-ra-n’abai ɗa ɗaw lai.

²Nagai paŋ e nivi baptisme na wiini Musus, war ɗugul, gaini yem-ra-n’abai ɗa lai.

³Nagai paŋ e simi war simi zi seze ni ktai,

⁴nagai paŋ e ci war wala zi ci, zi seze ni ktai buri ɓa e ci sin huwuŋ zi seze n’a nafu piɗi su. Huwuŋ hanɗa a Kristu.

⁵Paŋ ktai, abaiɗi e ɗifu arni Alaw pɗamai kai, buri ɓa e nivi fiɗi-n’edi edi war basga na kaɗataŋ.

⁶Hanɗa a za aŋ wala zi siŋki burimu, kapai tumu lai, aga mu piyumu wazagai na maafanai, maini na nagai e ziŋ ɗa ɵa kai.

⁷Ki yimi pin alawai zi rgi, maini na zamai arbaɗi e ziŋ ɗa nɵa kai, maini n’aŋ gai ɗû nɵa: Ɗai e simni azumai aŋ simi, aŋ ci lai, asakal pae e fiki amai aŋ ɵi dawaŋ.

⁸Mu wumu sumu war maɵara, maini na zamai arbaɗi e ɗa ziŋ ɗa nɵa kai: Ɗai e bi dubu caba pi hu, war mefeŋ ktai.

⁹Mu piyunumu mini Kristu maini na zamai arbaɗi e piyini mini nɵa kai, wala-meefeŋ a vidiɗi edi.

¹⁰Ki ŋuriyi maiɗi na zamai e ŋuriyi ɗa nɵa kai, ɗif zi ɵeŋ na wiini mri a vidiɗi edi.

¹¹Wazagai hanɗa paŋ a za siɗi aŋ wala zi siŋki burimu, a ɗo buri a hitrumu tumu, na mu ŋumusi ya sin dibini hlai.

¹²Buri nɵa, asiya ɗi paŋ n’a tala sini ɓa aŋ gai ɗiyi amai zaw ɗa, a tika hangalni ta, kapai a kɵa azumai kai.

¹³Tanai paŋ n’a za siki na ɗa, a na za siɗi ɗai zamai mai hanɗa ɵa lai, amma Alaw a jre, a bunda kai, a kiɗa a hinasi tanai n’a suwa gdaŋki a halasi miɗiki kai. Burini tanai n’a na za siki ɗa, aga a ɓisitiki futi na ki niyi edi warni par gaiɗi ɗa, aga a siki gdaŋ na ki libiŋ gaini ɗa lai.

¹⁴Nɵa lai, tiki na mu diriki gara, pri edi wuzani hûrgi n’azumai wuzani alawai zi rgi ɗa.

¹⁵Mu muɗa siki na ɗa, maini siɗi ɗai na yalakai nɵa, tiki gaini miɗiki dama, fifiki ezini wala na mu muɗaŋ ɗa lai.

¹⁶Kup zi ɓiki, na mu ɓukutumu na ɗa, a bonu na gaini felni Kristu kai ɗi? Peŋ na mu ɓurwuŋmu tumu na ɗa, a bonu na gaini sini Kristu kai ɗi?

¹⁷Buri ɓa peŋ ɗa a ktai, tumu na mu ɗumu viya ɗa, mu ɗumu si ktai lai, buri tumu paŋ mu ɓurwumu na ɗa a peŋ na ktai hanɗa.

¹⁸Tili siɗi aliɗi Izrayel na war neŋ-si haw ɗa, nagai n’e simi wazagai n’e fiɗiŋ aŋ ɓka ɗa, e ɗa bonu gaini gûwiŋ zi ɓaka kai ɗi?

¹⁹Mu muɗa na ɗa ɓa maɵa ɗa? Neŋ-ni wazagai n’e fiɗiŋ aŋ ɓaka wiini alawai zi rgi ɗa, a wala na pɗem, mu muɗa na ɗa ɵa ɗi? Zaw ɓa alaw zi rgi a wala na pɗem, mu muɗa na ɗa ɵa ɗi?

²⁰A na ɵa kai, wala n’e fiɗiŋ aŋ ɓaka na ɗa, e fiɗiŋ na ɗa wiini matai, a wiini Alaw kai. Mu firya ɓa bonu a za arbaki gaiɗi matai kai.

²¹Tiki aga ki ci war kup na wiini Epiɗ-ɗai par lai, war kup na wiiɗi matai par lai kai. Tiki aga ki simi simi na wiini Epiɗ-ɗai lai, na wiiɗi matai lai kaalai.

²²Aga mu piyumu mini Epiɗ-ɗai ɵa ha mu niyuŋmu war sile dak ɗi? Zaw tumu gdaŋai mu suwuŋmu ɗi?

²³Mu kiɗa aŋ za wazagai paŋ, mai na mu dara ɵa. Amma wazagai paŋ ɗa, a pɗamai paŋ kai. Mu kiɗa aŋ za wazagai paŋ, mai na mu dara ɵa, amma wazagai paŋ a rga wala amai paŋ kai.

²⁴Hina ɗif a paiya wazagai na pɗamai burini sini dama kai, amma a paiya a na wiini maini na zamai.

²⁵Wala paŋ na ɗai e cikiliŋ edi war kasku ɗa, aga ki simiŋ gaini giriŋi war hiiniki kai.

²⁶Buri ɓa yai gaini wazagai na warni paŋ ɗa a wiini Epiɗ-ɗai.

²⁷Na ɓa ɗif zi yimi kai, a yikiki li ahani aŋ simi gaini ɗa, n’a tikaŋ wuzaki paŋ ki simiŋ. Ki zilbi kai sam, kapai a kasi giriŋi war hiiniki kai.

²⁸Amma, na ɓa ɗif a miɗiki li ɓa, hanɗa a neŋ zi ɓaka ɗa, ki simiŋ kai, buri ni n’a siki labar ɗa, kapai a kasi seŋ war hiinini ɗif kaalai.

²⁹Seŋ na midini ɓilkini hiini na wiini ɗif ɗa, mu muɗa na ɗa burini hiini na wiiki ɗa kai, amma burini na wiini maiki na zamai ɗa. Zi na mu za pin jaaŋa ɗa, a bunda aŋ wala na hiinini maya na zamai a ɓilka burini ɗa buri ma ɗa?

³⁰Na ɓa ta mu suma simi na wiya gaini zini tese ɗa, ɗai aga e miisiŋa burini wala na mu sumaŋ gaini zini tese ɗa buri ma ɗa?

³¹Nɵa ɗa, koo ɓa ki simi ɗa a simi, koo ɓa ki ci ɗa a ci, koo ɓa ki zi ɗa a ma ɗi paŋ, aga ki zi paŋ burini kol na sini Alaw.

³²Ki zi aŋ wala zi dibi azi burini pinziba na zamai ɗa kai, buriɗi Yudeyakai kai, burini tipi na wiini Alaw kaalai.

³³Maya ta nɵa, war wazagai paŋ, mu paiya aŋ za wala na pɗem arɗi ɗai paŋ, mu hiina midini wala na pɗem burini sa dama kai, amma na wiiɗi ɗai na gaini abaiɗi ɗa, kapai nagai e nivi kûri.