Read Mousgoum 1 Korintekai 11 Bible Online

1 Korintekai 11 - Mousgoum bible

1 Korintekai 11

¹Ki tiki aza, maini na ta dama mu na tika ezini Kristu ɗa nɵa.

²Mu ziki tese, buri war wazagai paŋ, miɗiki a na wula gaya kai, buri ki yimi gadai ɗa kal kal maini na mu siŋki nɵa.

³Amma mu firya ɓa, seŋ hanɗa a yima edi miɗiki gaglai, wus paŋ ɗa a ŋa midini a Kristu, muni ɗa, a ŋa midiɗi ɗa a wus, a ŋa midini Kristu ɗa a Alaw lai.

⁴Wus paŋ n’a siiwa zaw a muɗa seŋ na wuze, gaini wala midini bar ɗa, a tikini ɗa a siyer wiini ni n’a ŋa midini ɗa.

⁵Amma muni paŋ, na te siiwa zaw te muɗa seŋ na wuze, gaini wala midiɗi gai biri kai ɗa, te tikini ɗa a siyer wiini ni n’a ŋa midiɗi ɗa. Buri tala kal-kal maini na ɓa midiɗi aŋ gaini fiɗi edi hu nɵa.

⁶Na ɓa muni te dara te bara wala midiɗi kai ɗa, a pɗem buri te ɗukla ayir na midiɗi edi, na ɓa ayir na midiɗi muni gai fiɗi edi hu zaw gai ɗuki edi daf ɗa, a fuɗa si ɗa, a pɗem ɓa te bara wala mdiɗi bar.

⁷Ɗif na wus ɗa a bara wala midini kai, buri a na ɗa maini Alaw nɵa, ni a kol na wiini Alaw lai. Amma muni ɗa, te kol na wiini wus.

⁸Buri ɓa, wus ɗa a yimasi edi siɗi muni par kai, amma muni te yimasi edi sini wus par.

⁹Wus a rga buriɗi muni kai, amma muni te rga burini wus.

¹⁰Buri nɵa, muni ɗa aga te tika wala ktai midiɗi ta, n’a siŋka spak na t'aŋ pini ɗa edi, buriɗi ɗai zi ɵeŋ na war fuŋ-n’Alaw.

¹¹Gai hanɗa paŋ war Epiɗ-ɗai ɗa, muni te wala ɗa sai gaini wus, wus a wala ɗa sai gaiɗi muni lai.

¹²Buri ɓa muni te yimasi edi sini wus par ɵa, amma wus ɗa te waŋ te muni lai, hanɗa paŋ a na sini Alaw par.

¹³Tiki dama tiliŋ haw ɗa, muni te siiwa Alaw, wala gai biri midiɗi kai ɗa a zuva ɗi?

¹⁴Kadai tiɓ, ɗif na wus n’a hina ayir midini mogokai ɗa, a wala zi siyer burini kai ɗi?

¹⁵Amma buriɗi muni na te hina ayirɗi a wula mogokai ɗa, a wala zi kol buriɗi kai ɗi? Buri ɓa ayir na midiɗi ɗa a wala zi gan n’a sa siɗi.

¹⁶Na ɓa ɗif a dara a sispa ɗa, tiyi mi ɗa zi sda hanɗa arbaɗi nɵa kai, tipi na wiini Alaw a na zaŋ ɵa kaalai.

¹⁷Miɗi na mu dara mu miɗiŋki ɗa a na ɓa: Dingi na ki ɗa diŋgi ɗa, a na buri sda na pɗem kai, amma a wala n’a tuuriki na ɗa a tûûri.

¹⁸Wala na mu muɗaŋ avut ɗa ɓa, mu na ɵina ɓa won hlai na ki diŋgi li war tipi ɗa, ɓraw a na arbaki, mu yima seŋ hanɗa agwi lai.

¹⁹A futini, ɓraw a kiɗa a za arbaki ɵa, kapai nagai n’e ɗa gdaŋai war tanai ɗa, e siɗi aŋ siŋki edi.

²⁰Buri nɵa, hlai na ki diŋgi na ɗa, a na burini simi simi na koskoi na wiini Epiɗ-ɗai ɗa kai;

²¹buri ɓa won hlai na ki diri ki simi ɗa, asiya, ɗi paŋ a purma midini simi na wiini tar tar, ɗif zamai ɗa a hina wiyamai blaŋ, na zamai ɗa gai ciini su.

²²Tiki ɗa dalamki na tiki ki kiɗi aŋ simi warni lai, ki ci warni lai aŋ kai ɗi? Zaw ki miisi na ɗa a tipi na wiini Alaw ɗi, won hlai na ki tikiɗi siyer wiiɗi nagai na walaɗi aŋ kai mai hanɗa ɵa ɗa? Aga mu muɗa buriki ɗa a maŋ Mu kuliki kiɗi ɗi? Mu kuliki a kûli kai.

²³Ta ɗa, wala na mu navaŋsi sin Epiɗ-ɗai par ɗa, mu miɗiŋki ya. Buri Epiɗ-ɗai Yesu, war duvuk n’e diri e sin edi tiɗi ɗai ɗa, a tika peŋ ɗaw;

²⁴asakal n’a za tese ya, a ɓurwaŋ, a muɗa: "Hanɗa a sa, n’a sa edi buriki, ki zi hanɗa kapai miɗiki a kɵa gaya."

²⁵A za gaiɗi kup ɗa nɵa lai, asakal n’e simi ya, a muɗa: Kup hanɗa a bonu na hehe, war fel na wiya, hlai paŋ na ki ci war kup hanɗa, ki zi hanɗa kapai miɗiki a kɵa gaya.

²⁶Buri ɓa, hlai paŋ n’aga ki limi peŋ hanɗa, n’aga ki ci warɗi kup hanɗa par lai ɗa, ki miɗi edi na ɗa midini mrini Epiɗ-ɗai haa hlai n’a halasi.

²⁷Buri nɵa, asiya ɗi paŋ n’a luma peŋ, zaw n’a ca war kup na wiini Epiɗ-ɗai sini gai zizini kai ɗa, aga a nava seŋ burini sini gaini fel na wiini Epiɗ-ɗai ɗa.

²⁸Nɵa, asiya ɗi paŋ aga a fufuka sini gaini midini dama, na ɓa a kiɗa a suma sini a ca felni lai ɗa.

²⁹Buri ni n’a suma, n’a ca lai, a sɗa ɓa hanɗa a sini Epiɗ-ɗai kai ɗa, a suma lai, a ca lai na ɗa, a kuɗi-sariya midini sini dama.

³⁰Arbaki ɗa, zi veglek gaiɗi na hurofai e ɗa viya na ɗa buri hanɗa viya e mri lai.

³¹Amma na ɓa tumu dama mu zutumu sariya li wiini sumu ɗa, Alaw aga a zumu sariya kir kai.

³²Amma Epiɗ-ɗai a zumu sariya na ɗa buri a gudumu, kapai sariya te ko mudumu gaiɗi ɗai na yai ɗa kai.

³³Nɵa ɗa, tawalakaya, won hlai na ki diŋgi li buri simi ɗa, sai ki biyi marki.

³⁴Na ɓa ɗif, wiyamai t'aŋ mini ɗa, aga a sumasi ahani par, kapai won hlai na ki diŋgi li ɗa, ki kisi kuɗi-sariya miɗiki kai. Burini zilbi zamai n’a hina ɗa, aga mu talaŋ won hlai na mu halaɗi li arbaki ɗa.