Read Mousgoum 1 Korintekai 12 Bible Online

1 Korintekai 12 - Mousgoum bible

1 Korintekai 12

¹Tawalakaya, burini like zi seze, mu firya ɓa ki hini war siɗi-kai kai.

²Tiki ki siɗi maɵa ɗa, won hlai na ki ɗisi ka aŋ ɗai zi yimi kai hai ɗa, ki ɗifu yaw gaini tirɗi gaini sipi edi, pini alawai zi rgi na mini a muɗa seŋ kai.

³Buri nɵa mu miɗiki: Ɗif n’a yika sini ɓa, a ɗif n’a muɗa seŋ pin Seze na wiini Alaw, n’a muɗa ɓa: Yesu a tusa li aŋ kai zaŋ. Ɗif n’a kiɗa a muɗa ɓa: Yesu a Epiɗ-ɗai aŋ kaalai, na ɓa gaini war Seze-sɗik kai ɗa.

⁴Like zi yum ɗa a na viya, amma Seze ɗa a ni ktai.

⁵Sda ɗa a na viya, amma Epiɗ-ɗai ɗa a ktai.

⁶Sda n’abakai n’a za ɗa a na viya, amma a za wazagai paŋ ɗa a Alaw ni ktai, war paŋ.

⁷Buri Seze a kiɗa a za sda gaini asiya asiya paŋ, war wala na pɗem buriɗi ɗai na doogo.

⁸Buri seze a kiɗa a sa sin ktai aŋ muɗa seŋ zi yel, sin na zamai aŋ muɗa seŋ zi siɗi,

⁹sin na zamai ɗa a sini yimi a Seze ni dama, sin na zamai ɗa a like zi zûûli, a Seze ni ɵa ktai.

¹⁰Ɗif zamai ɗa, a kiɗa a za wazagai zi hiila n’abakai, na zamai ɗa a muɗa ɗa a seŋ na wuze, sin na zamai ɗa, aŋ za ɓraw arbani seze, sin na zamai aŋ muɗa gaini meme zamai zamai, sin na zamai ɗa, aŋ bunda seŋ edi lai.

¹¹Amma wazagai hanɗa paŋ ɗa a zaŋ ɗa a Seze ni ɵa ktai, a ɓurwaŋ sin asiya asiya paŋ maini n’a dara nɵa.

¹²Buri ɓa, maini na si a ktai gaini ali-tini-si viya nɵa, ali-tini-si na viya hanɗa gaini viyani paŋ tekeɗeɗi, a na war si ktai, Kristu a na mai hanɗa ɵa lai.

¹³Buri ɓa, tumu paŋ, mu mumu war Seze ktai, -Yudeyakai kai, pinziba na zamai ɗa kai, begekai kai, kempekai kai, - tumu paŋ mu nuvumu ɗa a baptisme ni ktai, kapai mu bundumu aŋ wiini si na ktai hanɗa, tumu paŋ mu cumu ɗa a seze a Seze ni ktai.

¹⁴Nɵa, si ɗa a hlai ktai ta kai, amma a ali-tini-si na gaini abaini paŋ.

¹⁵Na ɓa azi te muɗa fu ɓa: Ta mu ti kai, nɵa mu kiɗa mu tapa war si kai ɗa, te na ɗa arbani ali-tini-si ɵa.

¹⁶Na ɓa ɵime a muɗa fu ɓa: Ta m’arai kai, buri nɵa mu tapa fu war si kai ɗa, a na arbani ali-tini-si ɵa.

¹⁷Na ɓa si paŋ a nafu arai ɗa, ɵime ɗa e piyiŋsi wata par ɗa? Na ɓa si paŋ a nafu ɵime ɗa, merfeŋ zi lûgûzi wala ɗa e piyiŋsi wata par ɗa?

¹⁸Nɵa, Alaw a tika ali-tini-si paŋ war hlaini ta ta ta, maini n’a daraŋ nɵa.

¹⁹Na ɓa ali-tini-si paŋ ɗa a nafu aŋ ahi-tini-si ktai ta ɗa, nɵa si na gaini abaini a siɗa aŋ za ɗi?

²⁰Nɵa ɗa, tiyana ɗa ali-tini-si a na viya, amma si ɗa a ktai.

²¹Arai te kiɗa te miɗiɗi wiiɗi ti ɓa: jaaŋa gaiku kai kai, zaw humok a miɗini wiini azi ɓa: jaaŋa gaiki kai kaalai.

²²Maini na mu tuluŋmu na ɗa ɵa, ali-tini-si n’a tala armu ɓa a nafa gara kai ɗa, sdani a na lai.

²³Ali-tini-si n’a tala armu haharai gara ɗa, mu zuzunuŋmu ɗa a suwa na zamai ɗa paŋ. Nɵa ali-tini-sumu n’a tala armu nafani aŋ kai ɗa, mu zuzunuŋmu gai futini a suwa paŋ ɗa, a ni ɗa lai.

²⁴Ali-tini-si n’a jufa gara ɗa, jaani ɗif sini buri a zzinaŋ kai. Amma Alaw a zizina si ɗa maini nɵa, ali-tini-si na nafani kai ɗa, zizinini viya viya a suwa na hanɗa,

²⁵kapai ɓraw a za war si kai ɗa, a pɗem ɓa ali-tini-si paŋ ɗa a hiina midini marni

²⁶Na ŋa ahi-tini-si ktai aŋ war gir ɗa, na zamai paŋ ɗa, aŋ war gir lai, na ɓa ktai arbani a nava kol li ɗa, na zamai ɗa a firya gaini lai.

²⁷Tiki ɗa ki ɗi si na wiini Kristu, gai hlaiki paŋ ki ɗa war si hanɗa, ɗif paŋ a ahi-tini-si gaini midini-midini.

²⁸Amma war tipi ɗa, Alaw a miliɗi edi avut ɗa e ɗi apostelai, n’e gi wulaɗi ɗa e ɗi ɗai na min Alaw, n’e gi aŋ hu ɗa e ɗi ɗai zi hitri, asakal par ɗa a like zi hiila, asakal hanɗa a like zi zuuliɗi zi veglek, like zi zinai, like zi giɗimi hlai, like na wiini meme na kiini kiini.

²⁹Paŋ e ɗi apostelai ɗi? Paŋ e ɗi ɗai na min Alaw ɗi? Paŋ e ɗi ɗai zi hitri ɗi? Paŋ e zi wazagai zi hiia paŋ ɗi?

³⁰Paŋ e ɗa gaini like zi zuuliɗi zi veglek ɗi? Paŋ e miɗi seŋ gaini meme na kiini kiini ɗi? Paŋ e bindi seŋ edi paŋ ɗi?

³¹Ki piyi ɗa a like zi yum na pɗamai a suwa ɗa. Mu dara mu siŋkitiki futi na pɗemi na te suwa na zamai ɗa paŋ.