Read Mousgoum 1 Korintekai 13 Bible Online

1 Korintekai 13 - Mousgoum bible

1 Korintekai 13

¹Koo ɓa mu muɗa meme na wiiɗi ɗai paŋ, mu muɗa meme na wiiɗi ɗai zi ɵeŋ na war fuŋ n’Alaw lai, tekeɗeɗi, na ɓa diri wara kai ɗa, mu na maini kawai zi kiya n’a suura gara, zaw maini burzina zi kawai na tuwini wa nɵa.

²Koo ɓa m’aŋ gaini like zi miɗi seŋ na wuze mada, koo ɓa mu kiɗa mu sɗa wazagai zi ŋoyai ɗa paŋ, mu sɗa siɗi paŋ lai tekeɗe, koo ɓa yimi na wiya ɗa a yimi n’abai n’a kiɗa a jogo huwaŋai edi tekeɗeɗi, na ɓa diri wara kai ɗa, mu wala kadai.

³Koo ɓa mu ɓurwa wazagaiŋa ɗa edi paŋ kafa tekeɗe, koo ɓa mu sa sa edi ta aŋ yi edi lai, kapai mu nava kol buri hanɗa tekeɗeɗi, na ɓa diri war kai ɗa, wazagai hanɗa a zina pa kai.

⁴Diri a ziya seŋ, diri ɗa a melke, diri a za sile kai, diri a kola sini kai, dir a zila sini amai kai,

⁵a za wala n’a tala meefeŋ kai, a paiya ɗa a pɗem na wiini sini dama kai, a za hiy kai, a tika hiini na meefeŋ warni ta kai,

⁶A firiya burini jre-ɗikat-kai kai, amma a firiya war jre.

⁷Diri ɗa a sa ni burini tuwur paŋ, a baiya pin ɵeɗ war wazagai paŋ, a yima gir paŋ sini.

⁸Diri ɗa a vada edi kai zaŋ. Seŋ na wuze na wiiɗi ɗai na min Alaw koo? Seŋ hanɗa aga a daba. Meme na kiini kiini koo? Aga a ɗiya. Siɗi ɗa koo? Hanɗa pŋ aga a daba lai.

⁹Buri ɓa siɗi na wiimu ɗa a na agwi, agwi kadai. Seŋ na wuze na mu muɗuŋmu na ɗa a na agwi agwi kadai lai.

¹⁰Amma won hlai na vi n’amai a za li ɗa, wazagai n’agogoi hanɗa aga a ɗiya kafa.

¹¹Won hlai na mu naka agwi hai ɗa, mu muɗa seŋ maini arwagwi n’agwi ɵa, hiinaŋa maini arwagwi n’agwi ɵa, mu za wala maini arwagwi n’agwi ɵa lai, tiyana na mu za li aŋ ɗif n’abai ɗa, mu hina sda z'aliogai ɗa edi ta.

¹²Tiyana mu tulumu wazagai na ɗa maini war kotrom ɵa, ɵihiɗ nɵa, amma war mefeŋ ni ɗa, aga mu tulumu wazagai paŋ edi gaglai. Nɵa aga mu sɗa wazagai paŋ edi gaglai, maini n’Alaw a sɗaŋasi ta ɗa nɵa.

¹³Nɵa tiyana ɗa, yimi lai, biyi-na-pin-ɵeɗ lai, diri lai ɗa, wazagai na hu hanɗa a na, amma n’abai arbani hanɗa paŋ ɗa a diri.