Read Mousgoum 1 Korintekai 14 Bible Online

1 Korintekai 14 - Mousgoum bible

1 Korintekai 14

¹Fiɗi was aŋ piyi diri ɗa, piyi like zi seze lai, a suwa paŋ like zi miɗi seŋ na wuze. Aŋ miɗi maiɗi ɗai na min Alaw nɵa.

²Buri ɗif n’a muɗa gaini meme na zamai ɗa, a miɗiɗi wiiɗi ɗai kai, amma wiini Alaw, buri ɗif ktai maa a kiɗa a ɵina ezini edi kai. A muɗa wazagai zi ŋoyai na ɗa war Seze.

³Amma ɗif n’a muɗa seŋ na wuze edi ɗa, a muɗa ɗa siɗi ɗai buri a rgiɗi amai, buri a siɗi arai zi pi, buri a s gdaŋ wiiɗi ɗai lai.

⁴Ɗif n’a muɗa gaini meme zama zamai ɗa, a rga amai ɗa a sini dama, amma ni na muɗ seŋ na wuze edi ɗa, a rga amai ɗa a tipi paŋ.

⁵Mu firya ɓa, tiki paŋ ki miɗi meme na kiini kiini ɗa, amma pɗem a suwa ɓa k zi aŋ ɗai n’e miɗi seŋ na wuze edi. Ɗif n’a muɗa seŋ na wuze edi ɗa, ni abai a suwa ɗif n’a muɗa gaini meme zamai zamai ɗa, sai na ɓa ni n’a muɗa gaini meme zamai zamai ɗa, a bundaŋsi edi, kapai a zina pini tipi aŋ rga amai.

⁶Tiyana ɗa, tawalakai, na ɓa mu halaɗi fu arbaki aŋ miɗiki gaini meme zamai zamai ɗa, mu nifiki tiɓ war a ma ɗa? Na ɓa mu miɗiki fu seŋ ktai n’Alaw a yimaŋa ara ɗi, zaw siɗi ktai ɗi, zaw seŋ na wuze ɗi, zaw hitri ktai ɗi ɗa, pɗem a suwa kai ɗi?

⁷Na ɓa wazagai na suŋfa warni kai na tuwini a wa edi maiɗi algeta zaw, gaŋgraŋ ɵa, na ɓa tuwini a wa edi gaglai kai ɗa, yamai n’e ɗa ziniti gaini ɗa, ɗif a kiɗa a siɗiti maɵa maɵa ɗa?

⁸Na ɓa fana zi gaw ɗa, tuwini a wa edi gaiɗi futini kai ɗa, ɗif n’aga a zizina sini mini hatam ɗa asiya ɗa?

⁹Nɵa tiki lai, na ɓa ki miɗi gaini meme na zamai, n’a muɗa edi gai futini kai ɗa, seŋ n’aŋ warni ɗa, ɗai aga e ɵiniŋ maɵa maɵa ɗa? Ki miɗi na ɗa arni semer kadai kai ɗi?

¹⁰Meme na warɗi yai ɗa a na kiini kiini viya, arbani ɗa ktai n’a muɗa wala edi gaglai kai aŋ kai.

¹¹Na ɓa meme ktai a na muɗa, na mu ɵinaŋ kai ɗa, mu na mukru, arni ni n’a muɗa seŋ hanɗa, ɗif n’a muɗa seŋ ɗa ɗe, a mukru wuzani ara ta lai.

¹²Tiki nɵa lai, na ɓa ki ɗa piyi like na war Seze ɗa, aga ki piyi aŋ niviŋ abai a suwa, amma buri a rga tipi amai.

¹³A zuva ɓa, ni n’a muɗa gaini meme na zama zamai ɗa, a siiwa Alaw, kapai a nava like n’a bunda seŋ hanɗa edi gaini lai.

¹⁴Na ɓa mu siiwa gaini meme zamai ɗa, sezeŋa ɗa aŋ war siiwa, amma yelŋa ɗa a na z sda kai.

¹⁵Kapai mu z maɵa ɗa? Aga mu siiwa war Seze, amma aga mu siiwa gaini yelŋa lai. Aga mu zina yama war Seze, mu zina yama gaini yelŋa lai.

¹⁶Buri ɓa, ku muɗa miɗi zi zini tese ɗa war Seze kiini kai, ɗif na siɗini aŋ kai n’a na arbaɗi ɗai dam ɗa, a kiɗa a yima amen pini zini tese na wiiku maɵa maɵa ɗa? Buri ɓa wala na ku muɗaŋ mal ɗa, ni a sɗaŋ kai

¹⁷Tuku, ku muɗa na ɗa, a miɗi zi zini tese na pɗamai fakat sme, amma a rga maiku ɗa amai kai.

¹⁸Mu sa tese sin Alaw, buri ɓa mu muɗa meme na zamai ɗa mu sûwiki tiki paŋ.

¹⁹Amma war tipi ɗa, na ɓa mu muɗa seŋ ɵim gaini yelŋa aŋ hitriɗi na zamai ɗa, tala ara pɗem a suwa eŋ dubu doogo na mu muɗaŋ gaini meme zama zamai.

²⁰Tawalakai, won hlai na ki hiini wala ɗa, ki zi siki maiɗi aliogoi nɵa kai, burini meefeŋ ɗa, ki kiɗi ki tili siki maiɗi aliogoi ɵa, amma won hlai na ki ki diri ki hiiniki wala aŋ ziŋ ɗa, zi siki aŋ ɗai na wûliɗi gai dibi ta.

²¹Aŋ gai ɗû war gadai ɗa maini nɵa: Epiɗ-ɗai a muɗa: Aga mu muɗa siɗi ɗai hanɗa, war miɗi ɗai na war meme na zamai war miɗi ɗai n’edi par lai, gaini hanɗa paŋ tekeɗeɗi, aga e ɵini ma kai.

²²Buri nɵa, seŋ zi miɗi na gaini meme na kiini kiini ɗa a wala zi siŋki buriɗi ɗai n’e yimi ɗa kai, amma buriɗi n’e yimi-kai ɗa. Amma seŋ na wuze ɗa, a wala zi siŋki buriɗi n’e yimi-kai ɗa kai, amma buriɗi zi yimi.

²³Buri nɵa, na ɓa tipi na gaini abaiɗi paŋ e zi diŋgi, na ɓa ɗai paŋ e miɗi gaini meme zamai zamai, na ɓa ɗai zi siɗi-kai zaw, zi yimi-kai ɗi, e liɓisi li midiɗi ɗa, aga e ymiki ɓa ki ɗi ɗai zi duulakai kai ɗi?

²⁴Amma na ɓa paŋ e miɗi seŋ na wuze edi, na ɓa ɗif zi yimi kai zaw na siɗini aŋ kai ɗi a luɓasi li midiɗi ɗa, seŋ na ɗai e miɗiŋ ɗa aga a yima hiinini, aga ɗûkliti sariya midini lai.

²⁵Hiini zi ŋoyai n’aŋ warɗi agulni ɗa, aga a siŋka edi gaglai, aga a pa arni azumai midini afti, a siiwa Alaw lai, a muɗa ɓa: Alaw a na arbaki jre jre.

²⁶Nɵa tawalakai, aga ki zi ɗa maɵa maɵa ɗa? Won hlai na ki tipi li ɗa, na ɓa ɗif zamai aŋ gaini yama, n’a zamai aŋ gaini hitri, na zamai aŋ gaini wala n’Alaw a siŋkiŋni arni, na zamai aŋ gaini seŋ mini gaini meme na zamai, na zamai aŋ gaini like zi bindi seŋ edi, nɵ a zuva ɓa, hanɗa paŋ a za burini rgi n’amai na wiini tipi.

²⁷Naɓa ɗai e ɗa miɗi gaini meme zamai zamai ɗa, a pɗem ɓa a suwa ɗai sulu gai hu kai. Ktai muɗa ta, asakal par na ktai a muɗa ta lai, a zuva ɓa ɗif n’a bunda seŋ edi a na lai.

²⁸Na ɓa ɗif n’a bunda seŋ edi aŋ kai ɗa, a pɗem ɓa war tipi ɗa, ɗif a muɗa seŋ kai, ɗif paŋ a muɗa sini suŋfani dama, wiini Alaw lai.

²⁹Amma, na ɓa ɗai na min Alaw e diri e miɗi seŋ ɗa, a zuva ɓa e suwi sulu gai hu kai, na zamai ɗa e tiki hangalɗi sin seŋ n’e ɗa miɗiŋ ɗa.

³⁰Na ɓa Alaw a siŋkini li wala arni ɗif amlai war tipi ɗa, ɗif n’a na amai zaw aŋ muɗa seŋ ɗa, a ɓa mini ɓa, a sumna azumai dam.

³¹Kadai tiɓ ɗa, tiki paŋ ki kiɗi ki miɗi seŋ na wuze edi, gai hlaiki paŋ, ktaiya kyaiya, haa ki vidi, kapai ɗai paŋ e nivi hitri, e nivi arai zi pi lai.

³²Buri seze na wiiɗi ɗai na min Alaw a ɵina piɗi ɗai na min Alaw lai.

³³Buri ɓa Alaw ɗa, a Alaw zi tuurli kai, amma a Alaw zi ɵeɗ. Maini n’a na za war tipi na wiiɗi na sɗik paŋ nɵa,

³⁴zuva ɓa awar tipi ɗa, falakai e simni hiyak, amlai war tipi, futi te sa siɗi aŋ miɗi seŋ kai. E simni war hûsi, maini na gadai a muɗaŋ ɗa nɵa.

³⁵Na ɓa e diri e zilbi burini wala, aga e zilbiɗi maɵagaiɗi dama aha, buri ɓa a zuva siɗi muni aŋ muɗa seŋ war tipi kai.

³⁶Zaw seŋ n’Alaw a halasi ɗa ahaki par ɗi? Zaw a sa siki tiki kiiki ɗi?

³⁷Na ɓa ɗif a tala sini ɓa ni a ɗif na min Alaw, zaw a za na ɗa gaini seze na wiini Alaw ɗa, aga a sɗa ɓa wazagai n mu ɗoŋɗi siki na ɗa, a seŋ zi gadai na wiini Epiɗ-ɗai.

³⁸Amma na ɓa ɗif a yima ɵ a kai ɗa, Alaw aga a sɗaŋ kaalai.

³⁹Buri nɵa, tawalakai, piyi aŋ miɗi seŋ na wuze edi, miɗi na gaini meme zamai zamai ɗa ɗe, hiniŋ a za lai.

⁴⁰Amma a zuva ɓa, paŋ a za maini n’a zuva ɓa a za ɗa ɵa, gai kiti pini marni marni.