Read Mousgoum 1 Korintekai 15 Bible Online

1 Korintekai 15 - Mousgoum bible

1 Korintekai 15

¹Tawalakaya, mu dara mu miɗiki pra gaini labar na pɗem na mu ɓakaŋ siki, na tiki ki yimiŋ, ki ɗiyi gdaŋ warni lai,

²na gaini hanɗa ki ɗa warɗi futi zi kûri, na ɓa ki yimiŋ li maini na mu miɗiŋki ɵa ɗa, na ɓa ɵa kai ɗa, yimi na wiiki ɗa a wala kadai.

³Seŋ n’abai ɗa ɓa, wala na ta mal mu navaŋ aŋ wiya ɗa, mu saŋ siki hanɗa ɓa pin ɗû ɗa, Kristu a mra burini tuwurmu.

⁴Pin ɗû ɗa, a piŋ ya, a ɵiya amai war mri par war mefeŋ n’ag'aŋ hu.

⁵A siŋka sini arni Kefas, asakal hanɗa arɗi na doogo pi sulu lai.

⁶Asakal hanɗa a siŋka sini arɗi tawalakai e suwi miya ɵim, abaiɗi paŋ e ɗa karɗi hai, amma zamai arbaɗi e mri ya lai.

⁷Asakal hanɗa a siŋka sini arni Yakob, asakal par pra arɗi apostelai paŋ lai.

⁸Asakalɗi nagai par ɗa a siŋka sini ara ta lai, ta na mu tala maini ahi n’e sirɓiŋ edi gai sirɓi nɵa.

⁹Kadai tiɓ ɗa, ta mu n’agwi n’arbaɗi apostelai paŋ, mu kiɗa mu yika maa aŋ apostel kaalai, buri mu ziɗi gir wiiɗi tipi na wiini Alaw.

¹⁰Amma pin yumni Alaw ɗa, mu bunda maini na ki ɗa tiliŋa na ɗa ɵa, yumni n’a zaŋ sa ɗa, a ɓa edi kadai kai, mu za sda maa mu sûwiɗi paŋ, amma hanɗa mu ta gaini mada dama kai, amma a yumni Alaw n’a na za sda gaya.

¹¹Nɵa ɗa, koo ɓa mu ta, koo ɓa e ɗi nagai ɗi ɗa, ɓikini-seŋ na wiyi a na mai hanɗa ɵa. Hanɗa a wala na tiki ki yimi pini ɗa lai.

¹²Na ɓa tiyi mi ɓiki seŋ ɓa Kristu a ɵiya amai war mri par ɵi ɗa, zamai arbaki par yaw, e siɗi aŋ miɗi ɓa ɵiyi-n’amai na wiiɗi ɗai zi mri aŋ kai ɗa, maɵa maɵa ɗa?

¹³Na ɓa ɵiyi-n’amai na wiiɗi ɗai zi mri aŋ kai ɗa, nɵa Kristu a ɵiya amai kaalai.

¹⁴Na ɓa Kristu a ɵiya amai kai ɗa, seŋ na tiyi mi ɓikiŋ hanɗa a wala kadai, yimi na wiiki ɗe a wala kadai lai.

¹⁵Tiyi maa, mi bindi arɗi ɗai maiɗi zaidaki z'ealasakai nɵa, burini Alaw, buri mi zi zida midini Alaw ɓa a ɵiya Kristu amai ɵi, kapai n’a ɵiyaŋ amai kai, na ɓa a jre ɓa zi mri aga e ɵiyi amai kai ɗa.

¹⁶Buri ɓa na ɓa zi mri ɗa, e ɵiyi amai kai ɗa, Kristu a ɵiya amai kaalai.

¹⁷Na ɓa Kristu a ɵiya amai kai ɗa, yimi na wiiki ɗa a wala kadai, tiki ki ɗa war tuwurki hai,

¹⁸nɵa nagai n’e mri war Kristi ɗe, e bi edi kadai lai.

¹⁹Na ɓa biyi-na-pin-ɵeɗ na wiimu na war Kristu ɗa a na burini sda na mai hanɗa ɵa ɗa, haw na wiimu ɗa a n’a suwa na wiiɗi ɗai paŋ.

²⁰Amma Kristu a ɵiya amai war mri par ya fakat fakat, a bunda aŋ merfeŋni seyem n’arbaɗi zi mri n’e ɵiyi ɗa.

²¹Buri ɓa mri a halasi ɗa pin ɗif ktai, ɵiyi-n’amai na wiiɗi ɗai zi mri ɗa a halasi pin ɗif ktai lai.

²²Maini na ɗai paŋ e mri war Adam nɵa, nɵa lai ɗai paŋ aga e bindi karɗi war Kristu.

²³Amma asiya asiya paŋ war hlaini hlaini. Tiyana ɗa a Kristu na merfeŋi seyem, asakal par won hlai na waisili ɗa, e ɗi nagai na wiini Kristu ɗa lai.

²⁴Asakal hanɗa a dibini hlai lai, won hlai n’aga a siti pai wiini ni n’a Alaw, a Api lai, won hlai n’a iditi li abai paŋ edi, a vada spak paŋ li edi gaini gdaŋ paŋ edi lai.

²⁵Buri ɓa aga a ŋa pi haa a miliɗi gawni paŋ azumai pin ezini.

²⁶Gawni n’asakal n’aga a vada gaini tar ɗa a mri.

²⁷Buri Alaw a mula wazagai paŋ azumai pin ezini, amma won hlai na seŋ a muɗa ɓa: Wazagai paŋ a mula azumai pini ezini ɗa, a siŋka na ɗa ɓa ni n’a mula wazagai paŋ azumai pini ezini ɗa, ni a na arbani wazagai hanɗa kai.

²⁸Amma won hlai na wazagai paŋ a mula li azumai pini ezini ɗa, nɵa Ahi gaini midini dama aga a hina sini azumai pin ni n’a mula wazagai paŋ azumai pini ezini ɗa, kapai Alaw a va amai war wazagai paŋ.

²⁹Na ɓa ɵa ɗa, nagai n’e nivi baptisme war balamɗi ɗai zi mri ɗa, e piyi tiɓ ɗa a ma ɗa? Na ɓa zi mri e ɵiyi fu amai kai ɗa, nagai e nivi baptisme war balamɗi tiɓ buri ma ɗa?

³⁰Tiyi ɗa kureɗ, siyi min mri ɵa yaw buri ma ɗa?

³¹Tawalakai, mefeŋ paŋ m’an na min mri ɵa kureɗ, amma tiki ki ɗi kol na wiya, war Kristu Yesu Epiɗ-ɗai na wiimu.

³²Hatam na muhitimasi gaini wazagai n’ezini puɗu puɗu war Efesus ɗa, ribaŋa na warni tiɓ a ma ɗa? Na ɓa mu zaŋ na ɗa burini arɗi ɗai ɗa; na ɓa zi mri aga e ɵiyi amai kai ɗa, sumumu mumu lai, cumu mumu lai, buri ɓa dawai ɗa aga mu mrumu.

³³Ki zi hangal, ki wili siki edi kai, paiyai gaiɗi na maafanai ɗa a ɓilka hangalni ɗif na pɗem.

³⁴Wiyisi war hiini na pɗem jre jre, ki zi tuwur kir kai, buri zamai arbaki e siɗi Alaw kai zaŋ, mu muɗa hanɗa aŋ wala zi siyer buriki.

³⁵Amma ɗif a kiɗa a muɗa ɓa ɗai zi mri e ɵiyi amai ɗa maɵa mɵa ɗa? E ɵiyi amai gaini si na maɵa maɵa ɗa?

³⁶Tuku na tatala, wala na ku suuɗaŋ azumai ɗa, na ɓa a mra kai ɗa, a kiɗa a diyasi amai ɗi?

³⁷Na ku suuɗaŋ azumai na ɗa a si n’aga a diyasi amai ɗa kai, a seyem kadai, a na wiini algama, zaw a na wiini wala zamai ɗi,

³⁸Asakal par Alaw a sini si pin diri na wiini, seyem na wata ɗi paŋ gaini si na wiini wiini.

³⁹Neŋ -si paŋ ɗa a na kal kal kai, neŋ-si na wiiɗi ɗai a na, na wiini wazagai n’ezini puɗu puɗu a na, na wiini wala zi ɗifli a na, na wiini hilif a na lai.

⁴⁰Si na wiini fuŋ-n’Alaw a na, si na wiiɗi i yai a na lai, amma si na fuŋ-n’Alaw ɗa juf na wiini a na, na wiini si na wiiɗi yai ɗa a na lai.

⁴¹Juf na wiiɗi futi a na, na wiini tile a na lai. Meeɵek ɗa maa, jufni mai marni ɵa paŋ kai.

⁴²Zliyi-n’amai na wiiɗi ɗai zi mri a na ɗa maini nɵa lai, ku pa azumai sek ɗa war si zi ɓilki n’edi, amma ku ɵiya amai war si na ɓulka edi kai.

⁴³Ku pa azumai sek ɗa war haw, amma ku ɵiyasi amai ɗa warɗi abai, ku pa zumai sek ɗa war huruf, ku ɵiyasi amai war spak.

⁴⁴Ku pa zumi sek ɗa war si zi neŋ, ku ɵiyasi amai ɗa war si zi seze. Na ɓa si zi neŋ a na ɗa, si zi seze a na lai.

⁴⁵Pin hanɗa aŋ gai ɗû maini nɵa: Adam, ɗif n’avut ɗa a bunda aŋ wala na karni, na gaini neŋ sini lai, Adam n’asakal ɗa, a bunda aŋ Seze n’a sa suŋfa.

⁴⁶Avut ɗa a wala na war seze kai, a wala na war neŋ-si ɗa, na war seze ɗa a hlai ɗa asakal par.

⁴⁷Ɗif n’avut ɗa a yimasi edi arni afti par, a za ɗa gaini alogodo n’ag'aŋ sulu ɗa a halasi amai ahani Alaw par.

⁴⁸Ɗif n’a rga gaini fti ɗa a na mai hanɗa ɵa, nagai n’e rgi gaini afti paŋ ɗa, e ɗa mai hanɗa ɵa lai. Ɗif n’amai ahani Alaw par ɗa, a na mai hanɗa ɵa, nagai n’amai ahani Alaw par e ɗa ɗa ɵa lai.

⁴⁹Tumu mu wmu si n’a ziŋga si na wiini ni n’e ziŋ gaini afti ɗa sumu, nɵa aga mu wumu si n’a ziŋga na wiini ni n’amai ahani Alaw par ɗa sumu lai.

⁵⁰Tawalakaya, mu muɗa na ɗa ɓa neŋ-si gaini fel ɗa a kiɗa aŋ niviti pai-n’Alaw aŋ bulum kai, wala na ɓulka edi ɗa a kiɗa aŋ nava ɓilki-n’edi kai ɗa aŋ bulum kaalai.

⁵¹Mu dara mu miɗiki wala zi ŋoyai ktai, tumu aga mu mrumu paŋ kai, amma gai hlaimu paŋ aga mu bundumu kafa,

⁵²hlai n’agwi kadai, tizaw tar, won hlai na faana n’asakal yiba li ɗa. Buri ɓa aga a wa, zi mri aga e ɵiyisi amai war si n’a ɓulka edi kai, tumu ɗe, aga mu bundumu lai.

⁵³Buri ɓa a dewele ɓa, si zi ɓilki n’edi a wa si zi ɓilki n’edi kai sini, si zi mri, aga a wa si zi mri-kai sini lai.

⁵⁴Won hlai na si zi ɓilki-n’edi hanɗa a wa si zi ɓilki-n’edi kai sinili, si zi mri hanɗa a wa si zi mri-kai sinili lai, won hlai ni, seŋ n’aŋ gai ɗû ɓa: mri a rɓali war rɗi-n’amai.

⁵⁵Mri, rɗi n’amai na wiiku aŋ wata ɗa? mri ɵram na wiiku aŋ wata ɗa? Ɗa, seŋ hanɗa aga a va amai.

⁵⁶Zlram na wiini mri ɗa, a tuwur, spak na wiini tuwur ɗa, a gadai ɗa lai.

⁵⁷Amma tese sin Alaw n’a sumu rɗi-n’amai war Epiɗ-ɗaimu Yesu Kristu.

⁵⁸Buri nɵa tawalakaya zi diri gara, ki ɗiyi gdaŋ, ki gigiɗi kai, ki piyi aŋ zi sda na wiini Epiɗ-ɗai abai a suwa a suw wuzaki sek sek; aga ki yimiŋ miɗiki ɓa, sdaki na war Epiɗ-ɗai ɗa aga a ɓa edi kadai kai.