Read Mousgoum 1 Korintekai 2 Bible Online

1 Korintekai 2 - Mousgoum bible

1 Korintekai 2

¹Tawalakai, won hlai na ta mu halaɗi arbaki ɗa, mu halaɗi mu miɗiiki wala zi ŋoyai na wiini Alaw ɗa, gaini seŋ zi miɗi n’a suwa marni gara kai, gaini yel n’a suwa marni paŋ kaalai.

²Buri a tala ara pɗem ɓa arbaki ɗa, mu miɗiki midini wala zamai kai, sai midini Yesu Kristu, -Yesu Kristu na gaini tuki amai sin dagra.

³Ta mal mu nasi ka arbaki huruf, war hunai gaini ziriyi n’abai lai.

⁴Seŋ na ma par gaini seŋ na mu ɓakaŋ ɗa, a wala ktai zi yel, zi yimi hiinini ɗif lai gara kai, amma wala n’a siŋkaŋ edi ɗa a Seze na wiini Alaw gaini Spak n’aŋ warni ɗa.

⁵Kapai yimiki a ɗiya midini yel na wiiɗi ɗai kai, amma war spak na wiini Alaw.

⁶Amma, n tiyi mi ɓikiŋ arbaɗi ɗai na gaini wili amai ta hanɗa a yel, amma a yel na wiiɗi ɗai na warɗi yai hanɗa kai, a na wiiɗi abakai na warɗi yai hanɗa n’aga e vidi edi ɗa kaalai.

⁷Amma mi ɓiki ɗa a yel na wiini Alaw, a wala zi hiila, n’aŋ gaini ŋûyi cok, n’Alaw a ziziznaŋsi avut par, haa gamai par, aŋ kol na wiimu.

⁸N'abakai na warɗi yai hanɗa, ktai kaw a sɗa hanɗa kai, buri ɓa, e siɗiŋ a siɗi ɗa, aga e tuki Epiɗ-ɗai n’abai n’abai ɗa amai sin dagra kai.

⁹Amma maini n’aŋ gaini ɗû nɵa: Wazagai n’arai te talaŋ kai, na ɵime a ɵinaŋ kai, na gizi war hiinini ɗif kaalai, a wazagai n’Alaw a zizinaŋ buriɗi nagai n’e diriŋ.

¹⁰Amma Alaw a siŋka hanɗa edi siyi tiyi gaglai, gaini Seze na wiini, buri Seze a fufuka wazagai paŋ, haa sin warni Alaw n’amlai paŋ.

¹¹Arbaɗi ɗai murɗakai n’a siɗa hiini n’amlai warni ɗif murɗek ɗa asiya ɗa? Sai a seze n’malai warni ɗif ɗa kai ɗi? Nɵa lai, wazagai n’aŋ warni Alaw ɗa, ɗif a kiɗa a sɗaŋ kai, sai a Seze na wiini Alaw lai.

¹²Amma tiyi, mi nivi ɗa a seze na wiiɗi ɗai na yai ɗa kai, amma a Seze n’a halasi sin Alaw par, kapai mi siɗi wazagai n’Alaw a saŋ siyi pin yumni ɗa.

¹³Tiyi mi miɗi na ɗa gaini miɗi n’e hitriŋyi e ɗi ɗai war yelɗi kai, amma gaini miɗi n’a hitriŋyi a Seze. Wazagai na wiini Seze ɗa, a muɗaŋ edi war Seze.

¹⁴Amma ɗif na war neŋ-si ɗa, a kiɗa a yima wazagai na wiini Seze na wiini Alaw kai, buri ni a na arni maini wazagai zi duuli nɵa. A kiɗa aŋ sɗa hanɗa kaalai, buri ɓa ɗif a sɗa ɓa hanɗa a wala na pɗem ɗa war Seze.

¹⁵Ɗif na war Seze ɗa, a kiɗa a fufuka wazagai paŋ, amma ni dama ɗa, ɗif a fofok kiɗa aŋ nava wala na meefeŋ sini kai.

¹⁶Buri ɓa ɗif n’a sɗa hiini na wiini Epiɗ-ɗai ɓa, kapai a siŋkini yel ɗa asiya ɗa? Amma tiyi aŋ midiyi ɗa, a hiini na wiini Kristu.