Read Mousgoum 1 Korintekai 3 Bible Online

1 Korintekai 3 - Mousgoum bible

1 Korintekai 3

¹Tawalakaya, ta ɗa mu kiɗa aŋ muɗa siki maini na siɗi ɗai na war seze nɵa kai, amma maini siɗi ɗai na war neŋ-si nɵa, maini siɗi akoɗokokai na war Kristu nɵa.

²Mu siki ɗa a fiyaw, mu siki simi na gdaŋ kai, buri ɓa gdaŋki a kiɗa aŋ yimaŋ kai, koo tiyana kaw, gdaŋki a kiɗa a yimaŋ kai ɵa,

³buri ɓa ki ɗa war neŋ-si hai. Buri won hlai na ɓa sile gaini sispai a na arbaki ɗa, ki ɗa na ɗa war neŋ-si kai ɗi? Ki piyi na ɗa maiɗi ɗai doogo waŋ kadai ɵa lai kai ɗi?

⁴Na ɓa ktai a muɗa ɓa: Ta mu wiini Paulus, na zamai ɓa: Ta mu wiini Apolos ɗa, ki zi ɵa na ɗa a seŋ na wiiɗi ɗai murɗakai kai ɗi?

⁵Apolos ɗa asiya ɗa? Zaw, Paulus ɗa asiya ɗa? E ɗi ɗai zi sda, n’e kikisi tiki war yimi. Asiya asiya paŋ n’arbaɗi a za pin like n’EPIƊ-ƊAI a saŋ sini ɗa lai.

⁶Ta mu pa luwuŋ azumai, Apolos a ma yem pini, amma n’a wulaŋ amai ɗa a Alaw.

⁷Buri nɵa, n’abai a suwa ɗa, a ni n’a pa luwuŋ azumai ɗa kai, a ni n’a ma yem pini kaalai, amma a Alaw n’a wulaŋ amai ɗa.

⁸Ni n’a pa luwuŋ gaini ni n’a ma yem pini ɗa, e ɗi nagai ktai, amma asiya ɗi paŋ aga a nava vrak na wiini pin sdani n’a zaŋ ɗa.

⁹Buri ɓa tiyi mi ɗi ɗai na mi zi sda gaini Alaw, tiki ɗa, ki ɗi vowai n wiini Alaw, ki ɗi dalam zi rgi n wiini Alaw lai.

¹⁰Pin yim n’Alaw a zaŋ sa, mu tiora ezini dalam azumai ɗa maini ɗif zi rgi dalam na yel nɵa, ɗif zamai aga a rga amai midini. Amma asiya asiya paŋ aga a tika hangalni sini wala n’a dara a rgaŋ amai midini ɗa.

¹¹Ɗif zamai aga a tora ezini dalam azumai pra kir kai, sai a na ktai n’aŋ gai tûri hanɗa, a dara muɗa Yesu Kristu.

¹²Nɵa ɗif a kiɗa a rga amai midini turini dalam hanɗa gaini or, zaw gaini arzaŋ, zaw gaini ali-fuŋ na wûrini caŋ gara, zaw gaini luwuŋ, zaw gaiɗi evek, zaw gaini brogo.

¹³Sdani ɗif paŋ aga a siŋka edi, buri mefeŋ zi sarya ɗa aga a siŋkaŋ edi, aga a siŋkasi edi ɗa arni afu par, pɗemni sdani ɗif paŋ aga a siŋkasi edi sai won hlai n’afu a tetemaŋ tam haw.

¹⁴Ɗf na sdani afu a yaŋ edi kai ɗa aga a nava vrak.

¹⁵Ɗif n’afu a ya sdani li ɗa, aga a nava wala kai. Ni gaini midini dama aga a kora sme, amma maini arni afu par nɵa.

¹⁶Tiki ki siɗi ɓa ki ɗi tempel na wiini Alaw kai ɗi? Seze na wiini Alaw a sumna warki lai, ki siɗi ɵa kai ɗi?

¹⁷Na ɓa ɗif a ɓilka tempel na wiini Alaw edi, Alaw aga a ɓilkaŋ edi lai, buri ɓa tempel na wiini Alaw a na sɗik, tempel hanɗa ki ɗi tiki.

¹⁸Hina ɗif a rha sini gaini midini dama kai, na ɓa ktai arbaki a tala sini ɓa a na yel gara, pin yel na wiiɗi yai hanɗa, a pɗem ɓa a za sini aŋ ɗif zi duuli, kapai a za aŋ ɗif zi yel.

¹⁹Buri ɓa yel na wiiɗi yai hanɗa, a duuli wuzani arni Alaw. Buri aŋ gai ɗû maini nɵa: A yimiɗi na yalakai war yel na wiiɗi dama.

²⁰Zamai pra: Epiɗ-ɗai a sɗa hiiniɗi ɗai na yalakai ya, a sɗa ɓa a na digai kadai.

²¹A pɗem ɓa ɗif a kola, burini ɗif na maini kai, buri ɓa wazagai paŋ a wiiki,

²²Koo ɓa Paulus, koo Apolos, koo Kefas, zaw duniya, koo ɓa suŋfa zaw ɓa a mri, koo ɓa wazagai n’a na za girna, zaw na dawai wuzamu sek, hanɗa paŋ a wiiki;

²³amma tiki ɗa ki ɗi wiini Kristu, Kristu a wiini Alaw lai.