Read Mousgoum 1 Korintekai 6 Bible Online

1 Korintekai 6 - Mousgoum bible

1 Korintekai 6

¹Na ɓa ktai arbaki, seŋ a na arbani gaini maini ɗa, a hala a za sariya wuzaɗi ɗai na wiini Alaw kai, amma a hala a ziti sariya wuzaɗi ɗai zi yimi kai ɗa buri ma ɗa?

²Ki siɗi ɓa aga e ɗûkliti sariya midiɗi ɗai na yai e ɗi ɗai na wiini Alaw, ki siɗi ɵa kai ɗi? Na ɓa ɗai na yai ɗa, aga ki zitiɗi sariya ki ɗi tiki ɗa, seŋ n’agogoi n’a nafa kai hanɗa ki kiɗi aŋ tiliŋ arbaki kai ɗi?

³Ki siɗi ɓa aga mu zutumu sariya wiiɗi ɗai zi ɵeŋ na war fuŋ-n’Alaw, ki siɗi ɵa kai ɗi? Azi gama ɗa, wazagai n’a na vuga arbamu warɗi yai hanɗa.

⁴Na ɓa seŋ ktai a na arbaki, burini wala ktai ɗa, tiki ki piyi aŋ zi sariya ɗa wuzaɗi ɗai na tipi e turiɗi miɗi kai ɗa.

⁵Mu muɗa na ɗa a waa zi siyer buriki. Arbaki ɗa, ɗif zi yel nɵa ktai, n’a kiɗa aŋ tala seŋ arbaɗi tawalakaini ɗa aŋ kai ɗi?

⁶Amma tawal zi yimi a ɗuula midini tawal zi yimi lai, hanɗa wuzaɗi ɗi n’e yimi kai ɗa pra.

⁷Kadai tiɓ maa, sariya n’arbaɗi marki ɗa, a wala n’a sɗa aŋ za kai. Ki yimi kaarai hanɗa siki kai ɗa buri ma ɗa? Ki hiniɗi ɗai e mili wazagaiki wiiɗi kai ɗa buri maɗa?

⁸Amma ki zi sda na maafanai, ki ɗi tiki dama, ki mili wazagaiɗi marki, ki ɗi tiki lai, paŋ ktai e ɗi tawalakaiki.

⁹Tiki ki siɗi kai ɗi? Nagai na jrekai kai ɗa, aga e niviti pai-n’Alaw aŋ bulum kai. Ki siɗi ɵa kai ɗi? Ki hini ɗif a wiliki edi kai, nagai n’aga e niviti pai n’Alaw aŋ bulum ɗa, e ɗi nagai n’e piyi warni zini maɵara ɗa kai, war hûrgi n’azumai wuzani alawai zi rgi ɗa kai, n’e fini gaiɗi falakaiɗi marɗi ɗa kai, e ɗi maɵagai n’e fini gaini marɗi, zaw falakai n’e fini gaiɗi marɗi ɗa kai.

¹⁰E ɗi na mahalakai ɗa kai, na malawai ɗa kai, n’e ciini gaini vin ɗa kai, e ɗi na sdaɗ a miɗiɗi n’e miisi marɗi ɗa kai, n’e mili wazagaiɗi marɗi ɗa kaalai.

¹¹Tiki ki ɗisi ka ɗa arbaɗi ɗai hanɗa, koo ɓa gai hlaiki paŋ kai tekeɗeɗi, amma tiyana tiki ki mi siki li edi, ki zi li edi sɗik, ki zi li edi aŋ jre-ɗikat lai, war yikini Epiɗ-ɗai Yesu Kristu, war Seze na wiini Alaw na wiimu.

¹²Mu sɗa aŋ za wazagai paŋ, ɗili mada kai, amma wazagai paŋ a pɗamai paŋ kai, mu sɗa aŋ za wazagai paŋ, ɗili mada kai, amma aga mu hina futi wiini wala ktai aŋ ŋa mada kai.

¹³Wazagai zi simi ɗa, a na burini war, war ɗa burini wazagai zi simi lai, amma Alaw aga a vadaŋ edi gaini suliɗi paŋ. Amma si ɗa, a na burini maɵara kai, a wiini Epiɗ-ɗai, Epiɗ-ɗai a wiini si lai.

¹⁴Nɵa Alaw n’a ɵiya Epiɗ-ɗai amai ɗa, aga a ɵiyumu amai lai, gaini spakni.

¹⁵Tiki ki siɗi ɓa, siki ɗa, a ali-tini-sini Kristu, ki siɗi ɵa kai ɗi? Kapai mu tika si na wiini Kristu ɗaw, mu bundaŋ edi aŋ si na wiiɗi muni zi zawar ɗa a sɗa aŋ za ɗi? Zaw kai zaŋ.

¹⁶Zaw tiki ki siɗi ɓa, ɗif n’a tapa li sini gaiɗi muni zi zawar ɗa, a bunda aŋ si ktai gaiɗi na ɗa, ki siɗi ɵa kai ɗi? Buri ɓa ɗû a muɗa: Nagai sulu, aga e bindi aŋ si ktai.

¹⁷Amma ni n’a tapa li gaini Epiɗ-ɗai ɗa, a bunda aŋ Seze ktai gaini.

¹⁸Ki pri edi wuzani maɵara ɗa. Tuwur zamai paŋ na ɗif a zaŋ ɗa, a na ɗa anene par sini kadai, amma ni n’a za maɵara ɗa, a za tuwur sin sini dama.

¹⁹Zaw tiki ki siɗi ɵa kai ɗi? Siki ɗa a tempel na wiini Seze-sɗik, n’a na warki, na tiki ki niviŋ sin Alaw par, tiki ki ŋi siki gaini miɗiki dama kai, ki siɗi ɵa kai?

²⁰Buri tiki ɗa, e wurikisi edi gaini wuri na caŋ gara, nɵa ki kûli Alaw war siki.