Read Mousgoum 1 Korintekai 9 Bible Online

1 Korintekai 9 - Mousgoum bible

1 Korintekai 9

¹Mu kiɗa mu za pini jaaŋa, buri mu kempe kai ɗi? Ta m’apostel kai ɗi? Mu tala Yesu, Epiɗ-ɗai na wiimu gaini ara kai ɗi? Tiki gaini miɗiki ki ɗi alini sda na wiya na war Epiɗ-ɗai kai ɗi?

²Na ɓa buriɗi na zamai ɗa, m’apostel kai tekeɗeɗi ɗa, buriki tiki ɗa m’apostel, buri ɓa tiki ɗa, ki ɗi tampoŋ na wiini sdaŋa z'apostel na war Epiɗ-ɗai.

³Seŋŋa na mu dara mu miɗiŋɗi wiiɗi nagai n’e piŋa seŋ mada ɗa, a na maini nɵa:

⁴Tiyi ɗa mi kiɗi mi simi lai, mi ci lai, maiɗi na zamai ɵa kai ɗi?

⁵Tiyi ɗa, mi kiɗi buri mi yimiɗi falakaiyi piyi maiɗi apostelai na zamai, tawalakaini Epiɗ-ɗai gaini Kefas lai, ɵa kai ɗi?

⁶Zaw ta gaini Barnabas ɗa, mi ɗi tiyi na mi hini, na futi buriyi, buri mi zi sda kai ɗa ɗi?

⁷Askar n’aŋ war sda ɗa a vurga sini kiini ɗi? Ɗif n’a pa luwuŋ zi vin, n’a suma alini kai a na ɗi? Ɗif n’a giɗima farai, n’a suma fiyawni kai a na ɗi?

⁸Mu muɗa! n ɵa na ɗa pin na ɗai e ɗa miɗiŋ ɗa ɗi? Zaw, gadai na wiini Musus a na muɗa ɵa lai kai ɗi?

⁹Buri aŋ gai ɗû war gadai na wiini Musus maini nɵa: Aga ku nagga min ɵeŋ won hlai n’a na giɵa wai ɗa kai. Sda n’a ɵaakai a zaŋ ɗa a fiɗini sini Alaw gara ɗi?

¹⁰A muɗa hanɗa tiɓ na ɗa buriyi tiyi kai ɗi? Nkam, wala hanɗa a ɗosi buriyi tiyi, buri ɓa ɗif n’a hirma ɗa, a hirma war biyi-na-pin-ɵeɗ, ɗif n’a giɵa seyem ɗa, a giɵaŋ war biyi-na-pin-ɵeɗ, ɓa aga a nava buri na wiini warni.

¹¹Na ɓa, tiyi mi suuɗi seyem na war seze buriki, n ɓa mi hiɗi derki na wiiɗi yai kadai ɗa, a wala ktai n’abai a suwa ɗi?

¹²Na ɓa zamai e simi siki par, mai hanɗa ɵa ɗa, tiyi mi kiɗi mi simi siki par a suwa pra kai ɗi? Gai hanɗa paŋ, tiyi mi yimiŋ wiyi siyi ɵa, kapai mi zi aŋ wala zi dibi azi burini labar na pɗem na wiini Kristu ɗa kai.

¹³Ki siɗi ɓa nagai n’e zi sda warni tempel ɗa, e nivi simiɗi warni tempel, nagai n’e zi sda midini gûwiŋ zi ɓaka ɗa, e simi ɗa war wazagai zi ɓaka hanɗa par lai, ki siɗi ɵa kai ɗi?

¹⁴Epiɗ-ɗai a gada maini hanɗa ɵa lai ɓa: nagai n’e ɓiki labar na pɗem ɗa, e simi pin labar na pɗem ɗa lai.

¹⁵Amma ta ɗa, mu nava wala ktai pin hanɗa par kai. Mu ɗo hanɗa buri ɓa e siŋasi ɗa kaalai: Marya mu mra wiya! Wala n’a saŋa firyi ɗa, ɗif a kiɗa a bundaŋ edi aŋ wala kadai kai.

¹⁶Buri ɓa, ɓikini labar na pɗem, a wala na mu kola sa burini kai, buri a na buriya a wala zi dewele, buri ɓa, gir gara buriya, na ɓa mu ɓaka labar na pɗem kai ɗa.

¹⁷A nafu ɓa, mu zaŋ na ɗa pin diriŋa ɗa, aga mu nava vrak pini, amma na ɓa mu zaŋ pin diri na wiya kai ɗa, mu za ɗa a sda n’a sasi ta aŋ zi.

¹⁸Nɵa ribaŋa tiɓ ɗa a ma ɗa? A na ɗa ɓa, mu ɓaka labar na pɗem edi, buri vrak kai, vrak na kadai tiɓ a kiɗa a sa sa burini labar na pɗem ɗa, aga mu payaŋ maini wala n’a sa sa gaini dewele nɵa kai.

¹⁹Kadai tiɓ mu bege na wiini ɗif kai, paŋ ktai mu za aŋ bege na wiiɗi ɗai paŋ, kapai mu navasi ɗai viya wiini Kristu.

²⁰Gaiɗi Yudeyakai, mu za sa maini ɗif na Yudeya nɵa, kapai mu niviɗisi Yudeyakai ɗa, gaiɗi nagai n’e ɗa pin gadai ɗa, maini ɗif n’a na pin gadai nɵa, kapai mu niviɗisi nagai n’e ɗa pin gadai ɗa lai, paŋ ktai ta gaini mada dama mu na azumai pin gadai ɗa kai.

²¹Gaiɗi nagai na gadaiɗi aŋ kai ɗa, mu za sa maini ɗif na gadaini aŋ kai nɵa lai, kapai mu niviɗisi na gadaiɗi aŋ kai ɗa, paŋ ktai wuzani arni Alaw ɗa, ta mu ɗif na gadaini aŋ kai ɗa kai, m’aŋ gai niggi war gadai na wiini Kristu.

²²Gaiɗi na hurofai, mu za sa huruf, kapai mu niviɗisi na hurofai ɗa. Mu za sa mai hanɗa ɵa gaiɗi ɗai paŋ, kapai mu kûrɗiɗi zamai edi arbaɗi par.

²³Hanɗa paŋ ɗa mu zaŋ burini labar na pɗem, kapai ta lai, mu nava vrakŋa war par.

²⁴Tiki ki siɗi ɓa, won hlai na ɗai e fikili aŋ luwi ɗa, nagai n’e luwi ɗa e ɗa viya, amma n’a nava vrak ɗa a na ktai kai ɗi? Ki luwi ɗa a luwi na kapai ki nivi vrak pini ɗa.

²⁵Ɗif n’a daba was ɗa, a ɗala sini burini simini wazagai zmai zamai. Nagai n’e zi ɵa ɗa, e ziŋ buriɗi bogorai na te kiɗa te tuura edi, amma tumu mu zuŋmu na ɗa, buriɗi bogorai na te uura edi kai.

²⁶Nɵa ta ɗa, mu na lawwa, mu lawwa na ɗa ɗar kadai kai, mu na ha kutpa, mu huwda ta na ɗa ɗar arni smer kadai nɵa kaalai.

²⁷Ta ɗa, mu na siɗini gir wiini sa, mu zini gir maini bege ɵa na ɗa ɓa, kapai ta na mu ɓaka seŋ siɗi ɗai ɗa, mu sɗa aŋ hina edi kai.