Read Mousgoum 2 Korintekai 1 Bible Online

2 Korintekai 1 - Mousgoum bible

2 Korintekai 1

¹Paulus, apostel na wiini Yesu Kristu, pin dirini Alaw, gaini tawal Timotewus, sin tipi na wiini Alaw n’a na war Korinte, gaiɗi ɗai na wiini Alaw n’e ɗa war Akaiya gaiɗi abaiɗi paŋ lai:

²Alaw n’apumu gaini Epiɗ-ɗaimu Yesu Kristu e siki yum gaini ɵeɗ.

³Kol sini Alaw, n’Epini Epiɗ-ɗaimu Yesu Kristu, Epini yum, Alaw n’a sa arai zi pi lai,

⁴ni n’a sumu arai zi pi war gir paŋ, kapai gaini arai zi pi na tumu dama mu nuvuŋmu tini Alaw par ɗa, mu suɗumu aŋ siɗi arai zi pi wiiɗi nagai n’e ɗa war gir zamai zamai paŋ lai.

⁵Buri maini girni Kristu a na viya burimu, nɵa lai, arai zi pi na gaini Kristu aga a za abai lai.

⁶Na ɓa tiyi mi ɗa war gir ɗa, hanɗa a na burini arai zi pi gaini kûri n wiiki; na ɓa tiyi mi ɗa gaini zi sda kurfuk ɗa, hanɗa a na buri ɓa ki nivi arai zi pi, buri ki nivi gdaŋ aŋ libi gir na mai hanɗa ɵa ɗa, maiyi tiyi ɵa lai.

⁷Tiyi ɗa mi ɗa gaini biyi-na-pin-ɵeɗ fakat ɓa tiki ki ɗa siɗi gir gaiyi, nɵa aga ki nivi arai zi pi gaiyi lai.

⁸Buri nɵa, tawalakai, tiyi mi firyi ɓa tiki aga ki simni war siɗi kai ɗa kai, buri gir n’a mi siɗiŋ war Asiya ɗa viya gara. Haa a suwa gdaŋyi suwai, mi hiini ɓa aga mi simni karyi kir kai.

⁹Tiyi dama mi yimiŋ midiyi ɗa ɓa, mi si edi min mri ta, mi ziŋ mi hanɗa ɵa ɓa kapai mi pɵi midini siyi dama kai, amma midini Alaw n’a ɵiyiɗi zi mri amai war mri par.

¹⁰A ni n’a pliyisi edi ya, aga a pliyisi edi min mri na mai hanɗa ɵa par lai. Nkam tiyi mi pɵi midini ni, mi ɗa gai yimi ɓa aga a pliyi edi pra war hanɗa par lai.

¹¹Tiki lai, aga ki zini piyi war siiwa, nɵa viya aga e nivi yum hanɗa piyi, viya aga e si tese sin Alaw buriyi lai.

¹²Kol na wiyi ɗa a zaida na mi siɗiŋ siyi war hiiniyi ɗa, tiyi mi piyi wuzani arki war hangal gaini jre lai n’a halasi sini Alaw par, mi piyi war yel na wiini neŋ-si kai, amma war yum na wiini Alaw.

¹³Tiyi mi dûgûɗi na ɗa, a seŋ zamai kai, saa seŋ na ki ɗa ŋiŋ na ɗa lai, na ki ɗa ɵiniŋ na ɗa lai. Hiiniŋa ɓa aga ki ɵiniŋ edi gaglai a suwa pra.

¹⁴Maini n’a yima miɗiki agwi na ɗa ɵa, tiyi mi ɗi wala na tiki ki kiɗi ki kûli siki burini. Tiki ɗe ki ɗi wala na tiyi mi kiɗi mi kûli siyi burini lai, war gizi na wiini Epiɗ-ɗaimu Yesu.

¹⁵Buri hanɗa a wala n’a nafu edi ara gaglai, won hlai na mu rga wara ɓa, mu dara mu halaɗi aŋ tiliki, kapai firiyi na wiiki a va amai azi ktai pra.

¹⁶M'aŋ gai hiini ɓa, ahaki par, mu vuga a Makedoniya sek, war Makedoniya par, mu waisi ahaki ɗaw pra, aŋ paya wazagai na hajaŋa aŋ midini, buriɗi morkoiŋa na war Yudeya.

¹⁷Won hlai na mu rga wara buri mu za hanɗa, mu zaŋ ɗa gaini hiini na hulum kai ɗi? Zaw wala na mu rgaŋ wara ɓa mu zaŋ ɗa, mu rgaŋ wara na ɗa war neŋ-si ɗi? Zaw mu zaŋ na ɗa war hiini zi giriŋi, mu muɗa nkam ta lai, mu muɗa zaw kai ɗa ta lai ɗa ɗi?

¹⁸Alaw ɗa a jre, seŋ na tiyi mi ɓikiŋ siki ɗa a nkam gaini zaw kai ɗa kai.

¹⁹Buri ɓa Yesu Kristu, n’Ahini Alaw, na tiyi mi ɓikiŋ siki, ta lai, Silvanus lai, Timotewus lai ɗa, a nkam gaini zaw kai ɗa kai. Ni ɗa a nkam kiini.

²⁰Koo ɓa ɵinini ha na wiini Alaw a na viya tekeɗeɗi, A za nkam na ɗa gaini Yesu. Nɵa, tumu mu zumu amen wiini Alaw buriɗi abaini na ɗa buri hanɗa lai.

²¹Amma, ni na buriki tiki, a na siyi gdaŋ wiyi tiyi war Kristu, n’a ma emel midiyi lai ɗa a Alaw.

²²Ni n’a tika tampoŋ na wiini mudumu, a sumu Sezeni lai war agulmu aŋ araŋ.

²³Ta ɗa, Alaw a zaida na wiya, mu wayaɗi war Korinte kir kai ɗa, buri mu dara ku kaɗi guma miɗiki kai;

²⁴tiyi ɗa, mi firyi mi ŋi midini yimi na wiiki kai, amma mi firyi mi tipi gaiki buri firyi na wiiki, buri tiki ki ɗiyi na ɗa war yimi.