Read Mousgoum 2 Korintekai 10 Bible Online

2 Korintekai 10 - Mousgoum bible

2 Korintekai 10

¹Ta Paulus, mu siiwiki gaini mada dama, war hangal gaini pɗem na wiini Kristu, ta na mu na gaini hûsi wuzani arki, amma hiriyik won hlai na mu na edi siki par gaigai ɗa lai.

²Mu siiwiki ɓa, won hlai na mu coɗi li siki ɗa, aga mu siŋka yimiŋa edi gaini gdaŋ tetew kai, zamai e hiini ɓa tiyi mi zi sda na ɗa war neŋ-si, siɗi nagai ɗa, aga mu za gaini gdaŋŋa.

³Koo ɓa mi ɗa karyi war neŋ-si tekeɗeɗi ɗa, tiyi mi hitimi na ɗa war neŋ-si kai.

⁴Buri ɓa wazagai zi hatam na mi hitimi gaini ɗa, a na wiini neŋ-si ɗa kai, amma spakni ɗa, a na sini Alaw par, aŋ ho ɵaga n’abakai na gdaŋai lai azumai, tiyi mi hiɗi yel na jreki kai azumai gaini.

⁵Gaini hiini zi kûlûni-si paŋ n’a fakasi amai sin siɗi na wiini Alaw lai, tiyi mi dûgi hiiniɗi ɗai paŋ dug, kapai e ɵini pin gadai na wiini Kristu.

⁶Won hlai na zi na pin Gat kai na wiiki a va li amai ɗa, aga mi si vrak na pin ɵinini Gat kai ɗa wiiɗi ɗai paŋ lai.

⁷A zuva ɓa ki tili wala paŋ ɗa pin sini n’anene par kadai ɗa kai. Na ɓa ɗif a sɗa sini ɓa a wiini Kristu jre jre ɗa, aga a yima seŋ hanɗa midini pɗem: Na ɓa a ni a wiini Kristu ɗa, tiyi kaw mi ɗi na wiini Kristu lai.

⁸Koo ɓa mu kola sa a suwa agwi, burini spak n’EPIƊ-ƊAI a siŋyi buri mi rgiki amai, aŋ hiɗiki azumai ɗa kai kaw ɗa, aga mu tika siyer burini hanɗa kai;

⁹mu miliki ɗa a hunai piki gaini letre na wiya ɗa kai.

¹⁰Buri ɗai e ɗa miɗi ɓa: Letre na wiini ɗa gdaŋ gara spak gara lai, amma won hlai n’a cosi li gaini arni blaŋ ɗa, a tala huruf, seŋ zi miɗi na mini par ɗe, a nafa gara kaalai.

¹¹Ɗif n’a muɗa mai hanɗa ɵa ɗa, aga a yimaŋ midini ɓa: maini n’e ɗa tili seŋyi na war letreyi, won hlai na mi ɗa arbaɗi kai na ɗa ɵa, hlai na mi cûɗi li ɗa, aga mi zi ɗa ɵa kal kal.

¹²Buri tiyi mi diri mi kiti kerpeɵyi zaw mi kiti siyi gaiɗi ɗai zamai n’e zi zaida midini siɗi dama nɵa kai. Nagai ɗa, amma won hlai n’e kiti wûliɗi n’amai gaini wala zi kiti na wiiɗi dama, e kiti siɗi gaini siɗi lai ɗa, a siŋka ɓa nagai yel midiɗi kai.

¹³Amma tiyi ɗa, mi diri mi kûli siyi a suwa n’a na ɗa kai, aga mi ɗiyi ɗa sini sini kitini sda n’Alaw a siŋyi ta ɗa ta, haa a kiyiɗi siyi ta ɗa.

¹⁴Buri tiyi mi suwi hlai n’a sa siyi ta ɗa edi kai hai, haa hlai na mi giɗi siki ta ɗa, buri mi hiliɗi gaini labar na pɗem na wiini kristu haa siki ta.

¹⁵Tiyi mi diri mi kûli siyi a suwa n’a sa siyi ta ɗa kai, mi kûli siyi war sda na wiiɗi ɗai zamai ɗa kaalai. Amma tiyi mi ɗa war biyi-na-pin-ɵeɗ, na ɓa yimi na wiiki a n’a na riya amai ɗa, na ɓa tiyi mi zi aŋ abakai n’arbaki, war sda n’a sa siyi ta ɗa,

¹⁶aga mi ki labar na pɗem haa edi midini afti zamai zamai, n’edi duɓaki par lai, amma aga mi kûli siyi ɗa gaini sda na maryi na zamai e ziŋ ka wuzaɗi par, war hlai na wiiɗi ɗa kai.

¹⁷A pɗem ɓa, ɗif n’a kola sini ɗa, a kola sini war Epiɗ-ɗai.

¹⁸Ɗif n’aga a siŋka edi ɓa a na pɗem ɗa, a ni n’a za zaida edi gaini midini dama kai, amma a ni n’EPIƊ-ƊAI a za zaida na pɗem midini ɗa.