Read Mousgoum 2 Korintekai 11 Bible Online

2 Korintekai 11 - Mousgoum bible

2 Korintekai 11

¹Mu siiwiki ɓa ki hiniŋa mu ɵa seŋ zi duuli na ma ɗ edi su haw. Yimiŋa siki mai hanɗa ɵa.

²Mu diriki ɗa a diri zi sile, maini a wiini Alaw nɵa. Mu giɓki wiini ɗif ktai gaŋ: hanɗa a Kristu, kapai mu sɗa aŋ ɗiyiki wuzani maiɗi ɓulumi na te tetema wus kai, na te na hilu nɵa.

³Gaini hanɗa paŋ ɗa, mu huna ɓa yelki ɗa viyɗa edi, zaw a zaga edi sin yimiki na gaini tiki ta, na jre, na midini ɗa par, maini na wala-meefeŋ a duuliti Eva gaini yelni nɵa kai.

⁴Buri nɵa, na ɓa ɗif a halasi arbaki, a ɓaka seŋ midini Yesu na zamai, na tiyi mi ɓiki seŋ midini ɗa kai, zaw, na ɓa ki nivi seze na zamai, na'a kata gaini na ki niviŋ avut ɗa kai, zaw na ɓa ki nivi labar na pɗem na zamai, n’a kata gaini na ki yimiŋ ɗa kai ɗa, tiki ki zini pini gai futini lai.

⁵Amma ta, mu tala sa agwi piɗi nagai n’e yiki siɗi ɓa "apostelai n’abakai" ɗa war wala ktai kai zaŋ.

⁶Na ɓa war seŋ zi miɗi, mu tan tan kaw ɗi ɗa, war siɗi ɗa mu na ɵa kai. Tiyi mi siŋki wazagai paŋ edi siki gaglai, war hlai paŋ lai.

⁷Zaw, hlai na mu hosa sa dama azumai, kapai tiki ki nivi rɗi n’amai, won hlai na mu ɓaka labar na pɗem na wiini Alaw siki, burini vrak kaiɗa, mu za ɗa a tuwur ɗi?

⁸Mu ka guma midini tipi zamai zamai, e siŋa vrak, gaini vrak hanɗa mu zina piki.

⁹Won hlai na mu naka arbaki war haaja ɗa, mu huwya ktai arbaki kai, war wazagai paŋ, mu firya mu kasi guma miɗiki kai, buri ɓa tawalakai n’e hilisi war makedoniya par, e ɗa viŋa haajaŋa ɗa amai. Mu dara mu za aŋ guma miɗiki tiyana kaalai, wuzamu sek kaalai.

¹⁰Firiyi n’aŋ war ɗa, ɗif a kiɗa a ɗalaŋa warni kai, midini afti n’Akaiya gai abaini paŋ, pin jreni Kristu n’aŋ wara ɗa, mu kiɗa mu muɗa ɓa a na ɗa ɵa.

¹¹Buri ma ɗa? Buri mu diriki kai ɗi? Alaw a sɗaŋ.

¹²Wala na mu na zaŋ na ɗa, aga mu zaŋ wuza sek ɵa, kapai nagai n’e ɗa piyi futi aŋ kiti aŋ kiti siɗi gaiyi ɵa ɗa, e nivi wala ktai n’e yimi miɗi pini kai.

¹³Ɗai na mai hanɗa ɵa ɗa, e ɗi apostelai na jrekai-kai, e ɗi ɗai zi sda zi rhai, n’e zi siɗi aŋ apostelai na wiini Kristu.

¹⁴Hanɗa a wala n’a kiɗa a bindiki hiyak kai, buri Satan gaini midini dama, a bunda sini aŋ ɗif zi ɵeŋ na war fuŋ-n’Alaw na wiini gaglai.

¹⁵Buri nɵa, hanɗa a wala n’abai n’a kiɗa a bindiki hiyak kaalai na ɓa ɗai zi sda hanɗa e bindi siɗi aŋ ɗai zi sda na wiini jre-ɗikat ɗa. Dibi na wiiɗi aga a za pin sdaɗi lai.

¹⁶Mu muɗa pra, ɗif aga a yimaŋa maini ɗif zi duuli nɵa kai, ɵa kai ɗe yimiŋa wiiki maini ɗif zi duuli nɵa, kapai mu sɗa aŋ kola sa agwi lai.

¹⁷Wala na mu muɗaŋ na ɗa, mu muɗaŋ pin hiini na wiini Epiɗ-ɗai kai, amma maini war duuli nɵa, buri ɓa a miɗi zi kulini si.

¹⁸Buri ɗai viya e ɗa kûli siɗi war neŋ-si, ta kaw, mu dara mu kola sa ɵa lai.

¹⁹Tiki na gaini yel miɗiki ta ta ɗa, ki yimiɗi zi duulakai siki gaini firiyi, ki zini piɗi lai.

²⁰Tiki ki hiniɗi ɗai e ziki aŋ bagakai, e simi siki par, e mili wazagaiki, e biziki azumai, e ɵiɓiki amai arki lai.

²¹Mu muɗa na ɗa ɓa a wala zi siyer, war gal hanɗa a tala mai na ɓa mi hinisi huruf ktai piyi su. Amma mu dara mu muɗa maini ɗif zi duuli nɵa, wala paŋ na ɗif a kiɗa aŋ zaŋ ɗa, ta mu kiɗa mu zaŋ lai.

²²Na ɓa e yiki siɗi ɓa e ɗi Hebrekai ɗa, ta mu hebre lai, na ɓa e ɗi aliɗi Izrayel ɗa, ta ɵa lai. Na ɓa e ɗi pinzibani Abraham ɗe ta ɵa lai.

²³Na ɓa e ɗi ɗai zi sdana wiini Kristu ɗa ɗe, mu muɗa maini ɗif n’a dula nɵa, ɓa mu sûwiɗi pra: war sda zi gir ɗa, mu sûwiɗi; war ɵi na war daŋgai ɗa, mu sûwiɗi, warɗi ɵiɓi ɗa maa, mu sûwiɗi pra. Azi viya, mu nafu gobi min mri:

²⁴Azi ɵim, Yudeyakai e ɵiɓiŋa, daɓala doogo doogo puɗu ɗa, a hina aŋ kai ktai kadai.

²⁵Azi hu, e ɵiɓiŋa gaini amaraŋa, e ɵiŋkiŋa gaini kiryit azi ktai, hulum a pa a agoɗom gaya azi hu, mu fana azumai war hulumni yem-ra n’abai ktai, mu yiva ktai lai.

²⁶Morkoi na gaini azi blaŋ ɗa a pɵa kai, azi viya, aŋ kai agwi buri mu mra a agoɗom war ra, war tiɗi gorɓolokai, aŋ kai agwi buri mu mra war tiɗi ɗai na war pinzibaŋa, buri mu mra war tiɗi ɗai na war pinziba na zamai, buri mu mra aha war fuŋ n’abai, buri mu mra edi war basga na kaɗataŋ, gobi mu mra war yem-ra-n’abai, gobi mu mra tiɗi tawalakai na jrekai-kai lai.

²⁷Gobi mu mra min sda gaini kayai, azi viya, mu fana kara, wiyamai te dara te fuɗaŋa, sai te dara te fuɗaŋa lai, kureɗ m’aŋ war tikini sai, kureɗ arni hlai na ɗarak, mu hina ganala lai.

²⁸N'a hina ɗa a pɵa kai, yivai paŋ ɗa, mu, wala na hiiniŋa midini abai, n’a saŋa kwimi lai ɗa, a gɗamni tipi ɗa.

²⁹Gaini na huruf ɗa, mu tala sa huruf lai, ni n’e kiŋ li war tanai ɗa, agula a ya wara burini lai.

³⁰Na ɓa mu kola fu sa ɗa, mu kola sa burini hurufŋa ɗa.

³¹Alaw, n’Epini Epiɗ-ɗaimu Yesu, Ni na kol a wiini haa hlai n’a vada kai, n’a vada kai, a sɗa ɓa mu muɗa na ɗa a eles kai.

³²War Damaskus, Lawan na wiini pai Aretas a mula ɗai ca ca, buri e giɗimi fuŋ n’abai na wiiɗi ɗai na Damaskus ɗa, kapai e yimiŋa.

³³Amma e wiŋasi anene arni fenetir ɗaw, war dologo, azumai eziɗi ɵagai ɗa, kapai mu mula tini par.