Read Mousgoum 2 Korintekai 12 Bible Online

2 Korintekai 12 - Mousgoum bible

2 Korintekai 12

¹Mu sɗa aŋ kola sa. a futini, a wala n’a nafa kai, amma, tiyana mu dara mu muɗa midini wazagai n’a siŋka ara gaini wazagai n’EPIƊ-ƊAI a yimaŋa edi ara ɗa lai.

²Mu sɗa ɗif na wiini Kristu ktai, buza tiyana a za doogo pi puɗu, -ɗif hanɗa, a nafu war sini, war sini kai ɗi, mu sɗa kai, a sɗaŋ ɗa a Alaw. Ɗif hanɗa, a yima haa amai war hlai n’amai n’ag'aŋ hu.

³Mu sɗa ɓa ɗif na mai hanɗa ɵa, a na war sini, war sini kai, mu sɗa kai, a sɗaŋ ɗa a Alaw.

⁴Ɗif hanɗa a yima amai war Paradis, a ɵina seŋ na mini ɗif a kiɗa aŋ muɗaŋ kai, na futi te sa sini buri a muɗaŋ edi kaalai.

⁵Buri ɗif na mai hanɗa ɵa ɗa, mu sɗa aŋ kola sa, amma mu sɗa aŋ kola sa burini sa dama kai, sai burini huruf na wiya.

⁶Na ɓa mu viya a kûlûni-si ɗa, aga mu bunda aŋ ɗif zi duuli kai, buri ɓa aga mu muɗa jre, amma mu ɗala sa, kapai ɗif a talaŋa abai a suwa wala n’a na talaŋ sa par, gaini seŋ n’a ɵinaŋ war ma par ɗa kaalai.

⁷Buri pɗemni wazagai n’a siŋka ara hanɗa, pra, kapai kûlûni-si a niya war a suwa kaalai ɗa, gir ktai a tika sa ta, a ɵeŋni Satan, kapai a ɵiɓaŋa, kapai kûlûni-si a niya wara a suwa kai.

⁸Wala hanɗa mu siiwa Epiɗ-ɗai midini azi hu, buri a tika hanɗa edi sa par.

⁹Amma a muɗaŋa: "yum na wiya a kiɗuku ta, buri Sapak na wiya a va amai ɗa war huruf". Nɵa mu siɗa aŋ kola sa war huruf na wiya ɗa abai a suwa, kapai spakni Kristu a za sda gaya.

¹⁰Buri nɵa, mu firiya war huruf na wiya, war tirki, war haw, war siɗini gir gaini hunai lai burini Kristu, buri ɓa won hlai na mu na huruf ɗa, war hlai ni mu na gdaŋ a suwa.

¹¹Mu bunda maini ɗif zi duuli nɵa, ki ziŋa na ɗa ki ɗi tiki. Kadai tiɓ ɗa ki zi zaida na pɗem mada ki ɗi tiki, buri nagai n’e yiki siɗi ɓa apostelai n’abakai, e sûwiŋa war wala ktai kai sam.

¹²Wazagai n’a siŋka apostel edi ɗa, a siŋka edi arbaki ya: libini gir na gaini hangal, wazagai zi siŋki gaini wazagai n’abakai n’a bunda ɗif hiyak, gaini wazagai zi hiila lai.

¹³Wazagai na mu zaŋ sini tipi na zamai, na mu zaŋ siki tiki kai ɗa a na wata ɗa? Sai a na ɓa ki zini pa kai ɗa tar, Na ɓa mu za ɵa ɗa a meefeŋ ɗa, ki siŋa ni burini meefeŋa hanɗa.

¹⁴Mu dara mu halaɗi aŋ tiliki azi n’ag'aŋ hu, mu firya mu kaɗi guma miɗiki kai, buri mu paya ɗa a wala n’aŋ tiki ɗa kai, amma ki ɗi tiki dama. Buri e tipi wazagai amai buriɗi tamai ɗa e ɗi ali ɗa kai, amma tamai e tipi wazagai amai buriɗi aliɗi.

¹⁵Ta ɗa, koo ɓa mu ɓa wazagaya paŋ edi buriki, mu ɓa suŋfaŋa edi buriki lai kaw ɗa, a fuɗaŋa sa kai, na ɓa mu diriki maini hanɗa ɵa ɗa, tiki aga ki diriŋa a suwa pra kai ɗi?

¹⁶Tiki ki siɗi lai ɓa, mu nafu aŋ wala na guma miɗiki kai. Amma zamai e hiini ɓa, mu ɗif na jreŋa aŋ kai, mu niviki ɗa war rhaiŋa lai.

¹⁷Ɗai na mu ɵiniɗiɗi arbaki ɗa, ktai arbaɗi a kiriki ɗi?

¹⁸Mu siika mini Titus buri a halaɗi arbaki, mu ɵinaɗi tawal gaini lai. Titus a mula wazagaiki ɗi? Tiyi mi piyi war seze ktai kai ɗi? Mu tikiti ɗa te futi na ktai kai ɗi?

¹⁹Ki yifi li, ki hiini na ɗa ɓa mi zizinini na ɗa a ezini seŋyi wuzaki, a na ɵa kai, mi miɗi na ɗa wuzani Alaw, wuzani Kristu lai. Tiki zi diri gara, mi ziŋ ɵa paŋ na ɗa, burini rgi n’amai na wiiki.

²⁰Buri mu huna ɓa, won hlai na mu halaɗi li arbaki, mu niviki maini na mu firya ɵa kai, mu huna ɓa sispai gaini sile gaini hiy gaini zilini-si n’amai gaini zaida na meefeŋ na midiɗi marki, gaini seŋ zi viyɗi na kla kadai, gaini kûlûni-si gaini dûrgûzi zamai zamai lai a za arbaki.

²¹Mu huna pra ɓa, won hlai na mu coɗi li arbaki ɗa, Alaw na wiya a tikaŋa li siyer arbaki katawai, kapai mu hina aŋ tuwa midiɗi ɗai viyan’e kɵi war tuwur n’e wiyisi sin himi kai, n’e zi hi-hir, maɵara, gaini meefeŋ zamai zamai lai.