Read Mousgoum 2 Korintekai 13 Bible Online

2 Korintekai 13 - Mousgoum bible

2 Korintekai 13

¹Hanɗa a azi n’ag'aŋ hu na mu na halaɗi aŋ tiliki. Seŋ paŋ a ɗiya woɗi futini ɗa, pin zaidaɗi ɗai sulu zaw hu.

²Won hlai a mu halaɗi arbaki azi n’ag'aŋ sulu ɗa, mu muɗaŋ ka ya, girna ɗa, mu na arbaki kai ɗa, mu muɗaŋ wuza sek pra, buriɗi nagai n’e kɵi war tuwur ɗa, siki tiki na zamai ɗa paŋ lai, na ɓa mu wayaɗi li aŋ tiliki ɗa, ɗif ktai maa aga a hina pa, na mu za sini gai hangal aŋ kai.

³Tiki ki piyi na ɗa ɓa, Kristu a muɗasi seŋ war ma par, kapai a yima miɗiki, ni ɗa a na huruf arbaki kai, amma a na spak gara arbaki.

⁴Buri ɓa a toko amai sin dagra war huruf, amma a na karni war spak na wiini Alaw. Tiyi lai, mi ɗa hurofai war ni, amma aga mi simni karyi gaini ni buriki tiki, pin spak na wiini Alaw.

⁵Buri nɵa, tiki dama fifiki siki, kapai kisiɗi na ɓa ki ɗa war yimi ɗa. Ki tili siki kiiki haw ɗa! Ki siɗi ɓa Yesu Kristu a na warki, ki siɗi ɵa kai ɗi? Sai a na ɓa fifikini-si na wiiki a za woɗi futini kai baali.

⁶Amma ta mu yima ɗa ɓa, tiki aga ki siɗi ɓa fifikini seŋ na wiyi ɗa, a wala na kadai meere kai.

⁷Gaini hanɗa paŋ, tuwi na wiyi na sini Alaw ɗa ɓa, a zuva ɓa, ki zi wala ktai na meefeŋ kai zaŋ. Hanɗa buri ɓa, fifiki na wiyi aga a za aŋ jre ɗa, a na ɵa kai, amma kapai tiki aga ki zi pɗem, koo ɓa fifiki na wiyi a mula edi kadai ɗi kal.

⁸Buri ɓa tiyi ɗa, gdaŋyi a kiɗa aŋ bla edi sin jre ɗa kai, amma mi zi sda ɗa burini jre.

⁹Tiyi mi firiyi, won hlai na mi ɗa hurofai, amma tiki ki ɗa gdaŋai. Na tiyi mi firyiŋ buriki ɗa, a vi n’amai war pɗem.

¹⁰Buri nɵa, mu ɗoɗi seŋ hanɗa won hlai na mu na arbaki kai na ɗa, ɓa kapai won hlai na mu coɗi li arbaki ɗa, mu miɗiki gaini gdaŋ, pin spak n’EPIƊ-ƊAI a saŋa war ta, a na buri mu rga wala amai, buri ho wala azumai kai.

¹¹N'a hina paŋ ɗa, tawalakai, firiyi, vi amai war pɗem, si arai zi pi arbaɗi marki, ki tipi ktai, ki simni gaini ɵeɗ arbaɗi marki, nɵa Alaw zi diri, zi ɵeɗ lai aga a sumna gaiki.

¹²Ki ɵiɓi wuti arbaɗi marki gaini sisiɓini mi na sɗik. Ɗai na wiini Kristu paŋ, e ɗa ɵiɓiki wuti.

¹³Yum na wiini Epiɗ-ɗai Yesu Kristu, gaini diri na wiini Alaw, gaini bonu na wiini Seze-sɗik a sumna gaiki paŋ.