Read Mousgoum 2 Korintekai 2 Bible Online

2 Korintekai 2 - Mousgoum bible

2 Korintekai 2

¹Ta ɗa, a tala ara pɗem, buri mu halaɗi siki aŋ tiliki aŋ kiki war kwimi pra kai.

²Na ɓa ta dama mu kiki war kwimi ɗa, aga mu firya ɗa burini asiya ɗa? Kai tiɓ mu firya burini ni na mu kaŋ war kwimi na ɗa kai ɗi?

³Mu ɗoɗi siki mai hanɗa ɵa na ɗa, ɓa kapai won hlai na mu coɗi li arbaki ɗa, mu siɗa aŋ kwima, buriɗi nagai na tiɓ e viŋa firyiŋa amai ɗa kai. Buri mu siɗa edi gaglai ɓa burki tiki ɗa, firiyi na wiya a firiyi na wiiki paŋ, gai hlaiki kafa.

⁴Mu ɗoɗi siki na ɗa war gir n’abai, agula gaini yi wara, gaini tuwi n’abai gara lai, mu ɗoɗi siki buri mu kiki war kwimi ɗa kai, amma kapai ki siɗi diri n’abai n’a na wara buriki ɗa.

⁵Na ɓa ɗif a za aŋ wala n’a sa kwimi, a kaŋa war kwimi mu ta kai, amma ki ɗi tiki paŋ - koo ɓa gai hlaiki paŋ kai tekeɗeɗi, zamai arbaki aga e nivi kwimi.

⁶Ɗif na mai hanɗa ɵa ɗa, abaiɗi ɗai aga e ɓiriŋ, ɓarai hanɗa a kiɗa ta,

⁷Nɵa marya ɗa, ki hinini meefeŋni ɗa, ki sini arai zi pi lai, kapai a ɓa edi war kwimi n’abai n’a suwa gdaŋni kaai.

⁸Buri nɵa, mu siiwiki buri ki siŋkini lai ɓa ki diriŋ gara.

⁹Buri nɵa mu ɗosi siki na ɗa, kapai mu titimiki haw, ki ɗi ɗai n’e gidi pa war wazagai paŋ tiɓ ɗi!

¹⁰Ni na tiki ki hinini meefeŋni li ɗa, ta aga mu hiniŋni lai, na ɓa ta mu sa ni li koo burini meefeŋ na wata ɗi wiini ɗif ɗa, mu zaŋ na ɗa buriki wuzani arni Kristu,

¹¹kapai aga mu hinumu hlai wiini Satan aŋ rɗa amai mudumu kai, buri tumu mu suɗumu hiini na wiini ɗa ya.

¹²Won hlai na mu co a Trowas buri mu ɓaka labar na pɗem na wiini Kristu, gaini min hlai n’EPIƊ-ƊAI a malaŋ edi buriya ɵa paŋ tekeɗeɗi,

¹³Hiiniŋa a kiɗa a tika azumai kai, buri mu navasi Titus na tawala woni kai, nɵa mu faka woni par, mu hiniɗi ka ɗai na woni ɗa, mu hala war Makedoniya.

¹⁴Kol sin Alaw n’a na tupumu gaini kureɗ war rɗini-n’amai, war Kristu, n’a na sa lugos na wiini siɗi na wiini edi war hlai paŋ gaimu lai.

¹⁵Buri tumu, wuzani arni Alaw, mu ɗumu yitir na wiini Kristu, buriɗi nagai n’e ɗa war futi zi kûri, gaiɗi nagai n’e ɗa war futi zi bi lai.

¹⁶Buriɗi na zamai ɗa a lugos zi mri, n’a ka sin mri, buriɗi na zamai ɗa a lugos zi suŋfa n’a ka sin suŋfa lai. Ɗif n’a kiɗa aŋ za sda na mai hanɗa ɵa ɗa asiya ɗa?

¹⁷Tiyi ɗa mi ɗa maiɗi na zamai waŋ n’e yimi seŋ n’Alaw, maini walaɗi n’e cikili gaini ɗa ɵa kai. Tiyi mi miɗi na ɗa war jre, sini Alaw par, wuzani Alaw lai, war Kristu.