Read Mousgoum 2 Korintekai 4 Bible Online

2 Korintekai 4 - Mousgoum bible

2 Korintekai 4

¹Buri nɵa, tiyana na sda hanɗa a sa li war tiyi, pin yum n’Alaw a zaŋ siyi ɗa, aga mi hini kayai a yimiyi kir kai.

²Futi zi ɵûkûti, zi siyer ɗa, tiyi mi diriti kai, mi piyi war rhai kai, mi viyɗi eles gaini seŋ n’Alaw kaalai, amma mi siŋki jre ɗa edi gaglai, mi diri ɓa, hiiniɗi ɗai paŋ a za maini na wiyi ɗa ɵa, wuzani Alaw.

³Na ɓa labar na pɗem na mi ɓikiŋ ɗa, aŋ gai ŋûyi cok hai ɗa, aŋ gai ŋûyi a ɗa buriɗi nagai n’e hili sin bi n’edi na wiiɗi sek ɗa.

⁴- Buriɗi nagai na yimi warɗi kai, n’alau na wiiɗi yai hanɗa a ŋulva hiiniɗi tik, e kiɗi e siɗi ŋilini labar na pɗem na wiiɗi abai wiini Kristu, ni n’a ziŋga Alaw ɵa ɗa kai.

⁵Buri war ɓikini seŋ na wiyi ɗa, mi miɗi ɗa midini siyi dama kai. Mi ɓiki ɗa ɓa: Kristu Yesu, ɗa a Epiɗ-ɗai, tiyi gai midiyi ɗa mi ɗi ɗai zi sda na wiiki burini Yesu.

⁶Buri Alaw n’a muɗa ɓa, "war gegeŋ par gaglai aga a ŋala ɗa, ni a ni n’a hina gaglai a ŋala war agulyi, kapai siɗi na wiiɗi abai na wiini Alaw a ŋala amai arni Kristu.

⁷Amma godai n’a juva gara hanɗa, tiyi mi miliŋ na ɗa warni grak z'afti, kapai spak n’abai n’a suwa marni hanɗa a za aŋ wiini Alaw, aŋ wiyi tiyi kai.

⁸Mi ɗa gaini hiɵi war gal paŋ par, amma gai siri edi kai, yel ktai na mi ziŋ nɵa aryi kai, amma mi bi arai zi pi na wiyi edi kai.

⁹Mi ɗa siɗi gir tiɗi ɗai, amma Alaw a hiniyi edi kai, gaini liliɓi laɓ, amma gai fiɗi edi kai.

¹⁰Kureɗ mi ɗ libi mri na wiini Yesu war siyi, kapai suŋfa na wiini Yesu a sɗa aŋ siŋka edi war siyi par lai.

¹¹Buri ɓa tiyi na mi ɗa karyi ɗa, mi ɗi na ɗa kureɗ min mri, burini Yesu, kapai suŋfa na wiini Yesu ɗa a sɗa aŋ siŋka edi war siyi zi mri hanɗa lai.

¹²Nɵa war siyi tiyi ɗa a za sda ɗa a mri, amma war siki tiki ɗa a za sda ɗa a suŋfa lai.

¹³Maini Seze na mu nuvuŋmu ɗa a Seze ni ktai, a dara muɗa Seze na wiini yimi, maini n’aŋ gai ɗû nɵa: buri nɵa mu yima, buri hanɗa mu muɗa ɓa, tiyi lai, mi yimi, mi miɗi na ɗa buri hanɗa.

¹⁴Mi siɗi ɓ, ni n’a ɵiyasi Epiɗ-ɗai Yesu amai arbaɗi zi mri par, ni aga a ɵiyiyisi amai gaini Yesu lai, aga a ɗiyiyi wuzani arni gaiki tiki lai.

¹⁵Wazagai hanɗa paŋ aga a za buriki tiki, kapai won hlai na yum a na riya wuzani ɗa, a riya zini tese na wiiɗi ɗai viya amai, aŋ kol na sin Alaw.

¹⁶Buri nɵa, tiyi aga mi hini kayai a yimiyi kir kai, koo ɓa ɗif n’anene par war siyi a mra tekeɗeɗi, ɗif n’amlai waryi ɗa, a bunda hehe mefeŋ-mefeŋ paŋ.

¹⁷Buri ɓa hlai zi gir n’agwi kadai ɗi, buriyi tiyi ɗa, a riyiti abai na wiyi ɗa amai sek a suwa pra pra.

¹⁸Tiyi ɗa, mi mili aryi na ɗa sin wala n’arai te talaŋ ɗa kai, amma sin wala n’arai te talaŋ kai ɗa. Buri ɓa wala n’arai sini ca ɗa, a wala n’a na buri hlai n’agwi, amma n’arai te talaŋ kai ɗa a na haa hlai n’a vada kai.