Read Mousgoum 2 Korintekai 5 Bible Online

2 Korintekai 5 - Mousgoum bible

2 Korintekai 5

¹Buri tiyi mi siɗi ɓa, na ɓa dalamyi n’azumai midini afti hanɗa, n’a gumu kadai, a tuura edi lai tekeɗeɗi, mi ɗa gaini dalam amai war fuŋ n’Alaw, n’a zizina ɗa gaini tini ɗif kai, a zizinaŋ ɗa a Alaw, n’a vada edi kai, a na ɵa haa kureɗ.

²Nɵa, mi ɗa limi sesiyeŋyi war si hanɗa, gai kiyi gara, mi firyi ɓa dalamyi na war fuŋ n’Alaw ɗa a wa siyi.

³Na ɓa, mi wiŋ li siyi ɗa, Alaw aga a niviyisi ganala kir kai.

⁴Buri ɓa won hlai na mi ɗa warni gumu hanɗa, mi ɗa limi sesiyeŋyi, gaini kayai, a na ɓa mi diri wi si na wiiɗi yai n’aŋ siyi edi ɗa kai, amma mi firyi mi wi siyi ɗa a si na war fuŋ n’Alaw par ɗa, kapai suŋfa a rɓa si zi mri ɗa.

⁵A zaŋ buriyi mai hanɗa ɵa ɗa a Alaw gaini midini dama, a Alaw n’a siyi Seze aŋ araŋ.

⁶Buri nɵa, mi ɗa gaini arai zi pi kûreɗ-kûreɗ, buri mi siɗi ɓa, na ɓa mi ɗa ahaɗi war siyi hanɗa ɵa ɗa, mi ɗi na ɗa war simni n’edi gaigai sini Epiɗ-ɗai par, futi buriyi aha sin sek kai.

⁷-Buri tiyi mi hili na ɗa pin yimi, pin wala n’arai te talaŋ ɗa kai.

⁸Gaini hanɗa paŋ ɗa, tiyi mi ɗa gaini arai zi pi viya, mi firyi ɓa mi yimi siyi edi gaigai sini siyi par, kapai mi simni ahaɗi, gobi gaini Epiɗ-ɗai, hanɗa aryi pɗem a suwa pra.

⁹Buri nɵa, na mi firyiŋ a suwa paŋ ɗa, a na ɓa mi tili arni pɗamai, koo ɓa mi ɗa war siyi, koo ɓa warni kai ɗi.

¹⁰Buri gaini dewele, tumu paŋ aga mu ɗiyumu wuzaɗi Paramai zi sariya na wiini Kristu, kapai asiya asiya paŋ aga a nava vrak pin wazagai n’a zaŋli gaini sini ɗa, na pɗem gaini na meefeŋ paŋ.

¹¹Tiyi mi siɗi hunai na pin Epiɗ-ɗai ɗa ya, buri nɵa, mi piyi na ɗa ɓa mi yimiŋɗi midiɗi ɗai mai hanɗa ɵa, tiyi mi ɗa war gaglai wuzani arni Alaw, mu hina ɓa, tiki war hiiniki, ki siɗi lai ɓa, m’aŋ war gaglai.

¹²Tiyi aga mi wiyi aŋ zi zaida midini siyi dama wuzaki kai, amma mi zi na ɓa kapai firyi na wiiki a va amai buriyi, kapai ki siɗi aŋ wiyiɗi seŋ wiiɗi nagai n’e kûli siɗi burini sdaɗi na war amur-si anene kadai, amma warɗi agul par kai.

¹³Buri ɓa, na ɓa mi tili arki maiɗi ɗai zi duulakai nɵa ɗa, a za nɵa burini Alaw, na ɓa mi ɗa gaini yel midiyi ɗa, a za ɵa buriki tiki lai.

¹⁴Buri diri na wiini Kristu a na hiɵiyi, tiyi na seŋ a yima midiyi ɓa, ɗif ktai a mra buriɗi ɗai na doogo, nɵa paŋ e mri ya.

¹⁵Na ɓa a mra buriɗi ɗai paŋ ɗa, a zaŋ nɵa ɓa kapai na karɗi ɗa e simini karɗi gaini midiɗi dama kai, amma burini ni n’a mra, a ɵiya amai war mri par lai.

¹⁶Buri nɵa, tiyana par, mi siɗi ɗif war neŋ-si kir kai, koo ɓa mi siɗi Kristu war neŋ-si tekeɗeɗi, tiyana mi siɗiŋ mai hanɗa ɵa kir kai.

¹⁷Buri nɵa, na ɓa ɗif aŋ war Kristu ɗa, ni a ɗif n’a rga hehe, wazagai na walakai a vuga vug, n’a hina tiyana ɗa a wazagai na hahakai.

¹⁸Wazagai hanɗa paŋ ɗa a na sin Alaw par, ni n’a toya arbaɗi garni ni war Kristu. A siyi sda zi tuyi war tiyi lai.

¹⁹Buri ɓa, won hlai n’Alaw a za tuyi gaiɗi ɗai na yai ɗa, a zaŋ ɗa gaini Kristu, a tika pini meefeŋ na wiiɗi ɗai ɗa kai, a siyi seŋ zi tuyi war tiyi lai.

²⁰Nɵa, tiyi mi ɗi arni Kristu, mi zi sda war yikini, a yikiki war miyi par na ɗa a Alaw gaini midini dama. Mi siiwiki war yikini Kristu, ki tuyi arbaki gaini Alaw.

²¹Ni n’a za tuwur kai ɗa, a bundaŋ aŋ tuwur burimu, kapai warni Ni, tumu aga mu bundumu jre-ɗikat arni Alaw.