Read Mousgoum 2 Korintekai 7 Bible Online

2 Korintekai 7 - Mousgoum bible

2 Korintekai 7

¹Tawalakai, zi diri gara, na ɓa mu ɗumu gaini ɵinini ha na maini nɵa ɗa, zumu sumu edi hilu, sini wazagai na haharai na wiini neŋ-si gaini na wiini seze lai, mu vumu amai war sɗik, war hunai na pin Alaw lai.

²Ki wili miɗiki gaiyi kai, tiyi mi zi meefeŋ sin ɗif kai zaŋ, mi milisi walani ɗif kaalai, mi kiri ɗif kaalai.

³Mu muɗa nɵa buri mu ko miɗiki ɗa a sariya kai, buri mu muɗaŋ ka ya ɓa, tiki ɗa, midiyi a kiɗa a wula gaiki kai, koo ɓa mi ɗa karyi, koo ɓa mi mri ɗi.

⁴Buriki tiki ɗa, giriŋi warɗi agula kir kai, mu kola sa buriki, mu nava arai zi pi viya lai, war giryi tekeɗeɗi, firiyi a vaŋa.

⁵Buri ɓa haa hlai na mi cûsi war Makedoniya par ɗa, mi nivi si n’amla nɵa agwi kai zaŋ, mi ɗifu gaini hiɵi nɵa haɵ, a anene par ɗa a hatam, amlai waryi par ɗ a hunai lai.

⁶Amma Alaw n’a sa arai zi pi wiiɗi nagai n’e bi arai zi pi na wiiɗi edi ɗa, a siyi arai zi pi gaini gizini Titus.

⁷Gaini gizini ktai kai, amma gaini arai zi pi n’a navaŋsi siki par lai: a miɗiyi midin girki n’abai, gaini tuwiki n’abai gaini diri na ki diriŋa gara ɗa lai, firyiŋa a va mai a suwa pra.

⁸Koo na ɓa mu ɓilkiki hiiniki gaiɗi letreŋa na mu ɵinitikiɗi ɗa tekeɗeɗi, a fuɗaŋa sa kai, mu hama hanɗa kaalai. Koo ɓa a fuɗaŋa sa tekeɗeɗi ɗa, mu sɗa ɓa letre hanɗa te ɓulka hiiniki na ɗa buri hlai n’agwi kadai.

⁹Tiyana ɗa mu firya gara, buri na ɓa hiiniki a ɓulka ɗa kai, amma buri ɓa kwimi na wiiki a huguki sin bindini payaiki, buri ɓa ki kwimi war Alaw, nɵa tiyi mi zi wala na meefeŋ ktai siki kai.

¹⁰Buri ɓa kwimi na sin Alaw par ɗa a bunda payaini ɗif aŋ kaŋ sin kûri, bindi hanɗa a kiɗa a fiɗini sini ɗif kaalai, amma kwimi na siɗi yai par ɗa a ka sin mri.

¹¹Buri nɵa, tili, wala na kwimi na sin Alaw par a zaŋ war siki haw ɗa! Ki bindi kokolai gara, a suwa pra, ki kûti siki min seŋ par gara, ki bindi ki firyi meefeŋ n’a za ɗa kai, muhunakai gara aŋ zi meefeŋ lai, ki diri gara, hiriyikai gara, ɗif n’a za meefeŋ li ɗa, ki tikini gir midini lai, war wazagai hanɗa paŋ, tiki ki siŋki edi ɓa, ki ɗa hilu war seŋ hanɗa.

¹²Na ɓa mu ɗi siki ɗa a na burini ni n’a za meefeŋ sin ɗif kaalai, burini ɗif n’e zi meefeŋ sini ɗa kaalai, amma a na buri a siŋka edi arki tiki dama gaglai, wuzani arni Alaw lai, ɓa ki si siki edi buriyi ta.

¹³Hanɗa a wala na mi nivi arai zi pi warni ɗa. Pra, wala n’a siyi firiyi abai a suwa pra ɗa, a firiyi na wiini Titus na tiki ki bizini hangalni azumai ɗa.

¹⁴Na ɓa mu kuliki ka uzani arni Titus ɗa, mu kiɗa mu tika siyer buri hanɗa kai, maini na war wazagai paŋ, mi miɗi siki ɗa a jre ɗa ɵa, wala n’a naka siyi firyi, na mi miɗiŋ wuzani Titus ɗa, a siŋka edi ɓa a jre lai.

¹⁵Diri n’a diriki ɗa a riya amai abai a suwa, won hlai na midini a kɵa burini zi na tiki paŋ ki zi pin gadai ɗa, bui ɓa tiki ki yimiŋ siki gaini hormo gaini jiriyi lai.

¹⁶Mu firiya gara, buri mu kiɗa mu pɵa miɗiki war wazagai paŋ.