Read Mousgoum 2 Korintekai 8 Bible Online

2 Korintekai 8 - Mousgoum bible

2 Korintekai 8

¹Tawalakai, mi diri mi miɗiki midini pɗem n’Alaw a zaŋ siɗi tipi na war Makedoniya.

²War girɗi n’abai tekeɗeɗi, firyiɗi a riya amai abai gara, war hawɗi tekeɗeɗi, nagai e si haa a suwa pɗemni:

³pin kiɗiɗi, mu kiɗa mu muɗa ɵa, maa ɓa a suwa gadaŋɗi lai, nagai e siŋ pin diri na wiiɗi,

⁴nagai e siiki miyi abai gara, buri mi hiniɗi e tipi gaiɗi war sda zi bonu, na wiiɗi ɗaini Kristu, na war Yeruzalem.

⁵Nagai e zi wala na tiyi mi hiiniŋ kai, nagai dama e si midiɗi dama wiini Epiɗ-ɗai avut, asakal par wiyi tiyi lai, pin diri na wiini Alaw.

⁶Pin hanɗa, tiyi mi siiwi Titus, buri a hala wuzani gaini sda na pɗem, n’tikasi pini arbaki gaini, haa a ɵaŋ edi su.

⁷Amma maini na wazagai paŋ a suwa siki viya viya nɵa: maini yimi ɵa, seŋ zi miɗi na jibet ɵa, siɗi ɵa, kokolai na war wazagai paŋ ɵa, tiyi mi diriki ɗa a diri kiini kai, mi firyi ɓa, ki zi abai a suwa pra, war sda zi yum hanɗa lai.

⁸Mu siki na ɗa a gadai na kapai ki zi gaini kai, amma miɗiki nɵa ɓa kapai hiriyik na wiiɗi na zamai ɗa a siŋka diriki na jre ɗa edi.

⁹Buri tiki ki siɗi yum n’Epiɗ-ɗaimu Yesu Kristu a zaŋ ɗa ya: ni a nasi ka a ɗif n’abai, amma a za sini murga buriki, kapai tiki war murga na wiini ɗa, ki bindi aŋ ɗai zi farai lai.

¹⁰Mu muɗa na ɗa a hiini na wiya pin seŋ hanɗa: a wala na pɗem buriki tiki lai, tiki na war buza n’a vuga ɗa, ki tiki piki aŋ si like ɗa avut, a si ɗa ktai kai, amma ki firyi sda hanɗa ta lai.

¹¹Nɵa tiyana ɗa, vidi sda hanɗa edi, kapai a ɵa edi maini na ki firyiŋ ɵa, sin gdaŋni ɗif, sini hiini n’a rga warni aŋ zaŋ ɗa lai.

¹²Na ɓa, diriku a na buri za wala ɗa, ɗai e tiliŋ sin wala n’aŋ tuku, na ku na za gaini ɗa, sin wala n’aŋ tuku kai ɗa kai.

¹³Mu muɗa hanɗa, kapai mu kiki tiki war gir, amma ɗai zamai ɗa e nivi kolek lai ɗa, mu muɗa na ɗa ɵa kai. Amma kapai tiki paŋ ki zi wala agwi agwi paŋ, sin kiɗiki kiɗiki.

¹⁴Nɵa girna ɗa, derki n’a suwa edi ɗa, aga a zina piɗi war kiɗi kai na wiiɗi, mefeŋ zamai ɗa, na wiiɗi n’a suwa edi ɗa aga a zina piki tiki nɵa lai. Nɵa aga ki kiti kal kal.

¹⁵Maini n’aŋ gai ɗû nɵa: ɗif n’a haɗa li seyem abai ɗa, wala aga a tuura edi pini kai, ɗif n’a haɗa li agwi ɗa, wala aga a kiɗihaŋ kaalai.

¹⁶Kol sin Alaw n’a sini hiini wiini Titus, aŋ huguki piki witaw, aŋ zi mai hanɗa ɵa ɗa.

¹⁷Buri a yima miɗi na wiyi kokolai tar gaini firiyi, a halaɗi ahaki na ɗa pin dirini dama.

¹⁸Mi ɗa ɵiniɗi tawal ktai gaini, na tipi na woɗi-woɗi paŋ e kûliŋ gara, buri sdani n’a zaŋ burini labar na pɗem ɗa.

¹⁹A hanɗa ktai kai, pra, tipi paŋ e viriŋ edi, buri a hala gaiyi, war morkoiyi na war sda zi yum hanɗa, n’a sa tiyi, burini kol na wiini Epiɗ-ɗai gai midini dama, aŋ siŋka diriyi na pɗem edi lai.

²⁰Tiyi mi firyi ɓa, ɗif a muɗa meefeŋ midiyi, buri farai n’a tapa viya, n’a za pin sdaɗi ɗa kai.

²¹Buri tiyi mi piyi aŋ zi ɗa a wazagai na pɗamai, arni Epiɗ-ɗai kiini kai, amma arɗi ɗai lai.

²²Tiyi mi ɗa ɵiniɗi tawal na tiki ki siɗi kokolaini na war wazagai zamai zamai ɗa gaiɗi lai, na tiyana a dara a suwa pra, buri ɓa a na pɵa miɗiki gara.

²³Nɵa ɗa, Titus a maya, a maiya zi sda n’a na arbaki lai, tawalakai n’e ɗa gaini, e ɗi ɵeŋ na wiiɗi tipi, e ɗi kol na wiini Kristu lai.

²⁴Buri nɵa, siŋkiɗi wiiɗi tipi paŋ ɓa tiki ki ɗi ɗai na ki diriɗi ɗai, siŋkiɗi lai ɓa kûli na tiyi mi ɗa kûli siyi gaiki wuzani arɗi ɗai ɗa, a futini ɵa.