Read Mousgoum Galatekai 2 Bible Online

Galatekai 2 - Mousgoum bible

Galatekai 2

¹Buza doogo pi puɗu asakal hanɗa par, mu waya amai a Yeruzalem pra gaini Barnabas, mu yima Titus gaya lai.

²Mu hala ɗa pin wala n’a siŋka ara. Mu hitra edi midini labar na pɗem na mu ɓakaŋ arbaɗi pinziba na zamai ɗa, mu hitriŋɗi wiiɗi nagai n’abakai ɗa lai, kapai sdaŋa na mu zaŋsi avut par ɗa lai, na mu na zaŋ ɗa lai a na edi kadai kai.

³Amma Titus n’a na gaya ɗa, a pinzibaɗi Grek, ɗif a zini dewele midini ɓa a ɵa gurgle kaalai.

⁴Hanɗa a za nɵa buriɗi tawalakai na jrekai kai, buriɗi ɗai n’e niyisi arbamu, aŋ tili ezini pli-n’edi na wiimu, na mu nuvuŋmu war Yesu Kristu ɗa, gaini hiini na ɓa e wiyumu war bege pra.

⁵Ɗai nagai ɗa mi hiniɗi hlai agwi kai zaŋ, miwi wulaii azumai piɗi kaalai, kapai jre na wiini ɓikini labar na pɗem ɗa a ɗiya gdaŋ.

⁶Buriɗi nagai n’e ɗa tiliɗi aŋ n’abakai ɗa, -sdaɗi n’e ziŋsi wuzani hlai par ɗa a seŋŋa kai, Alaw a za ɓraw arbaɗi ɗai kai, ɗi n’abakai hanɗa e ziŋa dewele mada warni wala ktai kaalai.

⁷Amma won hlai n’e siɗi ɓa labar na pɗem n’a sa ta ɗa, a na buriɗi n’e ɵi gurgle kai, maini n’a sa tini Peter ɗa a na buriɗi n’e ɵi gurgle ɗa nɵa.

⁸-buri ni n’a sa sda gaini Peter war sdani z'apostel na siɗi nagai n’e ɵi gurgle ya ɗa, ni a za sda gaya ta ɗa lai, buri mu za sda arbaɗi pinziba na zamai.

⁹Won hlai n’e siɗi yum n’Alaw a zaŋ sa ɗa, Yakob gaini Kefas garni Yohanɗa lai, n’e ɗa arbaɗi ɗai maini luwuŋ n’arba na war dalam nɵa, e siyi tiɗi aŋ tipi gaya ta gaini Barnabas. Tiyi mi hili sin pinziba na zamai ɗa, nagai e hili siɗi Yudeyakai ɗa lai.

¹⁰Amma midiyi aga a wula gaiɗi na hurafai ɗa kai. Hanɗa a wala na mu zaŋ kokolai, sa gai si edi min ta lai.

¹¹Amma won hlai na Kefas a halasi war Antiyokiya ɗa, mu pa edi arni papɗak, buri a za wala na woɗi futini kai.

¹²Buri ɓa wuzani hlai na ɗai zamai n’ahani Yakob par e hilisi kai hai ɗa, a suma ɗa gaiɗi pinziba na zamai ɗa, amma won hlai n’e hilisi li ɗa, a tika pini a ŋoya sini, a tapa gaiɗi kai, buri a huniɗi Yudeyakai ɗa.

¹³Yudeyakai na zamai ɗa ɗe e niyisi arni sda hanɗa lai, haa Barnabas paŋ a taɓa piɗi war mi na sulu sulu hanɗa.

¹⁴Amma won hlai na mu tala ɓa e ɗa piyi ɗikat maini n’a kata pin jre na wiini labar na pɗem nɵa kai ɗa, mu miɗini wiini Kefas wuzani arɗi ɗai aŋ maini nɵa: Na ɓa tuku na ku Yudeya, ku paya maiɗi pinziba na zamai ɗa ɵa, ku paya maiɗi Yudeyakai nɵa kai ɗa, ku za dewele midiɗi pinziba na zamai ɗa aŋ zi pin gadai na wiiɗi Yudeyakai maɵa maɵa ɗa?

¹⁵Tumu ɗa mu ɗumu Yudeyakai zi wii, mu ɗumu na war pinziba na zamai na zamai na tuwarai hanɗa kai.

¹⁶Won hlai na mu suɗumu ɓa ɗif murɗek a za edi aŋ jre pin sdani gadai ɗa kai, amma pin yimi na wiini na war Yesu Kristu, kapai mu zumu edi aŋ jre ɗikat burini yimi na wiini Yesu Kristu, pin sdani gadai ɗa kai.

¹⁷Amma na ɓa mu zumu edi aŋ jre gaini Yesu Kristu ɗa, tumu lai mu ɗumusi ka ɗa tuwarai, nɵa kapai Kristu a bunda aŋ ɵeŋ na wiini tuwur ɗi? Duk kai zaŋ.

¹⁸Na ɓa wala na mu hoŋ azumai ho, mu waya mu rgaŋ amai pra ɗa, mu siŋka edi na ɗa ɓa mu ɗif n’a ha amai midini

¹⁹Buri pin gadai ɗa, ta dama m’aŋ gaini mri su, sin gadai ɗa, kapai mu sumna kara burini Alaw. M'aŋ gaini tuku sin dagra gaini Kristu:

²⁰M'aŋ kara tiyana mu ta kir kai, amma a Kristu n’a sumna karni wara ɗa, simniŋa na kara war neŋ-si na tiyana hanɗa, mu sumna kara war yimi na wiini ahini Alaw, n’a daraŋa, n’a sa sini dama buriya lai.

²¹Mu dara mu bla yum na wiini Alaw edi kai, buri ɓa na ɓa jre-ɗikat a na pin gadai ɗa, nɵa Kristu a mra na ɗa kadai meere.