Read Mousgoum Galatekai 3 Bible Online

Galatekai 3 - Mousgoum bible

Galatekai 3

¹Tiki Galatekai na tatalakai, ɗif n’a kinwiiki asiya ɗa? Paŋ ktai e siŋkiki Yesu Kristu gaini tuki amai sini dagra nɵa tok.

²Mu firya mu ɵina seŋ miki par ktai, tiki ki nivi seze ɗa pin sdani gadai zaw, buri ki ɵini seŋ na midini yimi ɗa ɗi?

³Tiki ki ɗi na tatalakai maini hanɗa nɵa ɗi? Ki tikisi piki war seze, ki firyi ki vidi edi war neŋ-si ɗi?

⁴Sda na ki ziŋ paŋ na ɗa kadai meere ɗi? Na ɓa kadai meere ɗa a kiɗa a za kai.

⁵Ni n’a siki Seze, n’a za sda zi hiila arbaki lai na ɗa, a zaŋ ɵa na ɗa pin sdani gadai ɗa zaw, zaw buri na ɓa ki ɵini labar na wiini yimi ɗi?

⁶Abraham a yima war Alaw, nɵa hanɗa a pɵa burini aŋ jre-ɗikat.

⁷Nɵa aga ki yimiŋ miɗiki ɓa alini Abraham e ɗi nagai n’e ɗa pin yimi ɗa.

⁸Buri ɗû lai, won hlai n’a siɗa edi wuzani hlai par ɓa Alaw aga a bindiɗi pinziba na zamai ɗa aŋ jre-ɗikat pin yimi ɗa, a sa labar na pɗem hanɗa wiini Abraham wuzani hlai par ɓa pinziba na midini afti paŋ aga e nivi ɓiki puku tuku.

⁹Nɵa, nagai n’e ɗa pin yimi ɗa, e nivi ɓiki gaini Abraham n’epin-yimi.

¹⁰Nagai paŋ n’e ɗa pin gadai ɗa, e ɗa zumai pin tusa. Buri aŋ gai ɗû maini nɵa: Asiya, asiya ɗi paŋ n’a na za pin wazagai n’aŋ gai ɗû war gadai ɗa kai, n’a na siika pini zini haa sin vidini kaalai ɗa, tusa aga a sumna midini.

¹¹Ɗif a sɗa aŋ bunda jre-ɗikat arni Alaw gaini gadai kai, hanɗa a na armu gaglai, buri ni n’a na jre-ɗikat pin yimi ɗa aga a sumna karni.

¹²Paŋ ktai gadai ɗa a na sini yimi par kai, amma gadai a muɗa ɓa: ɗif n’a za li pini wazagai hanɗa paŋ, aga a sumna karni gaini ni.

¹³Kristu a wurumusi edi pin tusa na wiini gadai ɗa par, a bunda burimu aŋ tusa, buri aŋ gai ɗû maini nɵa: Asiya, asiya ɗi paŋ n’a toko li amai sin luwuŋ, tusa aŋ midini.

¹⁴Kapai pinziba na zamai ɗa, e nivi ɓiki na wiini Abraham ɗa war Yesu Kristu; kapai pin yimi ɗa, mu nuvumu Seze n’Alaw a za ha midini ɗa lai.

¹⁵Tawalakai, mu muɗa na ɗa maini na ɗa e miɗi ɗa ɵa: Na ɓa ɗif a mra sek a ɵa ka mini li ɗa, ɗif a kiɗa a tika wala edi warni par kaalai, a tika zamai amlai mini kaalai.

¹⁶Nɵa Alaw a za ɵinini ha ɗa wiini Abraham gaini pinzibani, a na ɗa ɓa gaini pinziba viya ta nɵa kai. Amma gaini pinziba ktai pal: wiini pinzibaku, hanɗa a Kristu.

¹⁷Nɵa mu dara mu muɗa na ɗa ɓa: Miɗi n’a muɗasi ei gaglai war mini Alaw par ta ɗa, gadai n’a halasi buza miya puɗu gaini doogo doogo hu, asakal hanɗa par ɗa, akiɗa a fuɗaŋ edi kai, ɵa kai ɗa ha n’Alaw a zaŋ ɗa a bunda edi aŋ wala kadai.

¹⁸Buri ɓa na ɓa bulum ɗa a nafu pin gadai ɗa aga a za pi ɵinini ha ɗa kir kai. Amma Alaw a za yumni sini Abraham ɗa pin ɵinini ha.

¹⁹Nɵa sda na wiini gadai tiɓ ɗa a ma ɗa? Gadai a sasi ɗa burini hi-n’amai midini gadai, ha pinziba na ɵinini ha a za burini ɗa a cosi, gadai hanɗa e miɗiŋ edi ɗa e ɗi ɗai zi ɵeŋ na war fuŋ n’Alaw, gaini ɗif n’a tapa arba.

²⁰Ɗif n’a tapa arba hanɗa a na buri a tapa gaini ɗif ktai bas kai, amma Alaw a ktai.

²¹Nɵa gadai ɗa a bula edi sin ɵinini ha na wiini Alaw ɗi? Duk kai zaŋ. Na ɓa Ala a safu gadai ktai na gaini ni ɗif a kiɗa a sumna karni ɗa, jre-ɗikat ɗa a za fu fakat fakat pin gadai.

²²Amma ɗû a mula wazagai paŋ azumai pin tuwur, kapai ha ɗa a sa ɗa pin yimi na war Kristu, siɗi nagai n’e yimi.

²³Wuzani hlai na yimi a cosi kai hai ɗa, mu ɗumu fu gaini dûgi dugn pin gadai, maini war daŋgai nɵa, aŋ biyumu yimi n’Ala w aga a siŋkaŋsi edi sumu ɗa.

²⁴Nɵa gadai a bunda aŋ ɗif n’abai na wiimu haa sini gizini Kristu ta, kapai mu zumu edi aŋ jre-ɗikat gaini yimi.

²⁵Hlai na yimi a cosi co ɗa, tumu mu ɗumu azumai pin ɗif n’abai ɗa kir kai.

²⁶Buri tiki paŋ ki ɗi alini Alaw pin yimi na war Kristu Yesu.

²⁷Buri ɓa tiki paŋ na ki nivi baptisme na wiini Kristu ɗa, tiki ki wi ki Kristu siki.

²⁸Ɗif na Yudeya aŋ kir kai, na Grek aŋ kir kai, bege aŋ kir kai, na kempe aŋ kir kai, wus aŋ kir kai, muni t'aŋ kir kai, buri tiki paŋ ki ɗa ktai war Kristu Yesu.

²⁹Na ɓa tiki ki ɗi na wiini Kristu ɗa, nɵa ki ɗi pinzibani Abraham, zi mili bulum, na pin ɵinini ha ɗa.