Read Mousgoum Galatekai 6 Bible Online

Galatekai 6 - Mousgoum bible

Galatekai 6

¹Tawalakaya, na ɓa ktai arbaki a kɵa li war meefeŋ ɗa, koo ɓa a meefeŋ na wata ɗi, tiki na ki ɗa war seze ɗa, ki zini pini, kapai a nava sini, amma war hangal, tuku lai aga ku za hangal, kapai ku nava suku war tanai kai.

²Ki libi jakɗi marki arbaɗi marki, nɵa aga ki vi amai gadai na wiini Kristu.

³Asiya ɗi paŋ n’a tala sini ɓa a z aŋ ɗif ya, kapai a wala ktai kai ɗa, a duula na ɗa a sini dama.

⁴Hina asiya ɗi paŋ a fufuka sini dama, nɵa aga a kiɗa a nava wala n’a kola sini gaini war sini dama, a kola sini ɗa midini maini kai.

⁵Buri ɗif paŋ aga a luba jakni gaini midini dama.

⁶Ɗif n’aŋ war hitrini seŋ n’Alaw ɗa, aga a ɓurwa wazagai na pɗamai paŋ gaini ni n’a na hitraŋ.

⁷Aga ki hini ɗif a wiliki edi kai, e ɵi dawaŋ gaini Alaw kai, wala na ɗif a suuɗaŋ ɗa, a n’aga a haɗaŋ ɗa lai.

⁸Ni n’a suuɗa burini sini dama ɗa, aga a haɗa hiɗi na wiini neŋ-si: Luɗi n’edi, amma ni n’a suuɗa war seze, aga a haɗa hiɗi na wiini seze lai, hanɗa ɓa suŋfa n’a vada kai.

⁹Aga mu kiyumu kai aŋ zumu sda na pɗamai, buri ɓa aga mu huɗuŋmu war hlaini, na ɓa mu mulumu tumu pumu kai ɗa,

¹⁰Buri nɵa, won hlai na ɓa mu kuɗumu aŋ zumu ɗa, aga mu zumu pɗem siɗi ɗai paŋ, a suwa paŋ siɗi ɗi zi yimi n’e ɗa gaimu.

¹¹Tili ɗû n’abakai hanɗa, mu ɗoŋɗi siki gaiɗi ta dama.

¹²Nagai n’e ɗa ziki dewele miɗiki buri ki ɵi gurgle na ɗa, e diri e siŋki ɗa a siɗi arɗi ɗai. Nagai n’e ziki dewele ɓa ki ɵi gurgle na ɗa, a na buri wala zamai kai, ɓa kapai e siɗi gir burini dagra na wiini Kristu ɗa kai.

¹³Buri ɓa nagai dama n’e ɵi gurgle ɗa, e ɗa zi pini gadai ɗa kai, amma e firyi ɓa tiki ki ɵi gurgle, kapai e kiɗi e kûli siɗi gaini gurgle na ki ɵiŋ ɗa.

¹⁴Ta ɗa, aga mu kola sa burini wala zamai duk kai, sai burini dagra na wiini ni Epiɗ-ɗaimu Yesu Kristu, gaini hanɗa duniya paŋ t'aŋ gai tuki amai sin dagra buriya, ta buriɗi duniya nɵa lai.

¹⁵Buri ɓa, na pɗem ɗa a ɵini-gurgle ɗa kai, a ɵini-gurgle-kai ɗa kaalai, amma a ɗif na hehe ɗa.

¹⁶Nagai paŋ n’aga e zi pin gadai hanɗa, ɵeɗ gaini yum a sumna gaiɗi, maini n’a sumna midiɗi Izrayel na wiini Alaw ɗa nɵa.

¹⁷Tiyana par, ɗif aga a kaiyaŋa mada kir kai, buri ɓa ta m’aŋ gain wala n’a siŋka ɓa mu wiini Yesu ɗa war amur-sa.

¹⁸Tawalakaya, a zuva ɓa yum na wiini Epiɗ-ɗaimu Yesu Kristu a za gaini hiiniki ɗa. Amen.