Read Mousgoum Efesekai 4 Bible Online

Efesekai 4 - Mousgoum bible

Efesekai 4

¹Nɵa mu siiwiki, ta ɗif zi daŋgai war Epiɗ-ɗai, aŋ piyi payai n’a kata pin yiki na ki niviŋ,

²war hûsi, war hangal war ziyini seŋ na gaini hangal, ki libi marki arbaɗi marki war diri,

³ki fiɗi was aŋ giɗimi simni na ktai war seze, war simni na ɵeɗ n’arbaɗi marki.

⁴Si a ktai, Sezea ktai lai, maini n’Alaw a yikikisi sini biyi-na-pin-ɵeɗ na ktai na ki yikisi burini nɵa;

⁵Epiɗ-ɗai a ktai, yimi ɗa a ktai, baptisme ɗa a ktai,

⁶Alaw ɗa a ktai, n’a Epiɗ-ɗai paŋ, a na amai midiɗi ɗai paŋ, a na warɗi ɗai paŋ lai.

⁷Amma sin asiya asiya paŋ arbamu, yum a sa, piɗi daram zi like na Kristu a ŋa warɗi ɗa.

⁸Maini na ɗû a muɗa ɗa nɵa: A hala amai midini hlai n’amai mogo, a yimiɗisi bagakaiedi warni par, a sa like wiiɗi ɗai lai.

⁹Miɗi na ɓa a hala amai ɗa, a dara a muɗa maɵa ɗa? A dara a muɗa na ɗa ɓa, haa azumai war hlai n’azumai, a dara a muɗa midini afti lai kai ɗi?

¹⁰Nn’a niyasi azumai, a ni n’a hala haa amai midini hlai n’amai par ɗa lai kapai a va hlai paŋ.

¹¹Hanɗa a ni n’a suɗumo na zamai aŋ apostelai, na zamai aŋ ɗai na min Alaw, na zamai aŋ ɗai n’e ɓiki labar na pɗem, na zamai aŋ zi giɗimi, zi hitri lai;

¹²kapai e hitriɗi na sɗik midini sda zi ɵeŋ, buri ri n’amai na wiini sini Kristu,

¹³haa tumu paŋ mu gumu sin tipi na ktai na war yimi, gaini siɗi na wiini Ahini Alaw lai, tumu aga mu bundumu aŋ ɗai na gaini wili amai ca, gaini kiti amai war wilini Kristu;

¹⁴nɵa aga mu hinumu aŋ aliyagoi na mayaw a kiciwiiɗi, na hitrai a miliɗi na zaw na zaw, na ɗai e duuliɗi, e miliɗi edi gaini yel zamai zamai ɗa kai.

¹⁵Amma na ɓa mu muɗumo jre war diri, aga mu wulumu amai war wazagai paŋ, war ni n’a a humok, a rada muɗa: Kristu.

¹⁶Gaini ni, ali-tini-si paŋ aŋ gaini niggi sini marni, gaini tipi sini marni lai. Alini-tini-si ɗa aŋ gaini gaɵ arbani ta ta, kapai a tapa si ɗa amai. Won hlai n’alini-tini-si paŋ a za sda ɗa, si na gaini abaini ɗa a wula amai, a rga amai kiini war diri lai.

¹⁷Hanɗa a wala na mu dara mu muɗaŋ, mu muɗaŋ pra war Epiɗ-ɗai, aga ki piyi maiɗi ɗai na kadai n’e piyi pin hiini na digai ɗa ɵa kai, kai war hiiniɗi na kadai nɵa kai.

¹⁸Hiiniɗi ɗa aŋ gaini ŋulvi, nagai e ɗi morkokoi buri payai na war Alaw, burini siɗi kai n’aŋ warɗi, buri ɓa agulɗi aŋ gaini diŋri;

¹⁹hiini na pɗem midiɗi kir kai ɗa e si siɗi edi war zini maɵara, haa nagai azi wazagai na haharai paŋ gorom gorom.

²⁰Amma tiki ɗa, ki nivi hitri midini Kristu ɗa ɵa kai,

²¹Na ɓa ki ɵini ɗa a mini ni mal mal ɗa, na ɓa e hitiriki midini ni mal mal, ɓa jre ɗa a na war Yesu ɵa ɗa,

²²tiki aga ki hini ɗif na wel n’aŋ warki ɗa edi, n’a kata gaini payaiki na ɗipar, n’a ɓulka edi pin diri zi rhai ɗa.

²³Tiki aga ki bindi hahakai war hiiniki gaini Seze-sɗik,

²⁴Aga ki wi ɗif na hehe siki, n’a rga pin dirini Alaw, war jre, gaini sɗik maini n’a za war jre ɗa nɵa.

²⁵Nɵa, ki hini eles edi, asiya asiya paŋ a miɗini wiini maini ɗa a jre, buri tumu mu ɗumo ali-tini-siɗi marmu.

²⁶Na ɓa ki zi li hiy ɗa, ki zi tuwur kai, ki hiniti futi te nawa midini hiyki kai.

²⁷Ki hinini hlai na wiini mat kai.

²⁸Ɗif zi mihill ɗa aga a hala wala kir kai, aga a fuɗa was aŋ za sda gaini tini dama, kapai a nava wala aŋ zina pini ni na hajani a na ɗa lai.

²⁹Ki hina seŋ na meefeŋ a niyasi edi war miki par kai, amma na ɓa a sɗa aŋ za ɗa, a niyasi edi war miki par a seŋ n’kiɗa a rga wala amai, n’a za pɗem wiiɗi nagai n’e ɵiniŋ ɗa lai.

³⁰Ki zi wala na Seze-sɗik na wiini Alaw a kwima burini kai, seze n’Alaw a tikaŋ siki aŋ tampoŋ.

³¹Ki hini wala zi limi war, gaini suwar garni hiy, gaini ɗuwal gaini tirki lai a ɵina arbaki kai, gaini meefeŋ paŋ lai.

³²Ki zi pɗem siɗi marki arbaɗi marki, ki hiini haw miɗiŋ i marki, ki si ni arbaɗi marki dama, maini n’Alaw war Kristu a siki ni wiiki tiki ɗa nɵa.