Read Mousgoum Filipekai 1 Bible Online

Filipekai 1 - Mousgoum bible

Filipekai 1

¹Paulus gaini Timotewus, ɗai zi sda na wiini Kristu Yesu, siɗi nagai n’e ɗa sɗik war Kristu Yesu war Filipi, siɗi abakaiɗi gaiɗi zi zinai na wiiɗi lai.

²Alaw apumu gaini Epiɗ-ɗaimu Yesu Kristu e siki yim gaini ɵeɗ.

³Hlai paŋ na mada a kɵa li gaiki ɗa, mu sa tese sin Alaw na wiya,

⁴War siiwiŋa na buriki paŋ, kureɗ, mu siiwa gaini firiyi;

⁵buri diŋgi na ki diŋgi gaya war sdani labar na pɗem sin mefeŋ n’avut ɗa par haa tiyana.

⁶Mu yima fakat ɓa ni n’a tika pini sda hanɗa warki, aga a hala gaini haa a ɵaŋ edi, haa sin mefeŋ na wiini Kristu Yesu.

⁷Hiini na mu hiinaŋ mai hanɗa ɵa ɗa, a futini, buri tikipa ŋ ki ɗa amlai warɗi agula. Buri ɓa tiki ki ɗa gaya war like n’Alaw a saŋ sa ɗa: tiyana na mu na warni jaɓ, zaw won hlai na na mu naka mu muɗa ezini labar na pɗem edi, zaw won hlai na mu naka mu ɓakaŋ lai ɗa.

⁸Alaw a zaidaŋa, a sɗa ɓa mu diriki gara warɗi agula, gaini diri na wiini Yesu Kristu dama.

⁹Wala na mu zilbaŋ war siiwa na wiya ɗa, diri na wiiki a riya amai sek sek, war siɗi gaini siɗi na hulum.

¹⁰Kapai gaini hanɗa ki siɗi aŋ zi ɓraw arbani wazagai, aŋ siɗi na pɗem, kapai ki simni hilu gaini seŋ miɗiki kai, aŋ biyi mefeŋ na wiini Kristu ɗa,

¹¹kapai gaini Yesu Kristu ɗa, ki zi sda na pɗamai viya na buriɗi abai gaini kol na sini Alaw.

¹²Tawalakai, mu firya ɓa ki siɗi hanɗa, wala n’a za sa ɗa, a zina pini labar na pɗem aŋ hala wuzani.

¹³Bur ɓa ɗai n’e ɗa e zi sda ahani Lawan paŋ gaiɗi na war hlai zamai ɗa lai, e siɗi edi gaglai ɓa m’aŋ war daŋgai na ɗa burini Kristu.

¹⁴Simniŋa na war jaɓ ɗa a sa gdaŋ viya wiiɗi tawalakai na war Epiɗ-ɗai, e ɓiki seŋ edi gaini gdaŋ, gaini hunai piɗi kai.

¹⁵A jre, zamai ɗa e ɓiki labar na midini Kristu na ɗa war sile, e piyi ɗa a sispai, amma zamai e ziŋ ɗa war hiini na pɗem lai.

¹⁶Nagai hanɗa e zi na ɗa war diri, buri e siɗi ɓa m’aŋ war jaɓ na ɗa, kapai mu siŋka ezini labar na pɗem edi.

¹⁷Amma nagai na zamai e ɓiki labar midini Kristu na ɗa war hiini zi sile, hiiniɗi ɗa gai futini kai. E hiini ɓa e riyi amai na ɗa a gir na wiya war jaɓŋa ɗa.

¹⁸Kal ɵa, koo ɓa e ɓikiŋ war jre, war jre kai ɗi ɗa, labar na midini Kristu a na ɓaka. Buri hanɗa mu firya, Amma aga mu firya pra pra,

¹⁹buri mu sɗa ya hanɗa aga a bunda aŋ pɗem na wiya, aga mu kora burini siiwa na wiiki, gaini zinai na wiini seze na wiini Yesu Kristu.

²⁰Pin wala na mu na bayaŋ ɓa aga a za, mu na bayaŋ pin ɵeɗ lai, aga mu tika siyer burini wala ktai kai zaŋ, tiyana par haa dawai, mu yima fakat fakat ɓa Kristu aga a niviti abai war sa, koo ɓa m’aŋ kara, koo ɓa mu mra su ɗi!

²¹Buri ɓa, buriya ta ɗa, suŋfaŋa a Kristu, mri ɗa a waa zi der.

²²Amma na ɓa a pɗem buri mu sumna kara war neŋ-si burini sda n’a sa ta ɗa, mu sɗa wala na mu varaŋ kir kai.

²³Hiiniŋa a ɓurwa ca, wara ktai ɓa mu hala wiya aŋ sumna gaini Kristu, a wala na pɗem a suwa pra,

²⁴Amma buriki tiki ɗa a pɗem ɓa mu sumna war neŋ-si.

²⁵Nɵa ɗa mu sɗa ɓa aga mu sumna gaiki, mu sɗaŋ ɵa gaglai. Aga mu sumna gaiki pra pra kapai mu zina piki, kapai firyiki na war yimi a riya amai a suwa a suwa.

²⁶Kapai won hlai na mu wayaɗi li arbaki ɗa, firiyi na wiiki na burini Yesu Kristu ɗa a riya amai abai buriya ta.

²⁷Amma a pɗem ɓa ki piyi payai na pɗem n’a kata pini labar na pɗem na wiini Yesu Kristu, kapai na ɓa koo mu halaɗi aŋ tiliki, koo mu halaɗi kai tekeɗeɗi ɗa, mu ɵina ɗa ɓa tiki ki ɗa gdaŋai war seze ktai, ki hitimi na ɗa miki ktai burini yimi na wiini labar na pɗem.

²⁸Ki hiniɗi gawki e miliki hunai piki war wala ktai kai zaŋ, buriɗi nagai ɗa, a wala n’a siŋka midini bi n’edi, amma buriki tiki ɗa a wala n’a siŋka midini kûri n’a na sini Alaw par,

²⁹buri ɓa, burini Kristu ɗa, tiki ki nivi yim, buri ki yimi war ni ktai kai, amma pra buri ki siɗi gir burini lai.

³⁰aŋ tipi gaya war hatam hanɗa, na ki tiliŋa warni, na tiyana ki ɵini labarni ɓa mu na hitimaŋ na ɗa ɵa.