Read Mousgoum Filipekai 4 Bible Online

Filipekai 4 - Mousgoum bible

Filipekai 4

¹Buri nɵa tawalakaya zi diri gara, tiki na mi diriki gara, tiki na ki ɗi firiyi na wiya, ki ɗi bogorai na wiya lai, ɗiyi gdaŋ war Epiɗ-ɗai, tiki zi diri gara.

²Evodia gaiɗi Sintik mu na siiwiki buri ki simni war ɵeɗ arbaɗi marki war Epiɗ-ɗai.

³Nkam, tuku lai, maiya na jre, mu siiwuku buri ki zina piɗi, nagai e fiɗi was gaya ktai, burini ɓikini labar na pɗem, gaini Kleman lai, mara zi sda zamai na yikiɗi aŋ gaini ɗû war maktuɓ zi suŋfa.

⁴Ki firiyi kureɗ war Epiɗ-ɗai, mu dara mu muɗa pra, ki firiyi.

⁵A zuva ɓa ɗai paŋ e siɗi pɗem na wiiki ɗa, Epiɗ-ɗai a ŋasi gobi.

⁶Ki huwyi siki burini wala ktai kai zaŋ, amma war wala paŋ ɗa, ki hajaki wuzani Alaw war siiwa, war tuwiki na sini, war zini tese lai.

⁷Sleɗ na wiini Alaw n’a suwa hiini paŋ ɗa aga a giɗima agulki gaini hiiniki lai war Kristu Yesu.

⁸Na a hina ɗa, tawalakaya, a zuva ɓa, wazagai na jre paŋ, na ɗai e kûliŋ paŋ, n’a na woɗi futini paŋ, n’a na hilu paŋ, na ɗai e diriŋ gara paŋ, na ɗai e miɗi pɗem midini paŋ, n’a na pɗem paŋ, na zi kol paŋ ɗa, ki hiini midini wazagai hanɗa.

⁹Wazagai na ki hitiriŋ, na ki yimiŋ, na ki ɵiniŋ, na ki tiliŋ sa par ɗa, ki zi hanɗa. Alaw zi ɵeɗ aga a za gaiki.

¹⁰Mu firiya abai gara war Epiɗ-ɗai, buri ɓa ki nivi futi aŋ siŋki hiiniki n’a muɗa edi, hiini hanɗa a nafu warki avut par, amma ki nivi futi aŋ zi hanɗa kai.

¹¹Mu muɗa hanɗa buriɗi suwai na te suwaŋa ɗa kai, amma buri ɓa ta ɗa mu hitira ta aŋ firiya gaini wala n’aŋ ta ɗa.

¹²Mu sɗa simni na war haw lai, na war der ɗa lai, war wazagai paŋ, war hlai paŋ lai, mu hitra simni na war wiyamai, na gainni vi lai, mu sɗa simni na war suwai gaini der lai.

¹³Mu kiɗa aŋ za wazagai paŋ gaini Ni n’a saŋa spak ɗa.

¹⁴Amma tiki ɗa, tipi na ki tipi gaya war girŋa ɗa, ki zi pɗem.

¹⁵Tiki Filipekai, tiki gaini miɗiki dama ki siɗiŋ ya, war pin zi tiki na wiini labar na pɗem par ɗa, won hlai na mu halasi a Makedonia par, tipi ktai n’a tapa gaya aŋ saŋa wala zaw aŋ tufaŋa wala aŋ kai, sai ki ɗi tiki ktai.

¹⁶Buri haa war Tesalonikia par tiki ki ɵiniŋaɗi zinai azi viya.

¹⁷Mu paya na ɗa a katu na tiki par kai, amma mu paya na ɗa ɓa ki nivi riba viya pini.

¹⁸Wazagaiŋa ɗa a na viya, m’aŋ gaini vi ta, Epafrodit a kaŋasi wazagai na ki ɵiniŋasi ɗa, maini yitir n’a luguza pɗem, a ɓaka n’Alaw a yimaŋ, a firyaŋ lai nɵa.

¹⁹Alaw na wiya aga a va hajaki paŋ amai, pin kiɗi na wiini warɗi abai, war Kristu Yesu.

²⁰Kol sin Alaw n’apumu haa hlai n’a vada kai na vada kai. Amen.

²¹Ki ɵiɓi wuti wiiɗi na sɗik na war Yesu Kristu ɗa paŋ, tawalakai n’e ɗa gaya ɗa e ɵiɓiki wuti

²²-Na sɗik paŋ e ɗa ɵiɓiki wuti. A suwa paŋ nagai n’e ɗa ahani Sezar ɗa.

²³Yim na wiini Epiɗ-ɗai Yesu Kristu a za gaini sezeki.