Read Mousgoum Kolosekai 1 Bible Online

Kolosekai 1 - Mousgoum bible

Kolosekai 1

¹Paulus, apostel na wiini Yesu Kristu, pin diri na wiini Alaw, gaini tawal Timotewus,

²siɗi tawalakai na war Kolose, n’e ɗa sɗik, jre lai war Kristu. Alaw n’Apumu a siki yim gaini ɵeɗ.

³Mi si tese sin Alaw epini Epiɗ-ɗaimu Yesu Kristu, mi ɗa siiwi kureɗ buriki lai.

⁴Tiyi mi ɵini labar midini yimi na wiiki, gaini diri na ki diriɗi ɗai na wiini Alaw.

⁵Burini biyi-na-pin-ɵeɗ n’a na biyiki amai war fuŋ n’Alaw, biyi na pin ɵeɗ na tiki ki ɵini labar midini ya war seŋ na jre, a dara muɗa labar na pɗem.

⁶Labar na pɗem hanɗa a coɗi ahaki ya, maini n’a na wa ali, a na wula amai lai warɗi duniya na gaini abaiɗi, a na ahaki ɗa nɵa lai, haa sini mefeŋ na ki ɵini, na ki hitri aŋ siɗi yumni Alaw jre jre lai.

⁷Pin gadai na ki niviŋ tin Epafras maiki zi bege, zi diri gara, buriki, a ɵeŋ na wiini Kritu na jre,

⁸a miɗiyi midini diri na Seze a waŋ warki ɗa

⁹Nɵa tiyi lai, sin mefeŋ na mi ɵini labar hanɗa par, midiyi a wula gaini siiwa na sin Alaw buriki ɗa kai, mi siiwi tini buri a viki gaini siɗini dirini war yel gaini siɗi na war seze paŋ lai,

¹⁰kapai ki piyi payai n’a juva arni Epiɗ-ɗai, ki tili arni pɗamai war wazagai paŋ, ki wi ali war sda na pɗamai paŋ, ki wili amai war siɗi na wiini Alaw lai.

¹¹Kapai ki nivi spak war wazagai paŋ pin gdaŋni n’abai, gaini hanɗa ki siɗi aŋ ziyi seŋ paŋ gaini hangal, ki siɗi aŋ libi tanai paŋ gaini hangal lai.

¹²Gaini firiyi, ki si tese sin Api, n’a bundumu aŋ ɗai n’e kiɗi aŋ nivi bulum gaiɗi na sɗik paŋ war gaglai.

¹³A plumusi edi pin spakni gegeŋ par, a mulumusi warɗi pai na wiini Ahini zi diri gara.

¹⁴War ni mu nuvumu pli-n’edi gaini hinini tuwur na wiimu lai.

¹⁵Ni a ni n’a siŋka Alaw na ɗif a talaŋ duk kai edi, a Ahi zi wi n’avut arbani wazagai n’a rga paŋ.

¹⁶Buri wazagai paŋ a rga gaini Ni, wazagai na war fuŋ-n’Alaw, wazagai na midiɗi yai lai, wazagai n’armu a talaŋ gaini na mu tuluŋmu kai ɗa lai, Paramai zi pai, abai pai, gaini spak. A za wazagai paŋ a ni, burini ni lai.

¹⁷Ni ɗa, a na wuzani wazagai paŋ par, wazagai paŋ a na na ɗa gaini ni lai.

¹⁸Ni a humok na wiini si, a dara muɗa na wiini tipi. Ni a pi zi tiki, a Ahi zi wii n’avut arbaɗi zi mri, kapai war wazagai paŋ ɗa, a za aŋ n’avut.

¹⁹Buri a tala arni Alaw pɗem aŋ hina wala n’a yika ɓa vi n’amai ta ɗa a sumna warni.

²⁰Gaini Kristu a firya a toya arbani gaini wazagai paŋ, wazagai na midiɗi yai, wazagai na war fuŋ-n’Alaw lai, a za ɵeɗ gaini Ni, gaini felni n’amai sini dagra.

²¹Tiki na ɗipar ki ɗi ka morkokoi, gawni Alaw war hiini na wiiki, gaini sdaki na maafanai lai.

²²Tiyana Alaw a toya li gaiki war Ahini, war mrini na war neŋ-si, kapai a sɗa aŋ ɗiyiki wuzani arni sɗik, gaini tirki siki kai, seŋ na meefeŋ miɗiki kaalai.

²³- Na ɓa ki ɗiyi li war yimi jre jre, gaini pi azumai gdaŋ, gaini ɗiyi gdaŋ lai war biyi na pin ɵeɗ, na labar na pɗem a saŋ, na ki ɵiniŋ, n’a ɓaka li sin wazagai zi rgi paŋ n’a na midiɗi yai, na ta Paulus mu bunda tiyana aŋ ɵeŋni na ɗa, na ɓa ki hini ɗif aŋ wiliki edi warni par kai ɗa!

²⁴Tyana mu firiya war gir na mu na sɗaŋ ɗa buriki, gir n’a hina mini Kristu burini sini, a dara muɗa burini tipi ɗa, mu dara mu vaŋ amai war neŋ-sa.

²⁵Ta mu bunda aŋ ɵeŋ na wiini tipi pin sda n’Alaw a saŋ sa buriki kapai mu ɓaka seŋni Alaw edi woɗi futini.

²⁶Wala zi ŋoyai hanɗa a naka gaini ŋûyi cok arɗi ɗai, haa aɗipar, amma Alaw a siŋkaŋ li edi gaglai tiyana arɗi ɗai na wiini.

²⁷Wiiɗi nagai hanɗa, Alaw a firya a siŋkiɗi ɓa, arbaɗi pinziba na zamai ɗa lai wala zi ŋoyai hanɗa a na za a suwa pɗemni, hanɗa ɓa: na ɓa Kristu a na arbaki, a biyi-na-pin-ɵeɗ na wiiɗi abai.

²⁸Hanɗa a ni na tiyi mi ɗa ɓiki midini, na mi ɗa hitriɗi ɗai midini, mi gidiɗi ɗai paŋ gaini lai war yel, kapai ɗif paŋ a va amai war pɗem war Kristu.

²⁹Buri hanɗa, mu na fuɗa was, aŋ hitima gaini gdaŋ na wiini ni n’a na za sdani gaya.