Read Mousgoum Kolosekai 3 Bible Online

Kolosekai 3 - Mousgoum bible

Kolosekai 3

¹Nɵa ɗa, na ɓa ki ɵiyi amai ya gaini Kristu ɗa, ki piyi ɗa a wazagai n’amai, won hlai na Kristu aŋ gaini simni war hlai zi hormo na wiini Alaw.

²Ki hiini ɗa midini wazagai n’amai, midini wazagai na warɗi yai ɗa kai,

³buri ɓa tiki ki mri ca, suŋfaki aŋ gaini ŋoyai gaini Kristu war Alaw.

⁴Won hlai na Kristu, suŋfa na wiiki, a siŋka sini li edi gaglai, war hlai hanɗa tiki lai aga ki firyi gaini warɗi abai.

⁵Nɵa ɗa ki fiɗi wazagaiɗi yai ɗa edi, hanɗa a: maɵara, hi-hir, sile, hiini na meefeŋ, gorom, hanɗa a hûrgi n’azumai wuzani alawai na kadai.

⁶Pin hanɗa, hiy na wiini Alaw a halasi midiɗi nagai n’e ɵini kai ɗa.

⁷Hanɗa a wazagai na tiki ki ɗisi ka warni aɗipar, won hlai na ki ɗisi ka ki piyi maini hanɗa nɵa ɗa,

⁸Amma tiyana ɗa tiki lai ki hini wazagai n’a na ɗa paŋ edi: hiy, suwar, zini meefeŋ, genai, seŋ na ɗewek, n’a niyasi edi war miki par.

⁹Ki zi eles wiiɗi marki arbaɗi marki kai, buri tiki ki kuɵi ɗif na wel edi siki par gaini sdani lai,

¹⁰ki wi siki a ɗif na hehe, n’a bunda hehe pin siɗi aŋ kata gani ni n’a rgaŋ.

¹¹War ni ɗa, Grek aŋ kai, Yudeya aŋ kaalai, zi ɵi gurgle aŋ kai, na zi ɵi gurgle aŋ kaalai, ɗai n’edi par e ɗi kai, na mukurakai e ɗi kaalai, bege aŋ kai, kempe aŋ kaalai, amma Kristu a na paŋ war paŋ.

¹²Nɵa ɗa, tiki n’Alaw a viriki edi, na sɗik, zi diri gara, ki wi agul zi yim warki, ki wi diri siki gaini hûsi gaini hangal gain ziyini-seŋ na gaini hangal lai.

¹³Ki libi seŋɗi marki arbaɗi marki, na ɓa ɗif seŋni a na gaini maini ɗa, e si ni arbaɗi marɗi, maini n’EPIƊ-ƊAI a siki ni nɵa, tiki lai ki zi nɵa lai.

¹⁴A suwa paŋ ki wi diri siki, hanɗa a wala n’a tipiki siɗi marki war vi n’amai na pɗem.

¹⁵A zuva ɓa, ɵeɗ na wiini Kristu na ki yikisi sini war si na ktai hanɗa a ŋa war agulki, ki simni gaini zini tese warki kûreɗ-kûreɗ.

¹⁶A zuva ɓa seŋni Kristu a sumna arbaki gaiɗi abaini, ki hitri marki, ki gidi marki lai arbaɗi marki war yel, gaini yama gaini yama zi tese gaini yama zi seze lai, ki zini yama zi zini tese warɗi agulki sin Alaw.

¹⁷Wala na ki ziŋ paŋ ɗa, koo war seŋ zi miɗi, koo war sda ɗi ɗa, ki zi paŋ war yikini Epiɗ-ɗai Yesu, ki zini tese wiini Alaw Api war ni lai.

¹⁸Tiki falakai, ki gidi piɗi maɵagaiki maini n’a na pɗem arni Epiɗ-ɗai nɵa.

¹⁹Tiki maɵagai, ki diriɗi falakaiki, ki divi siɗi kai.

²⁰Tiki aliyagoi, ki ɵini piɗi tamaiki war wazagai paŋ, buri hanɗa a wala na pɗem arni Epiɗ-ɗai.

²¹Tiki tamai na maɵagai, ki ɓilkiɗi agulɗi aliki kai, kapai hangalɗi a tuura kai.

²²Tiki ɗai zi sda, ki ɵini piɗi epin-gezakaiki na war neŋ-si war wazagai paŋ, hanɗa buriɗi arai kiini kai, maiɗi nagai n’e piyi aŋ zûvi arɗi ɗai nɵa kai, amma gaini hûsi warɗi agul, war hunai na pin Epiɗ-ɗai.

²³Na ki ziŋ paŋ ɗa, ki ziŋ gaiɗi agulki paŋ, maini na ɓa ki ziŋ na ɗa wiini ɗif kai amma wiini Epiɗ-ɗai.

²⁴Buri tiki ki siɗi ɓa aga ki nivi bulum aŋ vrak tin Epiɗ-ɗai par. Zi aŋ ɗai zi sda na wiini epin-gezaki na daaba, a dara muɗa Kristu.

²⁵Buri ni n’a za wala na woɗi futini ɗikat kai ɗa, aga a nava ɗa a wala na ɗikat kai n’a zaŋ ɗa. Buri Alaw a za ɓraw ni arɗi ɗai kai.