Read Mousgoum Kolosekai 4 Bible Online

Kolosekai 4 - Mousgoum bible

Kolosekai 4

¹Tiki Epin-gezakai, ki zi siɗi ɗaiki zi sda ɗa a wala na jre, na woɗi futini ɗikat, buri ki siɗi ɓa, tiki lai, epin-gezaki a na amai war fuŋ-n’Alaw.

²Ki siiki kureɗ war siiwa, ki simni karki warni lai warni zini tese.

³Ki siiwi buriyi lai, kapai Alaw a mala min hlai edi buriyi aŋ ɓiki seŋ, kapai wala zi ŋoyai na wiini Kristu, na m’aŋ warni jaɓ burini ɗa, a sɗa aŋ muɗa edi.

⁴Kapai mu sɗa aŋ muɗaŋ edi gaglai maini na mu muɗaŋ ɗa nɵa.

⁵Ki piyi gaini hangal arbaɗi nagai n’eɗisi edi ɗa, ki bi hlai edi kadai kai.

⁶A zuva ɓa a niyasi edi war miki par ɗa a seŋ na ɗamai, cetet gaini hum, kapai ki siɗi aŋ wiyini seŋ wiini asiya asiya ɗi paŋ maini n’a na ɗa ɵa.

⁷N'aŋ sa paŋ ɗa, Tikikus aga a miɗiŋki, ni a tawala zi diri gara, a ɵeŋ na jre, a maya zi bege na war Epiɗ-ɗai.

⁸Mu ɵinaŋɗi siki na ɗa buri hanɗa, kapai ki siɗi na siyi par, a siki arai zi pi lai.

⁹Mu ɵinaŋɗi na ɗa gaini Onesimus, tawala zi diri gara, a ɗif n’ahaki par, nagai aga e miɗiki midini wala n’a na za woni na ɗa.

¹⁰Aristarkus, maya n’aŋ war daŋgaya n’a ɵiɓiki wuti, Markus n’arwaini epini Barnabas a na ɵiɓiki wuti lai, ni na tiki ki nivi labar midini ɗa, na ɓa a halaɗi li siki, aga ki yimiŋ siki gaini futini,

¹¹Yesus n’e yikiŋ ɓa Yustus a na ɵibiki wuti lai, arbaɗi zi ɵi gurgle ɗa, hanɗa e ɗi nagai n’e tipi gaya war sda na wiiɗi pai-n’Alaw ɗa, mu nava arai zi pi siɗi par lai.

¹²Epafras n’ahaki par ɗa a na ɵiɓiki wuti, a ɗif zi sda na wiini Yesu Kristu, a na fuɗa was buriki kureɗ war siiwoni, ɓa kapai won hlai na ki vi li amai war pɗem, ki siɗi dirini Ala li edi gaglai lai ɗa, ki siɗi aŋ ɗiyi gdaŋ.

¹³Mu kiɗa mu muɗa zaida hanɗa midini, a za sda viya buriki, buriɗi nagai na war Laudikeya lai, gaiɗi nagai na war Hierapolis ɗa lai.

¹⁴Lukas, doktor marmaya zi diri gara gaini Demas lai e ɵiɓiki wuti.

¹⁵Ki ɵiɓiɗi wuti wiiɗi tawalakai na war Laudikeya gaini Nimfas gaini tipi n’a na aha war dalamni lai.

¹⁶Won hlai na ki ŋiti li letre hanɗa edi arbaki ta ɗa, ki sitiɗi wiini tipi na war Laudikeya ɗa e ŋiti edi arbaɗi ta lai. Na wiiɗi tipi na war Laudikeya ɗa tikiaga ki ŋiti edi arbaki lai.

¹⁷Ki miɗini wiini Arkipus ɓa, a tika hangalni sin ɵeŋ n’a navaŋ war Epiɗ-ɗai, kapai a vaŋ amai war futini.

¹⁸Mu na ɵiɓiki wuti, ta Paulus gaini ta dama, hina miɗiki a kɵa burini zabŋa, yim a ki hini miɗiki a kɵa gaya buri m’aŋ warni jaɓ; yim a sumna gaiki.