Read Mousgoum 1Tesalonikekai 2 Bible Online

1Tesalonikekai 2 - Mousgoum bible

1Tesalonikekai 2

¹Tiki dama ki siɗiŋ edi gaglai tawalakai, yimi na ki yimiyi siki ahaki ɗa a na kadai meere kai.

²Asakal na mi siɗi gir viya, na ɗai e siɗiyi gir aryi viya war Filipi mini na ki siɗiŋ na ɗa ɵa, tiyi mi nivi gdaŋ sini Alaw na wiimu par, aŋ ɓikiki labar na pɗem na wiini Alaw, arbani htam viya.

³Arai zi pi na wiyi ɗa a zi wili ɗif edi kai, a zi hi-hir kai, a zi rhai kaalai.

⁴Amma maini n’Alaw a titimiyi ya kapai a siyi labar na pɗem war tiyi, nɵa ɗa, tiyi mi ɓikiŋ ɗa buri firiyi na wiiɗi ɗai kai, amma aŋ sa firyi wiini Alaw n’a tetema agulyi.

⁵Tiyi mi hilisi gaiɗi seŋ zi rhai kai, maini na ki siɗiŋ ɗa nɵa, hiini zi gorom waryi kaalai, Alaw a zaida.

⁶Tiyi mi piyi kol na wiiɗi ɗai kai, na wiiki kaalai, na wiiɗi na zamai ɗa kaalai.

⁷Kadai tiɓ ɗa ki libiyi ki ɗi tiki, maiɗi apostelai na wiini Kristu ɵa, amma tiyi mi piyi arbaki maiɗi aliyagoi n’agogoi nɵa, maiɗi emiɗi ali na te ziziniɗi aliɗi nɵa.

⁸Nɵa a tala aryi pɗem buri mi ɓûrwi wazagaiyi paŋ gaiki war diri, a labar na pɗem na wiini Alaw ktai kai, amma suŋfaɗi agulyi lai, buri ɓa ki bindi buriyi aŋ zi diri gara.

⁹Buri nɵa, hini miɗiki a kɵa burini sda na mi ziŋ gaini kaiaiyi lai, mi zi sda girvudi gaini duvuk paŋ, kapai mi hini aŋ guma midini ktai arbaki kai, tiyi mi ɓiki labar na pɗem na wiini Alaw siki.

¹⁰Tiki ki ɗi zaidakaiyi, Alaw nɵa lai, ɓa mi piyi arbaki war sɗik, war jre gaini seŋ midiyi kaalai, arbaki tiki zi yimi.

¹¹Maini na ki siɗiŋ nɵa, tiyi mi zi sini asiya asiya paŋ arbaki, maini n’api a zaŋ siɗi alini nɵa,

¹²tiyi mi gidiki, mi siki arai zi pi, mi siiwiki buri ki piyi payai n’a kata arni Alaw, n’a yikikisi siɗi paini gaiɗi abaini.

¹³Buri nɵa, tiyi lai mi si tese sin Alaw kûreɗ-kûreɗ, buri na ɓa, won hlai na ki nivi seŋni Alaw na tiyi mi ɓikiŋ siki ɗa, ki yimiŋ maini seŋ na wiini ɗif nɵa kai, amma maini n’a na fakat ɗa ɵa. A seŋ na wiini Alaw, n’a na za sda warki tiki zi yimi ɗa lai.

¹⁴Tawalakai, tiki gaini miɗiki dama ki tiki ezini tipi na wiini Alaw na war Yesu Kristu n’a na war Yudeya: Ki siɗi gir tiɗi tawalakai na midini aftiki, hanɗa a gir na nagai e siɗiŋ tiɗi Yudeyakai ɗa.

¹⁵E ɗi nagai n’e fiɗi Epiɗ-ɗai Yesu edi gaiɗi ɗai na min-Alaw lai, e siɗiyi gir aryi, e ɗi arni Alaw pɗamai kai, e fiki amai siɗi ɗai paŋ lai.

¹⁶Nagai e ɗiliyi buri mi ɓiki seŋ siɗi pinziba na zamai ɗa, kapai e kûri kai, e vi amai na ɗa a mini tuwurɗi ɗa, amma hiy na wiini Alaw a ko midiɗi ya.

¹⁷Amma, tiyi ɗa tawalakai, mi ɓirwisi gaiki buri hlai n’agwi, -arki a kiɗa siyi kai sme, amma mi ɗa amlai warɗi agulki, waryi a ɵima gara aŋ hiliɗi aŋ tiliki pra, tiyi mi ɗa fiɗi was buri hanɗa gara.

¹⁸Azi viya, mi piyi futi aŋ hiliɗi aŋ tiliki, a suwa paŋ ta Paulus, amma Satan a ɗiliyi.

¹⁹Biyi-na-pin-ɵeɗ gaini firiyi gaiɗi bogorai zi kol a wiyi ɗa asiya ɗa? Ki ɗi tiki kai ɗi? Won hlai n’Epiɗ-ɗaimu Yesu aga a halasi ɗa?

²⁰Nkam, kol na wiyi gaini firyi na wiyi ɗa ki ɗi tiki.