Read Mousgoum 1Tesalonikekai 3 Bible Online

1Tesalonikekai 3 - Mousgoum bible

1Tesalonikekai 3

¹Won hlai na mi tili haa dabarai na mi zi aŋ kir kai ɗa, a tala aryi pɗem ɓa mi simni kiiyi war Aten.

²Nɵa mi ɵiniɗi Timotewus na tawalyi, ɗif n’a za sda gaini Alaw war ɓikini labar na pɗem na wiini Kristu siki, kapai siki gdaŋ, a iki arai zi pi lai war yimiki,

³kapai ɗif a sɗa aŋ gigida amai war gir n’a na za tiyana ɗa kai, buri ɓa tiki dama ki siɗi hanɗa ya, ɓa mi viri edi na ɗa buri hanɗa.

⁴Won hlai na mi ɗisi ka ahaki, mi miɗiki wuzani hlai parɓa aga mi siɗi gir, a cosi na ɗa a gir hanɗa, ki siɗiŋ ɵa lai.

⁵Buri nɵa, won hlai na hlai a hala kir kai ɗa, mu ɵinaɗi Timotewus, buri a yimasi labarni yimi na wiiki, kapai Epin-tanai ɗa a tiniki kai, kaai sdaɗi ɗa a ɓa edi kadai kaalai.

⁶Amma Timotewus a cisi ahaki par na ɗa tiyana, a kiyisi labar na pɗem midini yimi na wiiki, gaini diri na wiiki, gaini hiinii na pɗem namidiyi kûreɗ-kûreɗ, a miɗiyi ɓa ki firyi ɓa sai ki tiliyi gaini arki, maini na tiyi mi ɗa piyi futi aŋ tilki gaini aryi na ɗa ɵa lai.

⁷Nɵa tawalakai, arbani huwyi gaini gir n’aŋ siyi paŋ ɗa, tiyi mi nivi gdaŋ siki par, burini yimi na wiiki.

⁸Nɵa ɗa, tiyana mi ɗa karyi, buri ɓa ki ɗa gdaŋai war yimiki na war Epiɗ-ɗai.

⁹Tese na mi ɗa siŋ Alaw buriki buri firyi na mi ɗa firyi buriki wuzani Alaw na wiimu, miyi a sɗa aŋ muɗaŋ kai.

¹⁰Dufuk gaini girvudi paŋ mi ɗa tuwi sini gara, buri a hiniyi futi aŋ tilki pra, aŋ vi wala n’ahina min yimiki ɗa amai lai.

¹¹A zuva ɓa Alaw Apumu gaini midini dama, gaini Epiɗ-ɗaimu Yesu e zizinitiɗi fui na wuzaɗi siki sek ɗa ta.

¹²A zuva ɓa Epiɗ-ɗai a riya diri na ki diri arbaɗi marki gaini, gaini na ki diriɗi na zamai na zamai ɗa lai ɗa amai, a bundaŋ abai, maini na tiyi mi ziŋ siki ɗa nɵa.

¹³A zuva ɓa a sa gdaŋ warɗi agulki, kapai seŋ a za midini kai, sɗik wuzani Alaw Apumu war gizini Epiɗ-ɗaimu Yesu, gaiɗi na sɗik na wiini paŋ. Amen.