Read Mousgoum 1Tesalonikekai 4 Bible Online

1Tesalonikekai 4 - Mousgoum bible

1Tesalonikekai 4

¹N'a hina paŋ ɗa, tawalakai, tiyi mi siiwiki, mi siki arai zi pi warni lai, war Epiɗ-ɗai Yesu, tiki ki hitri siyi par payai n’aga ki piyiŋ, kapai ki zûvi arni Alaw, ki piyi na ɗa ɵa lai. Amma aga ki zi hanɗa wuzaki a suwa, a suwa pra.

²Buri tiki ki siɗi gadai na tiyi mi siŋki, n’a na sin Epiɗ-ɗai Yesu par ya.

³Diri na wiini Alaw ɗa a na ɓa ki zi edi aŋ sɗik: ki ɗili siki burini maɵara;

⁴asiya asiya paŋ arbaki aga a tikiti muni na wiini war sɗik, war hormo lai,

⁵a hina sini war suuna na maafanai kai, maini na ɗai n’e siɗi Alaw kai ɗa e ziŋ ɗa nɵa kai.

⁶Kapai ɗif a za wala na fuɗa si zaw a zini meefeŋ wiini tawalni war wala hanɗa kai, Epiɗ-ɗai aga a ziti sariya burini wazagai hanɗa paŋ, tiyi mi miɗiŋki ya mi miɗiŋki ya.

⁷Buri ɓa Alaw a yikumusi ɗa sin hi-hir kai, amma sin zi-n’edi aŋ sɗik.

⁸Nɵa ɗif n’a bla li gadai hanɗa edi ɗa, a bla edi ɗa a ɗif kai, amma a Alaw, Ni n’a siki Seze-siɗik na wiini.

⁹Burini diri na ki diri arbaɗi marki ɗa, jaaki buri ɗif a ɗo siki burini hanɗa kai, buri tiki gaini miɗiki dama ki nivi hitrai hanɗa sini Alaw par, aŋ diri arbaɗi marki.

¹⁰Tiki ki zi hanɗa siɗi tawalakai n’e ɗa midini afti na Makedoniya paŋ na ɗa ɵa lai, amma tawalakai, tiyi mi siki arai zi pi ɗa ɓa ziŋ wuzaki sek abai a suwa pra pra,

¹¹aŋ fiɗi was aŋ simni ɵeɗ gaiɗi ɗai paŋ, ki niyi war seŋɗi marki kai, ki zi sda gaini tiki dama lai, maini na tiyi mi gidiki midini ɗa nɵa,

¹²kapai ki piyi payai n’a zuva arɗi ɗai n’edi, nɵa aga ki piyi zinai tini ɗif par kai,

¹³Buriɗi nagai n’e mri ya ɗa, tawalakai, tiyi mi diri ɓa ki simni war siɗi kai ɗa kai, kapai aga ki kwimi maiɗi na zamai na biyi na pin ɵeɗ na wiiɗi aŋ kai ɗa nɵa kai.

¹⁴Buri ɓa, mu yimumu ɓa Yesu a mra ya, a ɵiya amai ya lai. Nɵa, Alaw aga a tipiɗi gaini Yesu nagai n’e mri ɗa.

¹⁵Tiyi mi miɗi na ɗa mai hanɗa ɵa, - a seŋ na wiini Epiɗ-ɗai. A muɗa ɓa: tumu na mu ɗumu karmu, n’aga mu mrumu kai haa sin gizini Epiɗ-ɗai ta ɗa, aga mu vugumu wuzaɗi nagai n’e mri ɗa kai.

¹⁶Buri Epiɗ-ɗai gaini midini dama, aga a niyasi azumai amai war fuŋ-n’Alaw par, won hlai na ɗuwal a wa li, won hlai na wulani ɗif zi ɵeŋ n’abai a wa li, won hlai na faana na wiini Alaw a tuwa li lai ɗa, nagai n’e mri war Kristu aga e ɵiyisi amai avut.

¹⁷Asakal par ɗa, tumu na mu ɗumu karmu, na mu hunumu ɗa aga mu yumumu amai gaiɗi arbani ɗugul, aŋ nivi gaini Epiɗ-ɗai, amai arbani smer, nɵa aga mu hunumu gaini Epiɗ-ɗai ɵa haa kureɗ.

¹⁸Nɵa ki si arai zi pi arbaɗi marki gaini seŋ hanɗa.