Read Mousgoum Yosva 1 Bible Online

Yosva 1 - Mousgoum bible

Yosva 1

¹Asakalni mrini Musus ɵeŋ na wiini EPIƊ-ƊAI, EPIƊ-ƊAI a miɗini wiini Yosva n’ahini Nun, ɗif zi sda na wiini Musus maini nɵa:

²Musus, ɵeŋ na wiya a mra li, tiyana ku faka amai ku vuga Turdan, tuku gaini pinzibaɗi Izrayel ɗa paŋ, aŋ wiyi aha midini afti na mu siŋɗi wiiɗi aliɗi Izrayel.

³Hlai paŋ na buburni eziki aga a baza midini ɗa, aga mu siŋki maini na mu miɗiŋni wiini Musus nɵa.

⁴Haga na wiini afti ɗa a tikasi pini edi mini basga na kaɗataŋ gaini Liban hanɗa par, haa sini ra n’abai na Öfrata ta. Afti na wiiɗi Hititekai paŋ haa sini yem ra n’abai na piɗi futi na kuskoi sek.

⁵Ɗif ktai n’aga a ɗiya muku aŋ kai, na ɓa k’aŋ karku nɵa blaŋ ɗa aga mu za gaiku maini na mu naka gaini Musus nɵa, aga mu hunuku kiiku duk kai, aga mu hunuku edi kaalai.

⁶Fuɗa was, yima agulku, buri tuku aga ku siɗi afti wiiɗi pinzibaɗi Izrayel, afti na mu ha wala ma buri mu siŋɗi siɗi tamaiɗi par.

⁷Tuku ɗa, sai ku fuɗa was, ku yima agulku pɗem, ku paya pɗem pini gadai na Musus ɵeŋ na wiya a muɗuŋku ɗa nɵa. Aga ku bunda war galku na muni kaalai, na wus kaalai kapai ku rɗa amai war sdaku na ku dara ku zaŋ ɗa paŋ.

⁸Maktuɓ zi gadai zi ɗû hanɗa a ɓurwa edi gaini muku par kai, ku ŋaŋ girvudi gaini duvuk, nɵa ku fuɗa was aŋ za pini wala n’aŋ warni gaini ɗû ɗa. Nɵa aga ku riya amai war sdaku na ku dara ku zaŋ ɗa, aga ku rɗa amai lai.

⁹Mu muɗuku ya ɓa: ku fuɗa was, ku yima agulku nɵa kai ɗi? Ku huna kai, ku ɓara agul kaalai buri Ta Epiɗ-ɗai Alaw na wiiku mu na gaiku war wala paŋ na ku dara ku zaŋ.

¹⁰Yosva a sa miɗi wiiɗi n’abakai n’arbaɗi ɗai maini nɵa:

¹¹Hili arbani vok na wiiɗi aliɗi Izrayel paŋ, ki miɗiɗi buri e zizini siɗi gaini wala zi simi buri a hina mefeŋ hu aga ki vigi Yurdan, ki hili aŋ tiki afti n’Epiɗ-ɗai Alaw na wiiki a siŋki aŋ wiiki ɗa.

¹²Yosva a miɗiɗi wiini pinzibani Ruben, pinzibani Gat, gaini galni pinzibani Manase lai maini nɵa:

¹³Ki hini midiki a kɵa gaini seŋ na Musus, ɵeŋ na wiini EPIƊ-ƊAI a miɗiŋki won hlai na a muɗa ɓa: Epiɗ-ɗai Alaw na wiiki a siki si-n’amla, a siki afti hanɗa lai.

¹⁴Falakaiki, aliki n’agogoi gaini farani faraiki aga a hina midini afti na Musus a siŋki anene duɓani Yurdan woni na. Amma tiki na maɵagai na ki kiɗi aŋ hitimi ɗa, aga ki mili wazagaiki zi hatam tiki, ki hili edi wuzaɗi tawalakai aŋ zini piɗi,

¹⁵haa EPIƊ-ƊAI a siɗi si-n’amla wiiɗi tawalakai lai maini a saŋ siki tiki nɵa, haa e tiki afti n’Epiɗ-ɗai Alaw na wiiki a siŋɗi. Asakal par ki kiɗi aŋ wiyi midini afti na Musus a saŋ siki war galni Yurdan hanɗa par, piɗi futi na dawai par.

¹⁶E wiyi seŋ wiini Yosva e miɗi: Tiyi aga mi zi pini seŋku na ku miɗiŋyi paŋ, aga mi hili woɗi paŋ na ku dara ku ɵiniyi woni.

¹⁷Tiyi aga mi ɵini puku maini na mi ɵini pini Musus nɵa. Epiɗ-ɗai Alaw na wiiku a za gaiku maini ni a za gaini Musus nɵa.

¹⁸Ɗif paŋ n’a faka amai suku, na a gada pini miɗiku na ku miɗiŋyi kai ɗa, a nava fiɗi n’edi. Amma tuku, fuɗa was, yima agulku.