Read Mousgoum Yosva 11 Bible Online

Yosva 11 - Mousgoum bible

Yosva 11

¹Won hlai na Yabin pai na Hatsor a ɵina hanɗa, a ɵina ɗai pini Yobab pai na Madon, pini pai na Simron, pini pai na Aksap lai.

²Piɗi paakai na sini huwuŋ na war gal n’azumai sek, war gal n’amai sek na wiini hlai na plas na Kinrot, tini yem ra na Genezaret, war huduk midini boŋor na Dor piɗi futi na koskoi sek.

³Piɗi Kananiyakai na piɗi futi na dawai gaini na koskoi lai, piɗi Amoritekai, piɗi Perizitekai, piɗi Yebuzitekai na war hlai zi huwuŋ ɗa, piɗi Hivitekai n’e ɗa azumai eziɗi huwuŋ Hermon midini afti na Mispa.

⁴Nagai e hilisi gaiɗi askaraiɗi paŋ, vokɗi abai, na ɗaini e pɵi kai maini kai kai na agoɗom war yem ra nɵa. Plasai lai, saret zi gaw ɗa lai ɗa viya gara.

⁵Paakai hanɗa paŋ e tipi tap, e hilisi e pi kaŋɗi aŋ bonu gobi gaini yem na Merom kapai e hitimiɗi Izrayel.

⁶EPIƊ-ƊAI a miɗini wiini Yosva: Ku hûniɗi kai, buri dawai war piɵiɗi futi maini nɵa ɗa aga mu siɗi gaini hlaiɗi gaini mri ca ca wiiɗi Izrayel.

⁷Yosva gaiɗi ɗaini zi hatam paŋ e liɓisi midiɗi gobi gaini yem na Merom, e fiki midiɗi.

⁸EPIƊ-ƊAI a hiniɗi war tiɗi Izrayel, e fiɗiɗi edi, e tiki futi piɗi haa a Sidon n’amai, haa a Misrefot-Mayim, haa war huduk na Mispa piɗi futi na dawai par, e fiɗiɗi edi, e hini ɗif ktai piɗi karni kai.

⁹Yosva a za siɗi maini n’EPIƊ-ƊAI a gadaŋ midini nɵa, a ɗukla sirdai n’ezini plasaiɗi edi daf daf, a ya saretɗi zi gaw ɗa edi hu hu lai.

¹⁰War sarti ni ɗa, Yosva a wayasi aŋ tikiti Hatsor, a fuɗa paiɗi edi gaini kaɵkar. Hatsor te naka avut par, te pay n’amai n’arbaɗi marɗi.

¹¹A fiɗiɗi ɗai na woni edi gaini kaɵkar kafa, wala na karni nɵa a hina woni kai, a ɵa afu piɗi Hatsor su lai.

¹²Yosva a mula fuŋ n’abakai na wiiɗi paakai hanɗa paŋ, a yimiɗi paakai lai a fiɗiɗi edi gaini kaɵkar, a vidiɗi edi maini na Musus ɵeŋ na wiini EPIƊ-ƊAI a muɗaŋ ɗa nɵa.

¹³Amma Izrayel ɗa e yi fuŋ n’abakai n’amai sini boŋor kai, sai ti Hatsor na Yosva a yiti tar.

¹⁴Aliɗi Izrayel, e mili wazagai na war fuŋ n’abakai hanɗa gaini farai n’ezini puɗu puɗu lai aŋ wiiɗi, amma ɗai ɗa e fiɗiɗi edi gaini fiɗi haa e vidiɗi edi kafa, wala na karni nɵa a hina kai.

¹⁵Wala n’EPIƊ-ƊAI a sini futi wiini Musus ɗif zi ɵeŋ na wiini ɓa a zaŋ ɗa, Musus a siŋni wiini Yosva buri a zaŋ. Yosva a zaŋ gaini hlaini paŋ, wala ktai a hina pini kai.

¹⁶Yosva a mula afti paŋ, Hlai zi huwuŋ, hlai n’amai sek ɗa paŋ, afti na Gosen ɗa paŋ, afti na plas ɗa, huduk na Yurdan, hlai zi huwuŋ na wiiɗi Izrayel gaini hudukɗi paŋ.

¹⁷Siɗi huwuŋ na gulɓuwi par na te na gobi gaiɗi Sehir haa Baal-Gat war huduk na wiiɗi Liban, azumai eziɗi huwuŋ na Hermon ɗaw, a yimiɗi paakaiɗi paŋ, a rɗa amai midiɗi, a fiɗiɗi edi lai.

¹⁸Hatam na Yosva a hitimaŋ gaiɗi paakai hanɗa a fana viya gara.

¹⁹Fuŋ n’abai ktai na a za bonu zi ɵeɗ gaiɗi Izrayel nɵa aŋ kai, sai e ɗi Hivitekai na Gabawon ɗa tar. Fuŋ n’abakai hanɗa paŋ ɗa e miliŋ gaini hatam.

²⁰A ziɗi piɗi buri e fiki gaw gaiɗi Izrayel a EPIƊ-ƊAI dama, kapai Izrayel ɗa te fiɗiɗi edi gaini hiinini-haw kai, te vidiɗi edi gaini maini n’EPIƊ-ƊAI a miɗiŋni wiini Musus nɵa.

²¹War sarti ni ɗa, Yosva a hala aŋ hitimiɗi alini Anak n’amai sini huwuŋ ɗa, na a Hebron, na Debir, na Anab, na war hlai zi huwuŋ na wiini Yuda paŋ, gaini hlai zi huwuŋ na Izrayel ɗa paŋ lai. Yosva a fiɗiɗi edi, burini EPIƊ-ƊAI ɗa a ɓulka fuŋɗi n’abakai ɗa edi marwai marwai lai.

²²Pinzibani Anak a hina midini aftiɗi Izrayel kir kai, sai a Gaza, a Gat, a Asdod lai.

²³Yosva a tika afti paŋ maini n’EPIƊ-ƊAI a miɗiŋni wiini Musus nɵa, a siŋɗi aŋ bulum wiiɗi aliɗi Izrayel paŋ, pini ɓraw na war piniziba ziba, asakal hanɗa, afti a sumna ɵeɗ, hatam aŋ kir kai.