Read Mousgoum Yosva 13 Bible Online

Yosva 13 - Mousgoum bible

Yosva 13

¹Won hlai na buzani Yosva a za li viya, a za wel li lai ɗa, EPIƊ-ƊAI a miɗini: Ku za wel li, buzaku ɗe a za li viya lai, afti na a hina wuzaku sek aŋ tiki ɗa ɗe abai gara lai.

²Afti na a hina ɗa a hanɗa: Aftiɗi Filistrekai gaiɗi Gesuritekai paŋ,

³sini Sihor n’a na wuzaɗi Egipte ɗaw par haa sini hagani afti na wiiɗi Ekron war gal n’azumai sek, afti na a tala maini na wiiɗi Kananiyakai ɵa na paakai na ɵim na wiiɗi Filistrekai e tikiŋ, e simni woni, pai na Gaza, pai na Asdod, pai na Askalon, pai na Gat gaini pai na Ekron gaini afti na wiiɗi Avitekai lai.

⁴War gal n’amai sek ɗa, afti na wiiɗi Kananiyakai paŋ, sini Ara na wiiɗi Sidoniyakai par haa a Afek ta, sini haga na wiiɗi Amoritekai.

⁵Afti na wiiɗi Gebalitekai gaini Liban paŋ piɗi futi na dawai par, a Baal-Gad par azumai eziɗi huwuŋ na Hermon haa aha miɗi Hamata ta.

⁶Ɗai n’amai midini hlai zi huwuŋ paŋ siɗi Liban par haa a Misrefot-Mayim gaiɗi Sidoniyakai paŋ lai. Aga mu birgiɗi edi wuzaɗi aliɗi Izrayel. Amma tuku aga ku siɗi afti hanɗa aŋ bulum wiiɗi Izrayel pini viri maini na mu guduku midini nɵa.

⁷Tiyana ɗa, ɓurwa afti hanɗ arbaɗi piniziba na ɵeeŋe gaini galni pinzibani Manase, a siya ɗi paŋ a nava gal na wiini wiini.

⁸Pinzibani Ruben, pinzibani Gat gaini galni pinzibani Manase lai e nivi bulum na wiiɗi nagai ya na Musus a siŋɗi anene par duɓani Yurdan piɗi futi na dawai par sek maini na Musus, ɵeŋ na wiini EPIƊ -ƊAI a ɓirwiŋɗi nɵa.

⁹Siɗi Arower na te na ɵimani yem zi ki na Arnon par, sini fuŋ n’abai n’edi arbani huduk ɗa par, sini hlai na boŋor na Madeba par haa a Dibon ta.

¹⁰Fuŋ n’abakai na wiini Sihon paiɗi Amoritekai na a ŋa a Hesbon par haa sini haga na wiiɗi Ammonitekai,

¹¹Galaad aftiɗi Gesuritekai gaiɗi Makatitekai paŋ, huwuŋ na Hermon gaiɗi Basan haa a Salka.

¹²Pay na Og, na Basan, na a hina ktai piɗi pini ziba na wiini Refayim, na a suma pai a Astarot gaiɗi Edrehi paŋ lai. Musus a rɗa amai midiɗi a birgiɗi edi.

¹³Amma aliɗi Izrayel e birgiɗi Gesuritekai gaiɗi Maketitekai edi kai, nagai e zi fuŋ arbaɗi Izrayel ɵa haa girna.

¹⁴Pinzibani Levi ɗa a ziba na ktai na a hina na e sini bulum kai ɗa. Bulum na wiiɗi ɗa, e niviŋ warni ɓaka zi yi na a sa sini Epiɗ-ɗai Alaw na wiiɗi Izrayel maini n’EPIƊ-ƊAI a za ha midini nɵa.

¹⁵Musus a siɗi bulum na wiiɗi pinzibani Ruben, piɗi humuni humuni,

¹⁶aftiɗi, siɗi Arower na te na ɵimani yem ra Arnon par, sini fuŋ n’abai n’a na edi arbani huduk, gaini boŋor na gobi gaiɗi Madeba paŋ.

¹⁷Hesbon gaini fuŋ n’abakai n’amai midini boŋor ɗa maini: Dibon, Bamot-Baal, Bet-Baal-Meyon.

¹⁸Yahas, Kedemot, Mefaat,

¹⁹Kiryatayim, Sibma, Seret-Sahar siɗi huwuŋ na war huduk.

²⁰Bet-Peyar, hlai zi zigi na Pisga, Bet-Yesimot,

²¹fuŋ n’abakai n’amai midini boŋor, pay na Sihon paŋ, paiɗi Amoritekai na a ŋa a Hesbon. Musus a rɗa amai midini Sihon, ni gaiɗi abakai na Madiyan ɗa paŋ: Evi, Rekem, Sur, Hur, Reba lai. Paakai hanɗa a ŋa midiɗi ɗa a Sihon, e simni midini afti lai.

²²Arbaɗi nagai n’aliɗi Izrayel e fiɗiɗi edi gaini kaɵkar ɗa: Balam n’ahini Beyor na ɗif zi siɗi wuti ɗa, a na.

²³Pinzibani Ruben ɗa, hagaɗi gaini Yurdan, hanɗa a bulum na wiiɗi alini Ruben piɗi humuniɗi humuniɗi, fuŋ n’abakai gaini n’agogoi na ɵemaɗi paŋ.

²⁴Bulum na Musus a siŋɗi wiiɗi pinzibani Gat gaiɗi alini Gat ɗa piɗi humuni humuni,

²⁵a siɗi afti na Yaser, fuŋ n’abakai paŋ na Galaad, galni afti na wiiɗi Amoritekai haa a Arower na te wuzaɗi Raba.

²⁶A Hesbon par haa a Ramat Mispe gaiɗi Betoniyom, a Mahinayim par haa sini haga na wiiɗi Dodebar.

²⁷Azumai war huduk na Yurdan, Bet-Haram, Bet-Nimra, Sukot, Kafon, pini afti na wiiɗi pay na Sihon, pai na Hesbon, piɗi futi na dawai par anene duɓani Yurdan. Yurdan ɗa a haga haa sini yem ra n’abai na Genezaret.

²⁸Hanɗa a bulum na wiiɗi alini Gad piɗi humuniɗi humuniɗi, fuŋ n’abakai gaini n’agogoi lai.

²⁹Musus a siɗi bulum na wiiɗi galni pinzibani Manase gaiɗi alini Manase lai piɗi humuniɗi humuniɗi.

³⁰Aftiɗi a fakasi a Mahanayim par, Basan gaiɗi abaiɗi, afti na wiini Og pai na Basan paŋ, gaini fuŋ n’abakai na wiiɗi Yayir na midini afti na Basan, fuŋ n’abakai doogo doogo ɵaara lai.

³¹Galni afti na Galaad, Astarot gaiɗi Edrehi, fuŋ n’abakai na midini afti na wiini Og pai na Basan a sa siɗi alini Makir n’ahini Manase, piɗi humuniɗi humuniɗi.

³²Hanɗa a gal na Musus a saŋ won hlai n’a na midini afti na plas na Mowab anene duɓani Yurdan par wuzaɗi Yeriko piɗi futi na dawai par.

³³Musus a sa bulum wiiɗi pinzibani Levi kai, buri ɓa bulum na wiiɗi ɗa a Epiɗ-ɗai Alaw na wiiɗi Izrayel maini n’EPIƊ-ƊAI a za ha midini nɵa.